Iloaina o le Malamalama o le Talalelei

Saunia e Yulia Phares

Ou te le faapea atu e le’i i ai ni a’u sini ae ou te le’i papatiso e avea ma se tagata o Le Ekalesia a Iesu Keriso o le Au Paia o Aso e Gata Ai. Ae e mafai ona ou faapea atu, sa leai se faasinoala manino o lo’u olaga. O nisi taimi sa ou lagona ai e pei sa ou savali i le pogisa, e le iloa lelei po o fea tonu le itu e agai i ai.

E pei foi o le toatele o isi tagata e ta’i 19-tausaga i Saint Petersburg, Rusia, sa ou faamoemoe e i ai se aso ou te faaipoipo ai, maua se fanau, ona ola fiafia ai lea. Ae, ou te le faapea atu lava na ou iloaina lelei le ala e ausia ai lenei sini—ae maise lava i le vaega o le ola fiafia e faavavau.

Ae na silafia e le Tama Faalelagi. Na Ia silafia a’o lei mafai ona ou maua le fiafia moni, e tatau ona ou tuuina o Ia ma Lona Alo i le totonugalemu o lo’u olaga. Sa amata ona ou aoao i le ala e fai ai lenei mea i se taimi e le’i umi ae atoa lo’u 20 tausaga, ina ua amata ona aoao e faifeautalai lo’u aiga i le auala e maua ai le fiafia e ala i le ola i poloaiga.

Ina ua uma ona matou feiloai ma faifeautalai, sa le’i umi ae ou iloa le mea e tatau ona ou faia. Na ou tatalo ma iloa ai afai ou te manao e ausia sini o lo’u olaga, e manaomia ona ou papatiso e avea ma se tagata o le Ekalesia a Iesu Keriso.

Ina ua uma ona ou papatiso, sa faate’a ese a’u e nisi o a’u uo ma tagata o lo’u aiga o e sa le mafai ona malamalama i le mafuaaga na matuai taua ai ia te a’u le faiga o lenei filifiliga e mulimuli i le fuafuaga a le Tama Faalelagi. E ui lava i lenei mea, ae sa ou fiafia. Na ou iloa, sa Ia faamafanafanaina a’u i le faatagaina lea o a’u ia ou taulimaina ma le filemu nei tofotofoga.

E oo ane i le taimi ua 21 ou tausaga, ua i ai so’u naunautaiga malosi e molimau atu i le moni o le talalelei ma faasoa atu i isi le ala ua suia ai lo’u olaga ona o lo’u filifili e ola i poloaiga, o lea na avea ai au ma se faifeautalai. Sa matagofie le lagona o le faasoa atu i tagata o le mea na tupu i lo’u olaga mai le taimi na ou filifili ai e faamuamua le talalelei.

Ua tumu lo’u olaga i faamanuiaga talu mai lena taimi. O le valu tausaga talu ai, na mafai ai ona ou ulu atu i le malumalu ma ausia ai la’u sini o le faaipoipo. Ae peitai, sa le na ona faaipoipo, ae sa faamauina ai a’u i lo’u toalua mo le faavavau.

I le aluga o nai tausaga talu ai, na faataunuuina ai foi la’u sini o le avea ma se tina. Ua faamanuiaina a’u i ni atalii lelei se toatolu.

E le’i mamao atu, na maua ai e lo matou aiga le avanoa e asiasi atu ai i le tatalaga o le malumalu. A o matou savavali i totonu o le malumalu, na tilotilo mai ia te a’u la’u tama tama e fa tausaga ma fai mai, “Tina, talu ai sa oulua faaipoipo ma Tama i le malumalu, o le a faatasi lo tatou aiga e faavavau.”

Ou te lagona le faamanuiaina ma le lotomaulalo pe a ou mafaufau i le sefulu tausaga ua mavae o lo’u olaga. O loo o’u agai atu i le ausia o la’u sini o le [ola] “fiafia e faavavau,” e faafetaia ai le mea moni e faapea, na liliu atu lo’u olaga i lo’u Tama Faalelagi ma Iesu Keriso. Afai lava ou te tuuina i La’ua i le totonugalemu o lo’u olaga, ou te iloa o le a ou ausia a’u sini. Ou te iloa e alofa le Tama Faalelagi ma le Faaola ia i tatou ma fia fesoasoani mai.