Beeku n te Ekaretia

Antai, ngai? Reirei?

Ao ngkai tinang anga te tai ni [karina aram] ibukin ara reirei.” Ngkana kona ongora nakon taeka aikai n te taromauri n te Taabati ae na roko, tera ae na riki nakoim ko na maaku ke ko na koaua raoi iai?

N te tai ae waekoa ao a bane n riki kaain te Ekaretia n riki bwa taan reirei. E kona n riki ni Moanrinan, inanon te Bootaki n Aine ke n te kooram n nakoanibonga, n te kakawari n reirei ke n te reirei n te mweenga, ke ni bootakin te utu n te tairiki. Ibukiia aomata aika mwaiti aika boou inanon te Ekaretia, a na aki rangin n tataneiai ma oin taben te tia reirei. Riki irouia nako a tia n reireinaki n taai aika mwaiti a na bon aki kona ni uringa bwa ana kanga n rangin ni koaua raoi iai ao ni kona n riinga te maiu ibukin te raoiroi.

Aikai iango aika beebete aika a na buokiira n tatabemaniira nako ni kakoroi nanon tabera n angareirei:

1. Te tataro bon te bwai ni mwakuri ae moan te kakawaki. Moan am katauraoi n am reirei n te tataro ma te nanorinano ibukin ana kairi te Tamnei. Katuka am iango iaon ana berita te Uea nakoia taan reirei ni kabane: Ko na anganaki te Tamnei man te tataro n onimaki (tara D&C 42:14).

2. N angiin te reirei ao a mwaiti riki bwaai n reirei n te boki n anga reirei nakon are ko na kona n anga n tain te kiraati. Wareka te reirei, ao tataro mwaaka n rinea teuana ke uoua moan tua aika kakaawaki ma iai aika ko taku bwa a tamaroa ibukin am kiraati.

3. Tataro mwaaka ni kamatebwai koroboki aika tabu aika a kaineti ma am reirei, ao koroi katooto ao moan tua ma iai. E kona ana taeka te Atua n iai “korakoran riki korakorana iaon aia iango aomata nakon … te bwai riki teuana” (Aramwa 31:5).

4. Karekea te rau n te koaua are ko aki kainnanoia bwa ko na atai bwaai ni kabane ibukin te reirei n riki bwa te tia reirei ae mwaatai ngkoe. Bairei tabeua titiraki aika beebete are e na kona kaain am kiraati n tibwauai aia atatai ao aia konabwai n atai nanon bwaai aika e kangaanga te oota iai. A kona n ae mwakoron am reirei ae te kabanea ni kaunga ao n ururingaki.

5. Ngkana ngkoe te tia reirei, ko weteaki bwa ko na reirei naba. Reirein te euangkerio “e tangira am mwakuri korakora ni karikirakea am konabwai, n ataia bwa e na karikirakeko te Uea ngkana ko anga reirei n te kawai ae E a tia n tuangko.”¹

Ibukin iango n anga reirei riki tabeua, tara Teaching, No Greater Call.

Bwaai aika a na taraaki

1. Teaching, No Greater Call (1999), 4.

Aia Iango Taan Kairiiri

Ngkana ko kaaina te beretitentii, kakoaua bwa ko nako n iri ngkana taan reirei ao tabeman riki a weteaki bwa ana beku n am bootaki a kamatoaki. Imwiina ao bairea te tai ae kam kona ni kaitibo iai ni:

1. Kabwarabwara taben te nakoa ae boou.

2. Anga nako booki n reirei ke bwaai n reirei ibukiia taan kairiiri.

3. Anga ibuobuoki ao kataneiai riki tabeua.

4. Anga am kakaitau ibukin ao te onimaki irouia membwa aika boou.

Ngkana n Na Nako n Anga Reirei

“N na warekia nako ao ni moanna n tataro ibukin te reirei anne n te Tabati imwain aei. Anne e na anganai te wiiki ae bwanin n tataro, n ukoukora te tamnei, n iango, ni wareware ao n tarai aron karaoakiia n te maiu aei are e na anga te korakora nakon au rongorongo. Ko aki kabanea te reirei n te tai ae waekoa anne, ma ko na rangin ni miimi ni kunea bwa mwaitira iango aika ko iangoi inanon te wiiki anne, mwaitira bwaai—ae anganiko te Atua aika ko na namakin bwa ko riai ni kabonganai ni kabanean raoi am katauraoi.”

Unimwaane Jeffrey R. Holland kaain te Kooram n te Tengaun ma Uoman, “Teaching and Learning in the Church” (worldwide leadership training meeting, Feb. 10, 2007), Liahona, June 2007, 58.