ʻOku Mau Talitali Fiefia Koe ki Hoʻo Liahona Foʻoú

Mālō hoʻo meʻa maí! Kātaki ʻo kau fakataha mo kimautolu ʻi hono fakafiefiaʻi ʻo e Liahona kuo fokotuʻutuʻu mo hiki foʻou ko ʻení. ʻOku mau laveʻi pē ʻoku mou saiʻia ʻi he Liahona motuʻá, ka kuo taimi pē ke fakahoko ha ngaahi fakaleleiʻi.

Ki he kau kamata foʻoú, te mou fakatokangaʻi ʻoku ʻikai ke kei ʻi he lotomālie ʻo e makasiní ʻa e ngaahi meʻa naʻe faʻa fakahū aí. Kuo ʻosi hiki ʻa e ngaahi ongoongó mo e ngaahi peesi ʻa e fānaú ki he konga ki mui ʻo e makasiní.

Ko e hā pē ha meʻa te ke fie maʻu ʻi ha makasini mei he Siasí, ʻoku mau tui te ke lava ʻo maʻu ia heni. Kapau ʻokú ke saiʻia ʻi he ngaahi fakamatala lōloa mo ʻuhinga mālie angé, te ke maʻu ha ngaahi fakamatala fakatupu fakakaukau heni ke ke fili mei ai. Ka, ʻo kapau ʻoku ʻikai ke ke maʻu ha taimi feʻunga ka ʻokú ke loto pē ke vakaiʻi fakavavevave pē, te ke lava ke fakahoko mo ia foki.

Te mou maʻu ʻi he makasini kotoa ko ʻení ha ngaahi konga foʻou, kuo fakaʻilonga mahino maʻá e fānaú, toʻu tupú mo e kakai lalahi kei talavoú. Kapau ʻokú ke foʻou mai ki he Siasí, mahalo te ke saiʻia ange hono lau ʻo e ngaahi ʻilo fekauʻaki mo e ngaahi tokāteline mo e founga ngāue ʻa e Siasí (vakai, Ko e Meʻa ʻOku Tau Tui Ki Aí, ʻi he peesi 14). Kapau ko ha faiako pe takimuʻa pe mātuʻa koe, te ke maʻu ha fanga kiʻi tokoni ʻe ʻaonga ki hoʻo tokoniʻi ʻa kinautolu ʻokú ke ʻofa aí (vakai ki he peesi 13, 22, 26, mo e 36).

Ko e taha ʻo e ngaahi konga fakatupulaki ʻo e Liahona foʻou ko ʻení, ko hono tuifio ʻa e ngaahi fakamatala ki he toʻu tupú mo e fānaú—pea mo hono fulihí. Te mou vakai ki heʻene hoko ʻení, tautautefito ki he Pōpoaki ʻa e Kau Palesitenisī ʻUluakí.

ʻOku ʻi ai foki mo ha fanga kiʻi liliu kehe. ʻOku mau poupouʻi kimoutolu ke mou kumi hake kinautolu ʻi hoʻomou vakaiʻi ʻa e makasini ko ʻení. ʻOku fakataumuʻa ʻa e ngaahi liliu kotoa pē ke tokoniʻi koe ke ke ongoʻi ʻa e Laumālié mo ʻiloʻi lelei ange ʻa ʻetau Tamai Hēvaní mo hotau Fakamoʻui ko Sīsū Kalaisí. Ko Kinaua ʻa e tefitoʻi maʻuʻanga tataki fakalaumālie ki he Liahoná.

—Kau ʻētitá

P.S. Te ke lava ʻo tokoni mai? Fakahoko mai ke mau ʻilo e anga hoʻo fakakaukau ki hoʻo Liahona foʻoú. ʻĪ-meili mai ki he [e-mail] (kātaki ʻo fokotuʻu ʻa e “New Liahona” ʻi he laine ki he tefitó), pe faitohi mai ki he:

Liahona, Rm. 2420

50 E. North Temple St.

Salt Lake City, UT 84150-0024, USA