Aisea e Totogi ai Taulaga Anapogi?

O Repeka Alison Titz, o se talavou matua mai Siamani o loo auai nei i le Uarota a Winterthur i Suitiselani, o loo i ai sa na molimau i le anapogi ma faamanuiaga e oo mai i le totogiina o se taulaga anapogi limafoai. Sa ola ae Repeka ma vaai i ona matua e totogi taulaga anapogi, ma ina ua amata ona maua lona lava totogi, sa amata ai foi ona fai lana ia lava foai.

Fai mai o ia, “Sa i ai taimi na mafai ai ona ou totogiina se taulaga anapogi limafoai.” Ma i na taimi sa ia fai mai ai, “Ou te le’i matelaina lava i le tino po o le agaga.” Sa ia faamatala mai o lagona o le fiaai mai le anapogi e vave lava ona te’a ese, ae o faamanuiaga o le fafagaina faaleagaga lea e sau mai le fesoasoani atu i isi e tumau—e faavavau.

Sa taumafai pea Repeka e tuuina atu ma le fiafia se taulaga anapogi. “E le’i i ai lava so’u faafitauli i le foai atu,” o lana tala lea. “Ou te le’i mafaufau foi faapea, ‘E mafai ona ou faaaogaina lenei tupe i se isi mea.’ O taimi uma sa ou mafaufau ai, ‘O le auala lenei e fesoasoani ai i tagata o loo manaomia [le fesoasoani].’”

Na faaopoopo mai se tasi o uo a Repeka o Jessica Schwabe o le Paranesi a Halberstadt i Hannover, Siamani: “O le totogiina o taulaga anapogi e atili anoa ai le anapogi; e atoatoa ai [le anapogi]. O taulaga anapogi o se vaega o le anapogi e le mo i tatou lava ae mo isi, mo tagata o loo manaomia le fesoasoani.”