2010
Tera Ae Tina Riai Ni Karaoia Ngkana Tiaki Ata Te Bwai Ae Tina Karaoia?
Tianuare 2010

A Taetae Nakoira

Tera ae Tina Riai ni Karaoia Ngkana Tiaki Ata te Bwai ae Tina Karaoia?

Iroun Unimwaane Stanley G. Ellis

Man te Itingaun

E kaantaningaira te Uea bwa tina ukeuke, kamatebwaia, ao ni karaoa te mwakuri ngkana akea iroura te atatai ae kororaoi.

Elder Stanley G. Ellis

Imwiin Nibwaai ao tarina ngke a teimatoa n aki reke irouia bwaatua aika buraati mai iroun Raabwan, Nibwaai e a nako ni karaoa n te kabanea n tai, “n akea ataakin te bwai mai imwaina bwa tera ae e na riai ni karaoia” (1 Nibwaai 4:6).

A mwaiti burabeti rinanon rongorongon te aro n taai akekei ake a kaitibo ma te kanganga ae bon ti te arona ike a kataaki iai aia onimaki. Atam e a tuangaki bwa e na anga ana karea n akea ataakin bukina (tara Moses 5:5–6). E kitana abana Abraham ao ni mwananga nakon te aba teuana are e aki ataia bwa e mena ia (tara Ebera 11:8; Abraham 2:3, 6). Ni mwanangan Bauro nako Ierutarem ao bon akea ataakin te bwai ae e na riki nakoina n (tara Makuri 20:22). E katorobubua Iotebwa Timiti n te buakonikai n aki ataia bwa te aro raa ae e na kaainna (tara Joseph Smith—History 1:19).

Tina kona naba ngaira ni kaitibo ma aekaki ni kangaanga ae tina tangiria ni karaoa iai te mwakuri n aki ataia bwa tera ae ti na karaoia. Ma te karabwarabwa, atatai aikana oti ieta e reireiniira kawai ni waaki nako e ngae ngke ti aki ataia bwa tera mwiina.

E kaungaia tarina Nibwaai bwa ana teimatoa n onimaki ni kawaakin ana tua te Uea (tara 1 Nibwaai 4:1). Imwiina e karaoa te mwakuri iaon te onimaki anne. E “waerikiriki nako nanon te kaawa ao ni karekea kawaiu nakon ana auti Raabwan,” imwiin “kairana n te Tamnei” (1 Nibwaai 4:5–17). E aki ti tuangnga te Tamnei te bwai ae na riai ni karaoia ma bukina naba ngkai e kakawaki bwa e na karaoia (tara 1 Nibwaai 4:12–14).

E kaeka Atam n ana mwakuri n ongotaeka nakon ana tua te Uea (Moses 5:5). E kakorakora ana onimaki Abraham ao, n tokina, “n te onimaki are e riki ni maeka iai n te aba are e atongaki n te taeka n akoi” (Ebera 11:9). E rineia Bauro bwa e na aki maaku “bwaai ni kabaebae ma taian rawawata” ma e na kabanea te mwakuri are e a “anganaki iroun te Uea Iesu” (Mwakuri 20:23–24). E iangoia raoi Iotebwa Timiti koroboki aika tabu ao e kataia n ira te kakao nakon “butiakin te Atua” (Joseph Smith—History 1:13).

Katabeara ni Karaoa te Mwakuri

E kauringiira koroboki aika a tabu bwa aki ataakina e na aki riki bwa te kawai ni birinako man aki karaoana. Nibwaai “iai inanona te kan atai bwaai ake e a tia n noori [tamana],” e iangoia raoi inanona ao “ao e uotai nako Tamnei te Uea” (1 Nibwaai 11:1). Reiman ao Remuera, n te taina, ao a kabanea aia tai ni “kauntaeka imarenaia ni kaineti ma bwaai ake e taekin [Riaai] nakoia” (1 Nibwaai 15:2).

E kantanigaira te Uea bwa tina ukeukeria, kamatebwaia, ao ni karaoi—e ngae ngke iai bwaai aika ti aki kona n atai n te maiu aei. Teuana mai ibuakona bon te tai are te Kauaoki. E taku “Ma ngaia ae kam na kamarurungingkami n tantani, bwa kam aki ata te bong ane E na nako ma iai ami Uea” Mataio 24:42 Bukin bwaai aika aki kantanigaaki, Beretitenti Wilford Woodruff (1807–98 e tuangiia kaain te Ekaretia bwa ana katauraoi, ma e kamatoaa bwa e na teimatoa n unikii aroka aika tierii.1

