Aisea e faauuina ai tagata i le suauu pe a latou maua se faamanuiaga faaleperisitua?
E tele ina faatatau atu tusitusiga paia i le faauuga, lea e masani ona i ai faatasi ma le faamaloloina o e mama’i. Mo se faataitaiga, i le Mareko 6:13 tatou te faitau ai “e toatele foi o e na mamai ua latou [Aposetolo] faauuina i le suauu, ma faamaloloina.” Ma i le Iakopo 5:14 tatou te faitau ai: “Ua ma’i ea so outou? ina aami atu ia i toeaina o le ekalesia; ia latou tatalo mo ia, pe a uma ona faauu ia te ia i le suauu i le suafa o le Alii.”
O le faauu o lona uiga o le liligi o le suauu po o le uu i le ulu po o le tino o se tagata. I aso anamua sa faia ai lenei mea ona o ni mafuaaga eseese. O nisi taimi o se faailoga o le talimalo po o teuga masani [o lauao]. O i latou na mama’i pe manunua sa faauuina i le suauu po o le uu e fai ma vailaau. Ae o le faauuina foi sa faia mo mafuaaga paia. Mo se faataitaiga, i le tulafono a Mose sa faaaogaina ai suauu ua uma ona faapaia (tagai Esoto 40:15). Sa faauuina e perofeta ia ositaulaga ma tupu, ae sa faauuina ia tagata mama’i i le suauu o se vaega o le faagasologa o le faamalologa e ala i le faatuatua ma le faaee atu o lima.
I le Ekalesia i aso nei, o le suauu olive ua uma ona faapaiaina (faamanuia e i latou e umia le Perisitua Mekisateko) mo faamoemoega paia e faaaoga mo sauniga paia eseese, e aofia ai le faamanuiaina o e mama’i. “E ui ina e le o maoti mai faapena i tusitusiga paia, ae e mafai ona tatou talitonu ma le mautinoa o le faauuina i le suauu o se vaega o le ekalesia moni ua faaalia mai talu mai le taimi na uluai faailoa mai ai le talalelei i lenei fogaeleele ia Atamu.”1
Aisea e faaaoga ai le suauu olive ae le o isi ituaiga suauu? E le o maoti foi le ta’uina mai o lenei tulaga i tusitusiga paia, e ui o loo faaaoga i faataoto i le Feagaiga Fou le suauu o se faailoga mo le faamalologa ma le malamalama (tagai Mataio 25:1–13; Luka 10:34). E masani ona faaaoga le lala olive o se faailoga o le filemu, ae o le laau olive o loo faaaoga i tusitusiga paia o se faatusa o le aiga o Isaraelu (tagai Iakopo 5). O le suauu olive e mafai foi ona faatusa i le Togiola a le Faaola, aua o le olive oona, pe a faapala, e maua ai le suauu suamalie.
O le faauuina i le suauu sa avea lava ma se vaega o le ekalesia moni ua faaalia mai.