Talalelei i Lo’u Olaga
Pe a Foliga Mai ua Faaletonu Mea [Uma]
Sa ou taumafai e ola i le talalelei. Ae aisea na tula’i mai ai ni faafitauli ogaoga i lo’u olaga?
Na amata ina ua leiloa la’u Tusi a Mamona na tuuina mai e “la’u” faifeautalai, o Sister High, i le sili atu ma le lima tausaga ua mavae. Na ou iloa lava e mafai ona toe maua se isi a’u tusi, ae o la’u kopi lea sa tumu i a’u lava faailoga ma mau e faatatau i ai. Sa momono ai foi i le va o ona itulau ni upusii taua, o se faamatalaga faagaeetia na aumai i se uo, ma se kopi o lo’u faamanuiaga faapeteriaka. E ui ina sa ou sueina ma saga sueina, ae na le maua lava le tusi. Ou te matua le talitonu lava i lo’u faatamala.
E le’i umi ona tupu lenei mea, ae faamalolo a’u mai se tasi o a’u galuega. Na le toe maua le isi afa o a’u tupe maua. Sa ou folafola atu i o’u matua o le a ou totogia la’u lava aoga i le kolisi. O le a faapefea nei ona faaauau la’u aoga?
Sa ou tausia poloaiga i le mea saili na ou mafaia; ae aisea ua faaletonu ai nei mea? Sa le’i alo ai foi le fai mai o a’u uo i le aoga e uiga i o’u faafitauli ma le le foiaina e le Ekalesia. Sa fai mai se tasi o i latou, “E tatau ona faaitiitia lou alu soo i le lotu. E mafai ona sefe ai lou pasese i le pasi.” Na fai mai le isi, “Aisea e te le malolo ai mai le lotu mo se masina se tasi pe lua foi? Atonu o le a e iloa ai e le tele lava se eseesega e i ai.”
Mo sina taimi, sa foliga mai na sa’o o latou manatu. Sa amata ona ou mafaufau pe o le a lelei atu lo’u olaga e aunoa ma le Ekalesia.
Sa ou toe foi atu i lo’u potu o le nofotumau, lea sa ou vaaia ai se ata o lo’u aiga na pueina i le taimi o le Tausaga Fou a Saina. Sa ou mafaufau i le tele o lo’u alofa ia i latou ma le fiafia latou te aumaia ia te a’u. Ma sa ou mafaufau foi i lo’u Tama Faalelagi, o le ou te alofa i ai ma alofa foi ia te a’u. Sa ou iloa ai atonu, e tatau ona ou taula’i atu i mea ua ou maua nai lo mea ou te le o mauaina. Ae, sa ou mafaufau lava pe o le a faapefea ona ou manumalo mai nei tofotofoga.
E le’i leva, ae ou faailoa atu ai o’u lagona i lo’u faiaoga inisitituti o Sister Ou, o le na faapea mai, “E toatele tagata o le ekalesia na oo i se suiga i le vaitaimi e uma ai le piriota o le ‘o loo lelei mea uma’ i le avea ma se tagata fou liliu mai, ae amata ona feagai ma tofotofoga o le faatuatua. Fai mai le mau, ‘Ae ui i na mea, ua silafia e le Atua ua tatau ona aoai i lona nuu; ioe, na te tofotofoina lo latou onosai ma lo latou faatuatua’ (Mosaea 23:21).”
“O le a la le mea e tatau ona ou faia?” o lau fesili lea.
“Ia suesue ma le filiga atili i tusitusiga paia, ma tatalo faatauanau atili,” o lana tala lea. “E oo mai le faatuatua moni pe a e oo i tofotofoga ma tiga. O le a tuputupu ae lou faatuatua, o le a e alualu i luma, ma o le a faamalosia lau molimau.”
Sa tonu ia te a’u ou te mulimuli i lana fautuaga ma tuu atu lo’u faatuatua i le Atua. Sa ou taumafai e fai e pei ona aoao mai le Alema 38:5, “E pei ona e faalagolago i le Atua, e faapea lava ona laveaiina oe ai ou tofotofoga, ma ou tiga, ma ou puapuaga, e faaeaina foi oe i le aso gataaga.”
Na i’u ina sa ou maua se isi galuega—o se galuega sa sili atu ona lelei nai lo la’u galuega na i ai muamua. Ae na sili atu foi le lelei, sa ou toe mauaina la’u kopi o le Tusi a Mamona.
Ua ou aoaoina o o tatou faanoanoaga, mafatiaga, ma taimi o le faavauvau, e fesoasoani ia i tatou ia tatou tuputupu ae ai. E mafai ona taitaiina atu ai i tatou i le olioli tele pe afai, e pei ona aoaoina ai a’u e Sister Ou, e tuu atu lo tatou faatuatua ma le faalagolago i se Tama Faalelagi agaalofa. Ou te matuai faafetai lava i le i ai o sa’u molimau ua saga faamaonia ai e moni le Ekalesia ma le talalelei.
Ata na tusia e Steve Kropp
Na mavae atu le piriota o le avea ma se tagata fou o le Ekalesia, ma sa ou feagai ma le tofotofoina o lo’u faatuatua. O le mea e lelei ai, na fesoasoani lo’u faiaoga o le inisitituti ia ou iloa le olioli o loo i luma atu.