Ti Na Kanga Ni Kabwaka Boon Ara Auti?

Douglas Arévalo, Costa Rica

Teuana ma te iterana te ririki imwin are kainnabau ae, Rebeca, ao ngai ti mareaki, e a in naba te kambwana are I mwakuri iai. I a kunea n te tai ae waekoa bwa ai akea au mwakuri.

Nakon are N na kakaea ae e na aeanai, I namakina te wirikiriki bwa N na katea oin au kambwana. I ataia bwa te kakaewenako aei e na kangaanga, ngaia are I a tannakon Tamau are i Karawa bwa e na kamatoa te bwai are I tia n namakinna. E riki te tataro bwa te bwai ae kakawaki n te moani babaire anne ao e tia n reitinako ni kakawaki man te tai anne.

N Aokati 2003 I a waakina oin au kambwana ni karaoa te been, te ununiki, karaoan o-n-aroka, ao te ono bwai. A aki beebete bwaai ni kabane ngkana iai oin am kambwana, riki ngkana ko moan wakinnna. Ni moan te namwakaina teuana, ngai ao Rebeca ti kainnanoa kani kabwakan boon ara auti. Bon akea ara mwane. Ngaia are n te ingabong teuana ti tataro bwa ti aonga ni karekea te mwane are ti kainnanoia. N te bong are i mwina I a tangoaki ibukin te mwakuri are te bo iai e kona n reke iai boon ara auti.

Te namwakaina are I moana katean iai au kambwana, e tuangai te beretitenti bwa N na kaitibo ma ngaia. Ngkanne I a weteaki bwa te bitiobi n te uoote. I a ataia bwa Tamara are i Karawa e a tia ni kauka te kawai ibukiu bwa N na butimwaea ao ni karaoa nanon te wewete aio. Ma au mwakuri are teuana, e na aki reke au tai ae riai ibukiia kaain te uoote ao ibukin au utu. Ma ibukin ae iai oin au kambwana, e a kona ni bibitaki aron au tai. I tia ni kona ni mena ni mwengau n tain bwaai aika kakawaki inanon ara utu, n aron are ngke a bungiaki natiu ao a moanna n nakonako ao n taetae. N irianaki n anne, ngai ma bu ti tia ni beku naba n te San José Costa Rica Tembora. Taai aikai, ake a reke nakoira ibukina bwa ti tia ni kaeka nakon te wirikiriki ao ni kakaea te kairiiri n te tataro, a tia ni kabaeira ni kabane.

I tia n reitanako au kamatebwai n te reirei ae rietata n taai aika nako. Ngke e roko te iango ae N na okira te reirei, I tabeaianga bwa N na kanga n tararua au utu. Uoua te bong n te wiiki I mena n te umwanreirei, tiaki n te mwakuri. A na kanga au utu n tararuaia?

Ngai ma bu ti karaoa te tataro ibukin te kakaewenako aei, ao te Uea e kaeka. I moanna ni karekei kaonteraekite (contract) aika maan taia, are e a karekea te kabebeteaki irou bwa N na kona ni kaboi mwiin boong ake I kabanei n te reirei.

Ni kabane bwaai ake a riki, ti tia n noora te Uea ni kawakina Ana berita: “Bubuti, ao ko na anganaki” (3 Nibwaai 27:29). E tia n rangi ni kakakwaki te tataro nakon rikiraken arra utu ao katamaroana. Ti tia n nooria ao n namakinna bwa ngkana ti tannakon te Uea, E kakabwaiaira. Ti ataia kbwa E ataira n arara, ao ti kona ni butiia ibukin bwaai ake ti kainnanoi.