O a nisi o auala e mafai ona tatou faaaloalogia ai aso faamanatu o isi ekalesia?

O le faaaloalogia o isi ekalesia o se tasi lea o o tatou talitonuga autu: “Matou te tautino atu e a matou le aia tatau matou te tapuai atu ai i le Atua mamana e tusa ai ma o matou lava loto fuatiaifo, ma matou te tuuina atu foi lea lava aia tatau i tagata uma lava e faitalia i latou, pe faapefea, po o fea, po o le a foi latou te tapuai atu i ai” (Mataupu Faavae o le Faatuatua 1:11).

O aso malolo faalelotu e masani ona aofia ai le faia o se ituaiga tapuaiga. E pei foi ona faamanatuina e tagata o la tatou Ekalesia ia le Kerisimasi ma le Eseta, e faamanatu foi e tagata o isi tapuaiga ia nei aso paia po o isi aso malolo e faamamalu ai se atua faapitoa po o le faamanatuina o se mea na tupu i le talafaasolopito o a latou tapuaiga.

E mafai ona e faaaloalogia aso faamanatu o isi ekalesia e ala i le iloaina o aso e faamanatu ai na aso faapitoa. E mafai ona e faitau e uiga i aso malolo faapitoa a ekalesia ma talanoa i au uo i auala latou te faaali atu ai lo latou alolofa i le Atua i nei aso faapitoa. E le tatau ona e taufaifai i o latou talitonuga, aganuu, po o masani. Faaaloalo i faailoga faalelotu latou te faaaogaina e faamanatu ma tapuai ai.

Afai e valaaulia oe e te auai atu ia latou aso faamanatu, ia e fesili atu ma le faaaloalo mo ni fautuaga i auala e mafai ona e faia ai ma le talafeagai. Atonu o le a latou fiafia i le na o lou oo atu e te matamata i mea latou te faia, pe latou te fautuaina atu foi nisi o gaoioiga e mafai ona e auai ai ma isi gaoioiga e tatau ona e aloese ai. Mo se faataitaiga, afai o se tasi o a latou aganuu faalelotu e feteenai ma ou talitonuga, e pei o le inu uaina, e mafai lava ona e teena ma le faaaloalo lou le auai atu i ai, po o lou inuina foi o se vai. O le tele lava o mea e te ioe i ai ao lei taitai oo i le aso o le fuafuaga, o le tele foi lea o le avanoa e te aloese ai mai le faalumaina.

E mafai ona e faaali atu le faaaloalo i le aoaoina lea o le faiga o tapuaiga a isi, e mafai foi ona e valaauliaina isi e auai atu i le faamanatuina o aso faamanatu o lau ekalesia ina ia mafai ona latou malamalama i ou talitonuga.