Sa Latou Saunoa Mai ia i Matou
Ia Lē Faalagolago i le Malosi o le Tino
Mai se saunoaga i le faauuga a le Iunivesite o Polika Iaga i le aso 23 o Aperila, 2009.
E ui ina faapea ua outou atamamai i mea o le lalolagi, ae ia aua ne’i galo le mana o le Atua.
I le faatomuaga o le Mataupu Faavae ma Feagaiga, ua tatou aoao ai i le tele o tapulaa o le malosi o le tino: “O le a oo mai mea vaivai a le lalolagi ma lepetia i lalo mea sili ma le malosi, ina ia le faatonuina e le tagata lona uso a tagata, pe faalagolago i le malosi o le tino” (MFF 1:19). Ina ia toe faaupuina lena lapataiga: e ui ina faapea ua outou atamamai i mea o le lalolagi, ae ia aua ne’i galo le mana o le Atua.
Sa matou aoaoina ma a’u uo i le aoga faafomai lena lesona i se auala e le mafaagaloina i le sili atu ma le 30 tausaga ua mavae. Sa tupu lo matou aafiaga i le taulaga laitiiti o Manzanillo, i le talafatai i sisifo o Mekisiko. O le tausaga o le 1978. Sa matou auai ma tagata o le matou vasega faauu o le tausaga 1947, faapea ai ma o matou taitoalua, i se faaaliga o manatu faafomai.
I se tasi afiafi ina ua mae’a ia vasega faasaienitisi, sa faafuasei lava ona ma’i tigaina se tasi o fomai. E aunoa ma se lapataiga, na amata ona alu le tele o le eleele [toto] mai lona laualo. I le matuai tete’i lava, sa matou siomia ai o ia, ma vaai atu i le tafe mai o le toto ola taua mai ia te ia. Sa matou i ai, o fomai atamamai faapitoa i tulaga eseese, e aofia ai fomai tipitipi, fomai e tuuina atu vai moe, ma fomai faapitoa o faama’i o totoga, na tofu uma ma atamai na maua mai i le 30 ma ona tupu tausaga o le poto masani. O le a se mea e mafai ona tatou faia? O le falemai na aupito lata mai sa i Guadalajara, e silia ma le 100 maila maualuluga (160 km) le mamao. O le po foi na tupu ai [lea faalavelave]. E leai ni vaalele e mafai ona feoai. Sa le aoga foi ona tui atu i ai se toto ona o le leai o ni masini e faatino ai. Sa le mafai e o matou atamai ua tuufaatasi ona taofia le alu o le eleele. Sa matuai leai ni a matou mea e faaaoga po o masini manaomia e laveai ai le ola o la matou uo pele.
Sa malamalama lelei la matou uo mafatia, o se tagata faamaoni foi o le Au Paia o Aso e Gata Ai, i lona faafitauli. Faatasi ai ma lona tino ua sesega, sa ia musumusu mai ai se talosaga mo sona faamanuiaga faaleperisitua. E feololo nisi o i matou na i ai na umia le Perisitua Mekisateko. Sa vave ona matou tali atu i lana talosaga. Sa talosagaina a’u ou te faamauina le faauuga. Sa ta’u mai e le Agaga ia te a’u, e faamanuia o ia seia oo lava ina mae’a, o le a uma le alu o le eleele ma o le a soifua pea ma toe foi atu i lona aiga. O lena faamanuiaga sa tuuina atu i le suafa o le Alii.
E oo ane i le taeao na sosoo ai, ua feololo le tulaga o lona gasegase. O le mea e maofa ai, na le toe sau se eleele mai lona laualo. Sa toe foi lava lona toto i le tulaga masani. I nai aso na sosoo ai, sa foi atu ai o ia i lona aiga. Sa matou faatasitasi ma faafetai atu i le Alii mo lenei faamanuiaga sili ona mataina.
O le lesona sa matou aoaoina sa faigofie lava: “Ia e faatuatua ia Ieova ma lou loto atoa; ae aua le faalagolago i lou lava atamai” (Faataoto 3:5). O se aafiaga sa matou vaaitino lava i ai. O le aoaoga faavae, o loo aoao mai pea lava pea i tusitusiga paia,1 ua avea nei ma o matou malamalamaaga mautu.
