E te Talitonu i le Tusi a Mamona?

Sonola Oladapo Solomon, Lagos, Nigeria

O le vaitaimi na ou auai i le Ekalesia, na leai ai sa’u galuega ona o tulaga faigata o le tamaoaiga i Nigeria. Sa ou faapea ua leai so’u olaga, ae sa ou faatuatua pea i le Atua—ma tatalo ma anapogi ina ia fesoasoani mai o Ia i le sueina o se isi a’u galuega.

I totonu o se masina, na faia ai lo’u faatalanoaga i se tasi o kamupani kamuta na vave lona faamanuiaina i Nigeria. Sa matou feiloai ma se vaega e toatolu e faia faatalanoaga: o le faatonu sili, pule sili, ma se faufautua. Sa faigofie ona ou taliina a latou fesili masani, ona togi faafuasei mai lea e le faufautua, o se faifeau o se ekalesia i le lotoifale, se fesili na ou te’i ai: “O oe o se Kerisiano, Mosalemi, po o se Tagata e talitonu i uputuu?” na ia fesili ai.

Sa ou tali atu ma le fiafia, “O a’u o se Kerisiano.”

“O le a le igoa o lau lotu?” sa faaauau ai lana fesili.

Sa ou ta’u atu ia te ia, “O Le Ekalesia a Iesu Keriso o le Au Paia o Aso e Gata Ai.”

“E a! O le lotu lena?” o lana leotele mai lea. “O le uiga o lau tala e te auai i lena lotu, lea e fai faalilolilo uma a latou gaoioiga?” Sa tilotilo sa’o mai o ia i o’u mata ma fai mai, “Fai mai e le sa’o.”

“E sa’o,” sa ou tali vave atu ai. Ona ou faaopoopo atu lea, “E le faia faalilolilo ni a matou sauniga. E mafai ona e susu mai i la matou sauniga i le Aso Sa a sau e te silafia ai.”

“Ou te le fia i ai i se faapotopotoga faapena,” na ia tali mai ai. O le matauina o le itu ua agai i ai le faatalanoaga, na faatonuina ai e le faatonu sili le faufautua e faafetai mai mo lo’u oo atu i le faatalanoaga.

O le tolu o aso mulimuli ane, na talosagaina ai a’u ou te toe foi atu mo se faatalanoaga lona lua. Sa i ai uma foi le faatonu sili, le pule sili, ma le faufautua. Ina ua uma ona matou talanoa e uiga i mea e faatau mai ma le sapalaiina, na fesili mai le faufautua ia te a’u, “O oe o se Mamona?”

“Ioe, o lea lava,” na ou tali atu ai.

“E te talitonu i le Tusi a Mamona?”

“Ioe! Ou te talitonu i ai,” na ou tali atu ai.

“E te talitonu na vaai Iosefa Samita i le Atua le Tama ma Lona Alo o Iesu Keriso, a o avea o ia ma se taulealea e 14 tausaga?”

“Ioe,” na ou tali atu ai. “Ou te iloa e moni.”

I le faaiuga o le faatalanoaga, na ta’u mai ai ia te au e toatele tagata ua uma ona faatalanoaina. O ni nai vaiaso mulimuli ane, i lo’u te’i tele, na ou maua ai se valaau mai le faatonu sili. Na fai mai o ia, ua faamanuiaina au i faatalanoaga e lua, ma fai mai ou te alu atu e saini se tusi o le faafaigaluegaina o a’u.

I lo’u toe tepa i tua i le mea na tupu, ou te faafetai ona ou te le’i teena le Ekalesia po o lo’u faatuatuaga. Na tali mai le Atua i a’u talosaga ma faamanuiaina au i se galuega. Ou te iloa afai tatou te tutumau mausali, o le a Ia faamanuiaina tele i tatou.

“O le uiga o lau tala e te auai i lena lotu?” o le fesili lea a le faufautua ia te a’u.