I le Aoao o le Ekalesia

Ua Aoao Tamaitai Talavou Laipiria E Uiga i le Alualu i Luma o le Tagata Lava Ia

Ua aoao e tamaitai talavou o Laipiria, o le tasi ma le isi e uiga i o latou natura paia ma le polokalama o le Alualu i Luma o le Tagata Lava Ia o Tamaitai Talavou, faatasi ai ma sina fesoasoani mai tamaitai talavou i isi itu o le lalolagi, i le taimi o se konafesi faapitoa a Tamaitai Talavou a le itu, ia Aokuso 2009.

Na muamua fai aoaoga ma tapenaga i le tolu masina mo tamaitai talavou, o e nonofo i le Itu o le Motu o Monorovia Laipiria Bushrod, o le Misiona a Siera Leona Freetown. O le autu mo le konafesi o le “Purinisese mo se Aso, Masiofo mo le Faavavau.” Sa tofu paranesi o le itu ma se faatinoga faaleaoaoga o se tulaga faatauaina, ma sa faia se tala faatino puupuu e aoao atu ai se isi tulaga faatauaina, e faamamafa ai pe faapefea e se afafine o le Atua ona taulima isi ma ia lava.

“O nei tamaitai talavou o le lumanai lea o Aferika, o paionia o lo latou atunuu i lenei talalelei matagofie,” o le tala lea a Sister Belinda Wire, o se faifeautalai faamisiona sa auai ma lona toalua o Elder Bill Wire, i le konafesi.

Ina ua uma mafutaga faaleaoaoga, tala, ma isi gaoioiga, sa tauaaoina atu i tamaitai talavou e i latou na taiulu ni tusi na auina mai tamaitai talavou mai isi atunuu eseese, e faasoa mai ai a latou molimau i le talalelei ma le Alualu i Luma o le Tagata Lava ia.

“Na fusia faatasi loto i le salafa o le lalolagi,” na ta’ua ai e Sister Wire. “A o uuina e nei tamaitai talavou ia tusi, sa latou iloaina e talitonu foi na tamaitai talavou [na aumai ai tusi] e faapei ona latou talitonu ai, e faitauina ia tusi lava e tasi, e mulimuli foi i polokalama lava e tasi, o loo taialaina foi i latou e le perofeta e tasi, ma e alofagia foi e le Atua lava e tasi.”

Ua Tauia le Faatuatua i Galapagos

E ui ina toaitiiti, o le Au Paia i Atumotu o Galapagos, i talaatu o le talafatai o Ekuatoa i le Vasa Pasefika, e malolosi i le faatuatua. O le masina o Setema na vaaia ai e le au paia le faamae’aga o le uluai falelotu o atumotu.

O le fale totogi lea sa fai ai muamua lotu a le Paranesi a Atumotu o Galagagos, lea sa ta’ua e tagata o le au paia o le “el Castillo Blanco”, e lē lava lona tele e fai ai sauniga faamanatuga i soo se potu e tasi, o lea sa tatau ai ona tolu ni potu e lolotu ai le au paia i le taimi e tasi.

Ina ua faatoa ulufale atu i le fale fou ia Elder Floyd ma Sister Susan Baum, le ulugalii matutua faamisiona sa tofi atu i atumotu ia, sa fetagisi i la’ua. “Matuai manaia tele,” o le tala lea a Elder Baum. “O le tulaga aupito maualuga na faatino ai le galuega.”

Na manatua e Emma Bastidas le taimi na malaga ai o ia ma lona aiga i le motu autu o Ekuatoa ina ia papatiso ai i le 1985. Sa latou matauina ma lona aiga le faavaeina o le paranesi, ma sa tagi o ia ina ua taunuu atu uluai faifeautalai i atumotu.

“O lea la ua latou fausia se faletapuai e le mamao tele, ua mafai nei ona ou savali i ai,” o le tala lea a Sister Bastidas.

E le gata i le saunia o se falelotu mo si vaega toaitiiti o le Au Paia, a ua aumaia foi e le faletapuai isi faamanuiaga. Na faalogo Leonor Machua e uiga i le falelotu fou a o le a alu i se malaga puupuu i Guayaquil, Ekuatoa. A o i ai o ia i Ekuatoa, sa ia fesili i se tasi e uiga i le fale fou ma le lotu e ona ia. Sa tali atu le tagata e le masani ai o ia i ana fesili ma fautua atu ai, ia faafeiloai ia faifeautalai i le taimi lava e toe foi ai i lona aiga. I ni nai aso mulimuli ane, sa vaai o ia i faifeautalai i faatausiusiuga o se magaala, ma sa ia talia le valaaulia e aoaoina o ia. Na vave ona papatiso Sister Machua ina ua maea le sauniga o le konafesi aoao i le Aso Toonai ia Oketopa 2009, o le uluai tagata lea na papatiso i le vai papatiso o le falelotu fou.

E matuai fou lava le Ekalesia i atumotu. A o lei faavaeina aloaia le paranesi, sa amata ona fai lotu a ni aiga se toafa i le taulaga o Puerto Ayora i le motu o Santa Cruz. I le 1998, sa faatulagaina ai e taitai o le Ekalesia le paranesi i totonu o tuaoi o le Misiona a Guayaquil Ekuatoa Saute ma sa amata ona lolotu le au paia i le motu o San Cristobal a o lei sii atu i le el Castillo Blanco.

O le taimi nei ua tusa ma le 120 le au paia e lolotu i vaiaso taitasi i le falelotu fou i le motu o Santa Cruz.

E ui lava ina laitiiti le paranesi ma mamao ese mai le motu autu, a ua faamanuiaina le Au Paia i Atumotu o Galapagos, o le tala lea a le peresitene o le paranesi o Daniel Calapucha.

“Ou te matuai lē lagonaina lava se mamao ese aua ua ia i matou le taitaiga a lo tatou Tama i le Lagi,” na ia saunoa ai.

Ua Asiasi Tamaiti Kolumipia i le Malumalu

E sili atu ma le toasefulu ma le lua tamaiti mai le Uarota a Fusagasuga, o le Siteki a Soacha Kolumipia, na faaalu so latou aso faapitoa i le Malumalu o Bogotá Kolumipia, e aoao ai le taua o le malumalu.

Ia Novema 2009, sa malaga atu ai le au peresitene o le Peraimeri ma tamaiti Peraimeri e 15 i le malumalu. Sa maua e nei tamaiti le avanoa e feiloai ai ma le peresitene o le malumalu, o Jorge J. Escobar, ma fai atu i ai a latou fesili. Sa aoao e tamaiti le mafuaaga e tatau ai ona latou faatalitali sei atoa lo latou ta’i 12 e ulufale atu ai i le malumalu e faia galuega faalemalumalu sa, pe aisea ua uu ai e le agelu o Moronae i luga o le tumutumu o le malumalu se pu, ma pe aisea foi e tele ai lava ina faasaga i sasae.

I le faaiuga o le gaoioiga, sa fefaasoaai e tamaiti o latou lagona e uiga i le mea sa oo i ai.

Fai mai Maria Fernanda Sanchez, le failautusi o le Peraimeri a le uarota, o se aafiaga faaleagaga. “Sa faapitoa, ma o se aso e le mafai ona galo e le gata ia i latou ae o matou foi o taitai o le Peraimeri,” o lana tala lea.

Sa faapotopoto tamaitai talavou Laipiria ma o latou taitai mo se konafesi faapitoa faaleitu a Tamaitai Talavou i le Alualu i Luma o le Tagata Lava Ia.

Atapu’e mai le faaaloaloga a Bill Wire