Savali a le Au Peresitene Sili
Lototele Tautino
O se tasi o faamoemoega o le olaga i le tino, o le faamaonia atu lea i le Atua o le a tatou tausia Ana poloaiga ma e manaomia ai le lototele. Na pasi la tatou suega lena i le lalolagi o agaga. Ae o le tasi vaetolu o au o le lagi na tetee i le fuafuaga ina ia tofotofoina i latou i le olaga faitino lea e i ai le tulaga lamatia latou te ono toilalo ai.
Ae tatou te le’i fananau mai, sa tatou iloa lelei lava le Atua le Tama ma Lona Alo o Iesu Keriso. Sa mafai ona tatou vaai ma faalogo ia i La’ua a o La aoaoina ma faamalosiauina i tatou. O le taimi nei ua i ai se ufimata ua punitia ai o tatou mafaufau ma manatua. O Satani, o le tamā o pepelo uma, e i ai se avanoa na te mafaia ai, aua e tatau lava ona tatou iloa po o ai moni i tatou e ala atu i mata o le faatuatua, ae o o tatou tino e mafai ai ona gauai atu i faaosoosoga faalelalolagi ma vaivaiga faaletino.
O loo i ai ni fesoasoaniga maoae tatou te maua ai le lototele i lenei olaga. O le fesoasoani aupito sili lava o le Togiola a Iesu Keriso. Ona o le mea na Ia faia, ua mafai ai ona fufulueseina agasala i le vai o le papatisoga. E mafai ona tatou faafouina lena faamanuiaga i le taimi tatou te aai ma feinu ai i le faamanatuga i le faatuatua ma se loto salamo.
O le isi fesoasoani o meaalofa faaleagaga. Tatou te maua le Agaga o Keriso pe a tatou fananau mai. O lena mea tatou te maua ai le mana e iloa ai pe o le filifiliga ua i o tatou luma e taitai atu ai i tatou i le ola faavavau. O tusitusiga paia o se taiala mautinoa pe a tatou faitauina faatasi ma le Agaga Paia e avea ma a tatou soa.
O le Agaga Paia e faatagaina i tatou e tuu atu le faafetai ma ole atu mo le fesoasoani i le tatalo, i le manino ma le to’a lea sa tatou olioli faatasi ai ma lo tatou Tama Faalelagi ma lea foi o le a tatou maua pe a tatou toe foi atu ia te Ia. O lena fagatuaga ma le Atua e fesoasoani e tafi ese ai le fefe mai o tatou loto a o galueaiina le faatuatua ma le alofa i le Tama Faalelagi ma Iesu Keriso.
O le perisitua paia e aumaia ia i tatou le lototele i la tatou auaunaga. O ona sauniga tatou te maua ai le malosi e auauna atu ai i fanau a le Atua ma tetee atu ai i faatosinaga a le tiapolo. A Ia valaauina i tatou e auauna atu, e tuuina mai ia i tatou le folafolaga lenei: “Ai foi se talia outou, ou te i ai foi, aua ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou” (MFF 84:88).
Na i ai le mafuaaga na tatau ai ona atuatuvale le Perofeta o Iosefa Samita i le taimi o lana auaunaga. Ae na tuuina mai e le Atua ia te ia le lototele ma lenei faamautinoaga o le faataitaiga a le Matai:
“Afai e tuulafoaiina foi oe i le lua, po o lima o e fasioti, ma le faasalaga o le oti ua tuuina atu ia te oe; afai e tuulafoaiina oe i le sami loloto; afai e taupulepule peau o le sami e faasaga atu ia te oe; afai e avea matagi afa mou fili; afai e faaputuputuina le pogisa o le lagi ma au faatasi elemene uma e puipuia le ala; a e pito atu i mea uma, afai o ivi auvae lava o seoli o le a faamaga tele le gutu e faasaga atu ia te oe, ia e iloa ai lo’u atalii e, e tuuina atu ia te oe le poto masani ona o ia mea uma, ma avea mou lelei.
“Na oo ifo i lalo o mea uma le Atalii o le Tagata. Pe sili ea oe i lo ia?” (MFF 122:7–8).
Ua lava ma totoe mea ua tuuina mai e le Atua ia i tatou e fesoasoani ai e tafi ese le fefe ae aumai le lototele ia i tatou, po o a lava mea tatou te fetaiai i le olaga. A o tatou aapa atu mo Lana fesoasoani, e mafai ona Ia sii a’e i tatou i lena ola faavavau o loo tatou sailia.
Nifae o loo Tusitusi i Papatusi Auro, na saunia e Paul Mann; ata na tusia e Matt Smith