O La’u Miti i le Faatoaga

Taofia le igoa

O le ola ae i se aiga faamaoni ma toaaga o le Au Paia o Aso e Gata Ai, ou te le’i mafaufauina lava o le a i ai se aso e alu ese ai sa’u tama mai le Ekalesia.

Sa ma faaipoipo ma lo’u toalua i le malumalu ma na iu ina ma maua se fanau e toafitu. Sa ma faia mea uma na mafai ona ma faia e usitai ai i fautuaga a perofeta. Sa ma aoaoina le ma fanau i le talalelei, faasoa atu a ma molimau ia i latou, auai faatasi i sauniga i Aso Sa, fai afiafi faaleaiga, tatalo i aso uma i le taeao ma le afiafi, ma faitau tusitusiga paia o se aiga. Ae peitai, e leai se ma gaoioiga, na mafai ona taofia mai lo ma atalii mai le tuua o le Ekalesia.

I lo’u faanoanoa tele na ou liliu atu ai i le Alii mo le malosi ma iu ai ina ou malamalama lelei i le matafaioi a le faitalia i o tatou olaga. Ae sa ou mafaufau lava pea, “O le a se isi mea e mafai ona ou faia? O le mea moni lava e leai se mea e mafai ona ou faia e toe aumai ai o ia i le upumoni.” Sa ou tatalo mo lo ma atalii, ae sa ou lagonaina sa le lava a’u mea sa fai. E moni, ana lava lo’u faatuatua, pe le suia ai ea o ia?

O mafaufauga faapena na feoai solo i lo’u mafaufau a o ou moe i se tasi po. Sa silafia e le Tama Faalelagi e tatau ona tali a’u fesili e ala mai i se miti. O se miti faatauvaa, ae ia te a’u sa o’oo’o lona uiga.

Sa ou miti na ou tutu i le ogatotonu o la’u togalaau o fualaau faisua. Sa ou totoina ma fui ia fatu, ae sa le’i amata ona ola ia laau. I la’u miti sa ou fai atu ai i a’u laau e ola. Sa ou tauanauina i latou e ola! Ona amata lea ona ou ata ia te a’u lava. O le manatu tonu lava lea o le taumafai ia ola a’u laau e ala i le fai atu ia i latou e ola, o se mea faavalevalea tele.

Ona ou ala lea. Sa vave ona ou malamalama i le uiga o la’u miti. O lo’u atalii o le fatu lea sa ou taumafai i ai ia ola. Ae e pei lava ona le mafai ona ou faatonuina ia fatu o le togalaau ia ola, e le mafai foi ona ou suia lo’u atalii. Ua i ai i totonu o fatu taitasi o la’u togalaau ia se gafatia mai le Alii e ola ai, ma o le Atua na te faatonuina le ola ae o fatu taitasi. E faapena foi, ua i ai i lo’u atalii le tomai e ola ai aua o ia o se atalii agaga o le Tama Faalelagi. Ae afai e tatau ona alia’e le tuputupu ae ma suiga i lona olaga, o le taunuuga lena o lona faitalia faatasi ai ma le mana o le Atua.

I totonu o la’u faatoaga i la’u miti, sa ou totoina ai ni fatu, fuiina le togalaau, vele ese vao faasoesa, ma saili i auala uma lava e tausi ai a’u fatu. E faapena foi, i lau matafaioi o se tina, ou te totoina fatu i olaga o la’u fanau. Faatasi ai ma le fesoasoani a le Tama Faalelagi, ou te aoao ai i latou, taumafai ia avea ma se faataitaiga ia i latou, faasoa atu la’u molimau ia i latou, ma alofa ia i latou, ma faia mea uma i lo’u malosi e avea ai ma se meafaigaluega mo le manuia o o latou olaga. Ona tatau lea ona ou faatalitali. I le taimi e tatau ai o le a fesoasoani le Pule o le Togalaau i fatu ina ia ola.

Ae o le taimi lenei, o loo fesoasoani mai o Ia ia ou faatalitali ma le onosai. Na te faatumuina lo’u loto i le faamoemoe. Na te faamanatu mai ia te a’u o loo ou faia mea uma e finagalo o Ia ia ou faia. O loo Ia tuuina mai ia te a’u i aso taitasi le faamaoniga o Lona alofa. Soo se itu lava ou te manaomia ai le fesoasoani, Na te lagolagoina a’u.

O lea o le a ou faatalitali ai, faalagolago i Ana folafolaga, ma faaauau pea ona toto ia fatu. O le a oo mai le seleselega.

Sa ou fai atu i a’u laau e ola. Sa ou tauanauina i latou e ola! Ona amata lea ona ou ata ia te a’u lava.