Katokan Tangiran Abau
Sue Hirase, Utah, USA
I moana au reirei n te tabo ni kataneiai ngke 18 au ririki. Imwin te tai ae aki maan, ngkanne, I kaeweaki nakon te reirei ae rietata ao I bita te bwai are I reiakinna. Au reirei bon ti tabeua te aoa kaeana mani mwengau, ma I kunea bwa I a rangi n tangira abau ao man aki unga nanou, n tangiria n aki reirei ao n okira au utu. Ma I ataia bwa ngkana I karaoa aei, N na boni kabua au tai ni karekea au beba ae bubura.
N teuana te wiikien e aki maan imwin teiraken te reirei, ni kabane kaain au ru a oki ni kawari mwengaia. I ataia bwa ngkana I okira mwengau naba, N na rawa n oki. I aki kona naba n taetae ma au utu bwa I maaka are N na tang ao n aki bane au iango i aon au reirei. I a tia n tataro ibukin kakorakorakiu n tokanikai i aon tangiran abau, ma ngkai I tataro ni kan ataia bwa N na tiku n te reirei ni karekea au beba ae bubura.
Ni moaningabongin te Taabati anne ngke I nakonako ni karaurau iaon ana tabo te reirei iaoni kawaiu nakon te tataro, I iangoia bwa N na kanga n tiku n te reirei ngkai e rangi ni korakora tangiran mengau ao au utu ao n aki kona n tokanikai iaon te maroa. Ma tera ae N na karaoia ngkana I a kitana te reirei?
Ma ngke I roko n te tataro, te uoote are imwaira e a tibwa tia ni kitana te umwantabu. I rinnako, ni kantaningaia bwa N na tataro ibukin te kairiiri. Ngke I a kunea te tabo ae N na tekateka iai ao I a karaurau nakon te tabo n tekateka, I a nor ate buroukuraem ae tia ni karaoaki man te bootaki n toa are i mwaaira. Ikanne mai moan te beeba are rukumaki arei bon taeka aikai: “Tao mwin ni kabana te reirei are te kabanea ni kakawaki bon te konabwai ni karaoa te bwai are ko riai ni karaoia, n te tai ae ko riai ni karaoia iai, tao ko tangiria ke ko aki.”1
N te tai anne I a ata te bwai ae N na karaoia. E a tia te Uea ni kaeka au tataro n te aro ae bebete, ma I aki kona ni kakewea ae bon te kaeka naba.
E aki maan i mwin te Taabati anne are e a bua iai maroau ao akean nanou ni kan reirei. Ao mwina, I kimwareirei n nikiran au ririki n te reirei. E reke au beba ae bubura, raoraou i nanoni maiu, ao au koaua ae matoatoa riki man touan mwin ana wirikiriki te Tamnei.
Ngkai, e raka iaon 25 te ririki imwina, I bon ururinga naba te kaeka anne nakon au tataro, ao I kabonganai taeka naba akanne man te burokuraem n te tataro n toa anne ni kakaonimaki nakon mwakuri aika kangaanga. I tia n tibwaua te bwai ae I tia n rinanona aei ma raoraou ni kaan ao au utu n te kantaninga are a na karekea te kakorakoraki n taai ni kangaanga.
I ataia bwa te Uea e tabeakini bwaai ake ti namakin ao ara rinerine ni katoa bong, ao I ataia bwa E kaekai ara tataro ake a nako man nanora.