Uso e ma tuafafine, faamolemole aua nei outou le malamalama i la’u faamatalaga. E moni lava e tatau ona tatou saunia mo le faia o galuega tauaogaina. Ioe, e manaomia lo tatou faia lelei o la tatou galuega, po o le a lava le galuega ua tatou filifilia i le olaga. E tatau ona mafai ona tatou tuuina atu ni auaunaga taua. Ae tatou te le’i maua lena tomai, e manaomia lo tatou aooga. O i tatou, o le a’otauina o se matafaioi faalelotu. O le mea moni lava o le mamalu o le Atua o le poto lea (tagai MFF 93:36).
Ae o le poto o le tagata e gata. Ma o nisi taimi, e pei o le tulaga na matou oo i ai i le nuu maotua o Mekisiko, o le poto tuufaatasi o le toatele o fomai faapitoa, sa le mafai ona faaaogaina i le taimi na sili ona matou manaomia ai. E tatau ona tuu atu lo tatou faatuatuaga i le Alii.
O lena aafiaga i Mekisiko na aoao mai ai foi ia i matou se isi lesona taua. E faatatau i o tatou tulaga taua e tatau ona faamuamua ma taunuuga aupito maualuluga o ni tagata ola. Na matou iloa ai o le taunuuga tupito o se fomai e le o totonu o se falemai. Mo se loia, e le o totonu o se potu faamasino. Mo se pailate avevaalele, e le o totonu o le potu faatautai o se vaalele 747. O matata filifilia a tagata taitoatasi ua na o se auala lea e tau atu i le faaiuga; ae e le o le iuga lea.
O le iuga e tatau ona taumafai i ai outou uma taitoatasi, ia avea lea ma tagata e mafai ona avea ai oe—le ituaiga tagata ua finagalo le Atua e avea ai oe. E i ai le aso o le a mae’a ai lau matata faalegaluega. O le matata sa e galue malosi ai ina ia ausia—o le galuega o le a tausia ai oe ma lou aiga—e i ai le aso e te tuua ai.
Ona e aoaoina ai lea o le lesona maoae lenei: o le ituaiga tagata e avea ai oe, e sili atu le taua nai lo le galuega e te faia e tausi ai oe. A oo i le aso e te tuua ai lenei olaga maaleale, o le ituaiga tagata ua avea ai oe, o le mea lena o le a sili atu ona aoga. O uiga e pei o le “faatuatua, loto mama, poto, le gaoia, onosai, alofa faauso, amioatua, agaalofa, lotomaulalo, [ma le] filiga” (MFF 4:6) o le a fuaina uma i le fua a le Alii.
Ia e fesili ifo ia te oe lava, mai lea taimi i lea taimi i fesili nei: “Pe ua ou sauni ea e feiloai ma lo’u Matai?” “Pe o o’u agavaa ea mo faamanuiaga uma ua Ia teuina mo Ana fanau faamaoni?” “Pe ua ou mauaina ea o’u sauniga o le faaeega paia ma le faamauga i le malumalu?” “Pe o o’u tumau faamaoni i a’u feagaiga?” “Pe o o’u agavaa ea mo le meaalofa silisili i meaalofa uma a le Atua—le meaalofa o le ola faavavau?” (tagai MFF 14:7).
O i latou e faatauaina lo latou faatuatua i le Atua—o i latou e faalagolago ia te Ia—ua tuuina mai i ai lenei folafolaga faaletusi paia: “O lea aua nei vivii se tasi i le tagata, a ia vivii i le Atua. … O i latou ia o le a nonofo ai pea lava faatasi ma le Atua ma lona Keriso e faavavau faavavau lava” (MFF 76:61–62). Talosia ia avea lena ma faamoemoega aupito taua mo i tatou uma taitoatasi.
Ata na saunia e Robert Casey
O le ituaiga tagata e avea ai oe, e sili atu le taua nai lo le galuega e te faia e tausi ai oe. O uiga e pei o le “faatuatua, loto mama, poto, le gaoia, onosai, alofa faauso, amioatua, agaalofa, loto maulalo, [ma le] filiga” o le a fuaina uma i le fua a le Alii.