“Ngkana ko teimatoa ni maeka ma te kororaoi ao am rinerine e na boraoi ma ana reirei te Tia Kamaiu ao ko na tangiria n teimatoa ni waaki nako ma te onimaki,” e taku Unimwaane Richard G. Scott man te Koorum n Abotoro ake Tengaun ma Uoman. Ngkana ti teimatoa nakon ana wirikiriki te Tamnei, Unimwaane Scott e reitia, bwa ane e na roko te aki oota n am iango ni kaotia bwa e aki eti am rinerine ke te rau inanom are kona namakinna ni kamatoaa bwa e bon eti am rinerine [tara D&C 9:8–9 Ngkana ko maeka n te raoiroi ao ni karaoi mwakuri ma te onimaki, te Atua e na aki kairiko nakon taabo aika a raroa n akean te kanikinaa are e na kauringko bwa ko toua te kawai ae kaairua.”2

Kataa te Uea

Uoua te bwai ae I rinanona ni maiu aei—ngke I aki koaua raoi bwa tera ae n na karaoia—kabwarabwara kakawakin irakin nanon te tua ao irakin te burabeti ae maiu. N te reirei ae rietata ao e bane au mwane, ngaia are I a kakaea au mwakuri ae itera n tai. Ngke I karekea boou n te tieke, ao I aki ataia bwa e na tau nakon te bwakabwai are imwiina. Ma I uringa ana berita te Uea rinanon te kabwianibwai: “Kataai ngkai n aei—bwa tao n na kauki mataroan nako karawa nakoimi, ma n nurakina kakabwaiami.” (Maraki 3:10).

Iangoia bwa n na kataa te Uea. I kabwaka moa au kabwianibwai, ao E kakabwaiaai bwa n na tokanikai iaona. Ni karaoan te kawai aei I moanna n onimakin Ana berita

N ririki ake imwiina ngke ti karekeia natira ngai ma titita Ellis ao I a tibwa moana au mwakuri ae boou, au tia kamwakuri e bita te baire n au intiuarenti n te bwai n aoraki. Te babaire mai imwaina e na toki n Tuun 1 ao are e boou e na waaki inanon Turai 1, are e a katikuira n akea te intiuarenti inanon teuana te namwakaina. Ti aki ataia bwa tera ae tina karaoia, ma n te tai anne ao ti uringa ana maroro Beretitenti N Eldon Tanner (1898–1982) n te tai are e tuangiia kaain te Ekaretia bwa ana riai n iai aia intiuarenti n te bwai n aoraki.3

I maroro ma te kambwana, ao ti karaoa te booraraoi ni kakoaua bwa e reitinako te intiuarenti ni kamanomano ni karokoa banen Tuun. N Tuun 28 natira te mwaane are te ikawai, Matt e bwaka man te baba ni karebaba ae rietata n aia tabo n tebotebo kaain rarikira ao e bwakara aon te timanti. E ikoaki atuuna ao iai te kanganga nakon kaburorona. E waekoa n anaaki n te erikabuta nakon te oonaoraki, ike e a buokaki irouia taan rabakau. Boona e a bon rangi ni korakora ao e uruana arora n te mwane. Ti tekeraoi, bwa e kabooi angiin ana kabane mwane n ana bwainaoraki te intiuarenti.

Tera ae Tina Riai ni Karoaia?

Tera ae tina riai ni karaoia ngkana ti aki ata te bwai ae tina karaoia? Ti kainnanoia n tara tiaki are iaon te burabeti, koroboki aika a tabu, ao te Tia Kamaiu ibukin te kaeka. Te bwai ae rangi ni kakawaki e reireiniira bwa tina:

  1. Ukoukori kaekaaia rinanon te kamatebwai ao te tataro.

  2. Kaawakin tuua.

  3. Onimakina te Uea n ana Berita.

  4. Ira te burabeti.

  5. Wakinako inanon te onimaki, n akea te maaku.

  6. Kakoroi bukin mwiokoara

Ao n rinanoan mwaneka aikai, tina irira mwiin ana maroro Beretitenti Boyd K. Packer, Beretitenti n te Koorum n Abotoro ake Tengaun ma Uoman: “N tainako, n tainako ririmwin ana wirikiriki te Tamnei.”4

Bwaai aika a na taraaki

  1. Tara Teachings of Presidents of the Church: Wilford Woodruff (2004), 250.

  2. Richard G. Scott, “Using the Supernal Gift of Prayer,” Riaona, Meei 2007, 10.

  3. Tara N. Eldon Tanner, “Constancy amid Change,” Riaona, Beberuare 1982, 46, Ensign, Nobemba 1979, 82.

  4. Boyd K. Packer, “Kaokan bwaai” Worldwide Leadership Training Meeting, Tianuare 11, 2003, 2.

Kamataata n te Tamnei iroun Matthew Reier

Abraham e kiitana mwengana ao ni mwananga nakon te aba ae e boou n akean ana atatai bwa e mena ia, ao n tokina, “e riki ni maeka n te aba ni berita.”

Ti kainnanoia n taraa ae aki raroa ma te burabeti, koroboki aika a tabu; ao te Tia Kamaiu ibukin te kaeka.

Maing: Abraham Ngke e Kitana Haran, iroun G. Bernard Benton; atai: Kamataata iroun Gregg Thorkelson