Seia Tatou Toe Feiloai
Vaai Faalemafaufau i le Tulaga Faatamā
O se vaaiga o ni tagata se toalua o loo tietie uila sa le o se mea e le masani ai, ae o le Aso Sa lenei o o la faatusa faigofie na faamanatu mai ai ia te a’u taimi ua mavae ma tuuina mai ai le to’a i le lumanai.
O le Aso Sa, ma sa matou auai atu ma lo matou aiga i le sauniga o le faapaiaga o le falelotu na faatoa uma ona toe faafou i la matou eria. O ni nai minute a o lei amataina le sauniga faamanatuga, na fai mai ai le peresitene o le siteki ia te a’u, faamolemole ou te tietie atu i le falelotu o la matou uarota, e tolu kilomita le mamao, e aumai se mea sa ia manaomia. Na lava le taimi ou te alu ma ou toe foi mai ai. A o ou mafaufau i lena feau faigofie, na ou maua se aafiaga na pa’i mai ia te a’u faaleagaga—o se faamanatu matagofie o le mea e taua.
Sa na o ni nai pitonuu lava na totoe ou oo loa ina ua ou toe foi atu i le sauniga, sa ou vaaia i o’u luma atu ni uila se lua, o le isi e tele a e o le isi e laitiiti teisi ifo, sa tau fai malolosi le viliina o ia uila. Sa vave lava ona ou iloaina ia le au vili uila. O i laua o ni tagata sa ou masani lelei i ai, o se uo lelei mai la’u uarota ma le atalii o lona atalii. Sa vilivili atu a laua uila i le lotu—e pei ona la faia i Aso Sa uma lava.
A o ou vaavaai atu ia i laua, sa oo mai i lo’u mafaufau se faatusa i se taimi o le lumanai, i le taimi o le a manatua ai e lena tamaitiiti—faapea foi ma lona tama—na tietiegā uila. Sa ou mafaufau faapea, “Oka o se faataitaiga maoae tele o loo faia e lenei tama, oka foi se uunaiga e faavavau o le a i ai i le atalii faapelepele ua tuuina mai e le Atua ia te ia. Sa ou manatunatu e faapea, O lena tamaitiiti e ono tuputupu ae ma teufatuina lena aafiaga, ma atonu foi o le a ia faia pe a avea o ia ma se tamā.”
Ina ua ou oo atu ia i laua, sa oso mai i lo’u mafaufau se faatusa o mea ou te manatua mai lo’u laitiiti e uiga i lo’u lava tamā, o le sa masani ona ia faatietieina a’u i luga o ave o lana uila. O le sootaga vavalalata na atiina ae mai nei ituaiga aafiaga, o se fiafiaga ma e matagofie foi e manatua.
Ina ua ou taunuu atu i le lotu, sa ou faafeiloaia le au tietie uila i se ataata ma maua mai foi se ataata faapena, a o la faaalia le fiafia le leoa i le auai atu i le lotu. I le sauniga perisitua i lena afiafi, sa ou maua ai le avanoa e faailoa atu i lenei uso le faagaeetia na ou maua i le ata o se tulaga faatamā amiotonu na ou vaaia i se taimi na muamua atu. Sa susulu ona foliga, ma atonu sa faateia o ia aua o le mea na ou faamatalaina o se mea lea e masani ona tupu ia te ia.
I le avea ai ma Au Paia o Aso e Gata Ai, ua faamanuiaina i tatou i le vaaia o se ata o le toatele o tamā e pei o lenei tamā o le na lagolagoina le manuia faaleagaga ma faalelagona o a latou fanau. Ma i le avea ai ma ni tamaiti ua faamanuiaina i ni matua faapenei, e mafai ona tatou lagonaina le agaga faafetai loloto mo a latou faataitaiga ma osigataulaga faatauvaa ae o’oo’o. ◼
Ata na saunia e Ruth Sipus