Mauaina Lelei o le Mafine Faasausili
E tatau ona ou faafetaiaia o ia, ae e faapefea?
Afai e 12 ou tausaga, e matuai faigata lava le olaga. O le maua i le va o le avea ma se tamaitiiti laitiiti ma le avea ma se talavou, e te tauivi ai ia iloa moni po o ai oe. Sa ou i ai i le ogatotonu o lena tauiviga ina ua ta’u mai e o’u matua o le a matou siitia atu i se nuu laitiiti i le isi itu o le mauga. O le o ese atu sa na o ni nai maila le mamao, ae ia te a’u na pei o le tele o le lalolagi le mamao.
Sa ou ola ae i se nuu e lata i le taulaga e 30,000 ona tagata. Sa ou savali i le aoga. O le malae taalo ma le fale autu mo le tupulaga sa na o le tasi le vaifale le mamao mai lo matou fale. Ma sa ou alu i tifaga i Aso Toonai uma lava.
Ae na ese lo matou fale fou. O se nuu maotua e 6,000 ona tagata—ma na fuafua foi e tumau ai lava faapena. E tasi ma le afa maila (2.4 km) le mamao o lo matou fale mai le aoga, ma ou te alu ai i le pasi. O la’u malae taalo o le vaomatua ma mauga e latalata mai i le matou fale. O tifaga i Aso Toonai o le a na o se mea faapitoa mai lea taimi i lea taimi.
Sa le leaga tele foi ia tifaga. Sa ou fia iloa ma fiafia e vaavaai solo mo ni mea fou. Ae sa faigata ia te a’u ona ou faamasani i le aoga. Sa ola faatasi uma isi tamaiti aoga, ae na ese ai lava a’u. O le mea na atili leaga ai, ou te le’i nanaina o’u lagona ootia ma na avea a’u ma se matatia faigofie ona maua e le au fia malolosi.
O se tasi o tagata na sili ona fia malosi na ma faafeagai o Tracy. Atonu na le leaga tele lena mea, sei vagana ai o Tracy o se teine.
Sa ou fetaui muamua i ni alii fia malolosi. A le o lou fetaiai ma i latou, po o le aoao foi e aloese mai ia i latou. Ae na foliga mai e i ai lava Tracy i mea uma: i le fale faafiafia, i le malologa, i a’u vasega. E i ai lana amio lena o le tau faifai lea e te nutililii ai. Ou te faaatu pe a ou vaaia o ia i soo se mea.
Ona sa foliga mai e le mafai ona ou aloese mai ia te ia, o lea na tatau ai ona ou faafetaiaia o ia, ae ou te le’i iloa pe faapefea. O se lauga na ou faalogo i ai i le lotu na suia ai na mea uma. Ou te le manatua po o ai na lauga, ae ou te manatua le mea na ia fai mai ai. Sa saunoa le failauga i le taulimaina o tagata faafitauli. Fai mai o ia, “Afai e te le mafai ona faatoilalo i latou, taumafai ia e matuai alofa ia i latou.” Sa talie le au lotu, ae sa ou mafaufau i ai mo se taimi. Sa iu ina ou filifili i le mea e fai ia Tracy. O le a ou “matuai agalelei atu ia te ia.”
Sa amata ona ou sueina Tracy i le aso na sosoo ai. Ina ua ou vaai ia te ia, sa ou fai atu, “Tracy, e ese lou aulelei.” Sa faateia o ia ma tau memumemu mai se faafetai a o ma fepasia’i i le fale faafiafia. Sa ou faia pea lea mea. O taimi uma lava ou te vaai ai ia te ia, ou te tuuina atu i ai se upu faamalo a o le’i fai mai sana tala. Na iu ina le toe faia mai ni upu faatiga, ma maua ai e lo’u olaga sina toafilemu laitiiti.
O ni nai masina mulimuli ane, na lata ina uma le tausaga aoga. O se tasi o gaoioiga faaiu o se siva i le fale taalo i le taimi o le aoga. Sa ou alu i ai, ae ou te le’i lagona le fia fai atu i se teine ma te sisiva. O le mea moni, ou te le’i fai muamua lava i se teine. Ae na sau se teine ma fai mai ma te sisiva.
Sa ou te’i i lo’u vaai atu o Tracy. Sa ou fai atu ioe, ma sa ma o atu loa i luga o le fola. Ina ua uma le pese, sa ou fai atu, “Faafetai lava,” ona alu ese ai lea o Tracy.
Ou te le’i toe vaai lava ia te ia. Sa siitia atu o ia i se isi nuu i le taumafanafana lena. Ou te faamoemoe o loo faigofie ona masani o ia i lana aoga fou, nai lo le mea na ou i ai. Ae na ou iloaina i lena aso na aoga lava la’u fuafuaga. O le mea na i ai lo’u fili, na ou maua ai se uo.
Ata na tusia e Gregg Thorkelson