ʻE anga fēfē haʻaku fakahā ange ki haku kaungāmeʻa ʻoku ʻikai taau ʻene ngaahi fasí kae ʻikai mole ai ʻema feohi fakakaumeʻá? ʻOkú ne fakahā maʻu mai pē kiate au kapau ko hono kaungāmeʻa au, he ʻikai ke u lāunga fekauʻaki mo ia. Ko e hā e meʻa ʻoku totonu ke u faí?
Ko e ngaahi fasi mo e ngaahi kaungāmeʻa ʻokú ke feohi mo iá ko ha ivi tākiekina lahi ia ki hoʻo moʻuí. Naʻe pehē ʻe Palesiteni Kōtoni B. Hingikelī (1910–2008): “Fili fakalelei ho ngaahi kaungāmeʻá. Ko kinautolu te nau taki koe ki he tafaʻaki ko ʻeé pe ki hē.”1
ʻE hoko ko ha meʻa lelei kiate kimoua fakatouʻosi ke mo aleaʻi ʻa e ngaahi fasi ʻokú ke fanongo ki ai mo ho kaungāmeʻá. Fakamatalaʻi ange ʻi ha founga fakaʻapaʻapa ʻa e ongo ʻokú ke maʻú ʻo fekauʻaki mo hono mahuʻinga ʻo e mītia ʻoku leleí pea mo e natula fakaʻauha ʻo e mītia ʻoku koví. Vahevahe mo ia ʻa e founga ʻoku taʻofi ai koe ʻe heʻene ngaahi fasi ʻoku saiʻia aí mei hoʻo fiefia kakato fakataha mo iá.
Kapau ʻe kei hoko atu pē ʻo fanongo ki he ngaahi fasi ʻokú ne uesia ʻa e Laumālié, fakakaukau ā ke fetongi ho kaungāmeʻá. ʻOku mahuʻinga e ngaahi kaungāmeʻá, kae ʻoua naʻa mole ai ho tuʻunga lelei fakalaumālié.