O Se Molimau i le Perofeta
“O le mea ua fai atu ai au le Alii, ua ou fai atu ai lava … ; pe fai atu i lo’u lava leo po o le leo o a’u auauna, ua tusa lava ia” (MFF 1:38).
O le taimi tonu lava na uma ai ona ou papatiso ma faamauina [lo’u papatisoga], na fai mai ai lo’u tinamatua, “Ua ia te oe nei le Agaga Paia, ma e taua le i ai o sau molimau i le perofeta.” E le’i umi ae ou alu i le konafesi aoao mo le taimi muamua lava—o le konafesi aoao o Oketopa 1949.
Sa o se mea fou lava. Sa ou moe i le fale o matua o lo’u tamā. Ou te manatua lo’u alapo i le taeao o le Aso Toonai ma ma tietie atu ma lo’u tinamatua i le pasi i le taulaga o le Aai o Sate Leki. Sa ma savavali atu i le Lotoa o le Malumalu ma ma tutu i se laina mo se taimi umi lava. Ina ua ma oo atu i le Tapeneko, sa ma saofafai loa i le tulimanu pito i tua.
Na toe o sina taimi amata le sauniga, na leai ma se pisa ma sa tutu uma i luga tagata. Ona savali mai lea i totonu o Peresitene Siaosi Alapati Samita (1870–1951). Sa mafai ona ou iloa atu Peresitene Samita ma ona fesoasoani. E le’i galo lava ia te a’u ou lagona i le taimi muamua na ou vaai ai i le perofeta. Sa ou lagonaina se lagona na aupito sili ona taua. Na ou iloaina o ia o le perofeta a le Alii.
O se mea aupito taua lena na tupu. Na faapena foi o’u lagona ina ua ou vaai i le Peresitene o le Ekalesia o loo i ai nei. Ua faatolu nei ona ou auauna atu o se Pulega Aoao i Peresitene e toatolu o le Ekalesia. Ma a savali mai le Peresitene i totonu, e i ai pea lava ia te a’u lena molimau: “O ia o le perofeta.”
E te le o laitiiti tele mo le mauaina o se molimau o le Peresitene o le Ekalesia o le perofeta a le Alii. Afai e te maua lena molimau a o e laitiiti, o le a avea ma se uunaiga aoga i lou olaga. E mafai ona e iloa o loo i ai se perofeta a le Alii ma e faamanuiaina i tatou pe a tatou faalogo ma le totoa i ana aoaoga.
Ata na tusia e Dan Burr