O Se Toe Tepa i le Taimi
O Le Aualofa Anamua
I le 1842 na faapotopoto ai se vaega toaitiiti o tamaitai i Navu, Ilinoi, e faatu se sosaiete suisui e saunia ai ni lavalava mo tagata sa galulue i le faiga o le malumalu. E ui i lea, ina ua fautuaina i latou e le Perofeta o Iosefa Samita, o o latou tiutetauave e le “na o le tuuina atu o se toomaga i e matitiva, ae ia laveai foi i agaga.”1 O lea na afua mai ai le Aualofa.
Na faatulagaina aloaia e Iosefa Samita le Aualofa i le aso 17 o Mati, 1842. O lona faletua o Ema, o le peresitene muamua lea.
Sa vave ona galulue ia tuafafine e fesoasoani ai i tagata sa manaomia le fesoasoani. O tagata fou na faatoa taunuu atu, e aofia ai tagata na malaga mai isi atunuu, sa masani ona manaomia ni meaai, fale, ma lavalava i le taimi na taunuu atu ai. E toatele foi sa mafatia i faigata faaletino, o ma’i, ma le maliliu o tagata o aiga.
E oo atu i le taumafanafana o le 1842, ua matuai faatoateleina le faalapotopotoga o le Aualofa, o lea na le ofi ai i se fale i Navu. O lea na filifili ai tuafafine e fono i se togalaau na latalata ane i le tulaga o le malumalu. I le taumalulu o le 1842–43, sa latou tolopoina ai a latou fonotaga, ae sa asiasi atu lava le “komiti o mea e moomia,” o se teuteuala mo faiaoga asiasi, i le tasi ma le isi.