Tala Faamamai o le Talalelei
O Le Tulafono o le Anapogi
O le tulafono o le anapogi o se tulafono atoatoa, ma e le mafai ona tatou amata latalata atu i le atoatoa sei iloga e fai lea tulafono ma se vaega o o tatou olaga.
O se tasi o tulafono e sili ona le amanaiaina ae peitai ua sili ona manaomia mo lenei tupulaga lē mautonu i se lalolagi faaonaponei ua saoasoa ma ua tumu i mea faasoesa, o le tulafono o le anapogi. O le anapogi ma le tatalo na ta’ua e faapea e toetoe lava o se gaoioiga e tasi e tulaga ese mai lava i aso anamua. Sa anapogi ma tatalo le augatupulaga a Atamu, e pei foi o Mose i Sinai ([tagai] Teuteronome 9:9–11). …
… Ina ua mavae le asiasi atu o le Matai … i le Itulagi i Sisifo, sa faatonuina tagata ina ia faaauau pea i le “anapogi ma le tatalo, ma ia faapotopoto soo e tatalo ma faalogologo i le afioga a le Atua” (4 Nifae 1:12). Sa matuai atoatoa ma faamaoni tagata i le usitaia o Ana poloaiga “ua oo foi ina leai se finauga i le nuu uma, i le laueleele atoa; a ua faia e le au soo o Iesu vavega tetele” (4 Nifae 1:13). Pe le o se mea faagaeetia loto ea le fiafia i se na tulaga i aso nei!
Tatalo ma Anapogi i Aso Nei
Ua toe faamautuina mai Lana tulafono i o tatou aso, aua e ala mai i se perofeta i aso nei … , na Ia fetalai mai ai, “Ou te tuuina atu foi ia te outou le poloaiga ia outou tatalo pea ma anapopogi mai lenei aso e oo atu i le lumanai” [MFF 88:76]. O le fuaiupu o loo sosoo ai na Ia ta’ua ai le aoaoga o le talalelei e toetoe lava o se taunuuga aupito taua o le tatalo ma le faagasologa o le anapogi. I le fetalaiga a le Alii:
“Ou te tuuina atu foi ia te outou le poloaiga ia outou aoao le tasi i le tasi i mataupu o le malo.
“Ia outou aoao atu ma le filifiliga ma o lo’u alofa tunoa o le a mafuta ma outou, ina ia aoaoina atoatoa lelei outou i teori, mataupu autu, mataupu faavae, i le tulafono o le talalelei ma mea uma lava tau le malo o le Atua, e tatau mo outou ona malamalama i ai” (MFF 88:77–78).
E leai se alii po o se tamaitai e faamoemoe e aoao atu mea faaleagaga vagana ua faatonuina ai o ia e lena agaga, aua “o le a tuuina atu foi le Agaga ia te outou i le tatalo i le faatuatua; a e afai tou te le maua le Agaga aua tou te aoao atu.
“Ia outou usiusitai foi i le faia o nei mea uma e pei ona ou poloai atu e uiga i la outou aoao atu, seia oo ina tuuina atu le atoatoa o a’u tusitusiga paia.
“Pe a outou siitia o outou leo ona o le Fesoasoani, o le a outou tautala ma vavalo atu e pei ona ou loto i ai;
“Aua, faauta, e iloa e le Fesoasoani mea uma, ma o molimau atu e uiga i le Tama atoa ma le Atalii” (MFF 42:14–17).
O Se Folafolaga mo Faiaoga Uma
E, talosia ia maua e faiaoga uma le agaga o lenei folafolaga ma maua lenei mafutaga faapaaga ua ofoina mai, lea e mafai ona maua e tagata uma o e auai i le aoaoina atu o le upumoni.
E leai ni faataitaiga e sili atu o le aoao atu i le Agaga nai lo atalii o Mosaea. O loo ta’u mai e le Tusi a Mamona le ala na latou “tutupu malolosi [ai] i le malamalama o le upu moni; aua o i latou o tagata mafaufau lelei, ma ua latou suesueina ma le filifiliga ia tusi paia, ina ia latou iloa ai le afioga a le Atua.
“A e peitai ua le gata i lea, a ua latou tatalo faatauanau, ma ua anapogi; o le mea lea ua i ai ia te i latou le agaga o le perofetaga, ma le agaga o le faaaliga, a latou aoao atu foi, latou te aoao atu i le mana ma le pule mai le Atua” (Alema 17:2–3).
O i ai ea se taitai perisitua po o se taitai ausilali i soo se vaega o lenei Ekalesia, na te le tuuina atu ana mea uma ina ia maua ai se mana faapea, se faamautinoaga faapea? Ia manatua le mea lenei, mai mea uma lava, e tusa ai ma upu a Alema, sa latou tatalo faatauanau ma anapopogi. Tou te silafia, e i ai faamanuiaga faapitoa e mafai ona faataunuuina pe a tatou usitaia se tulafono faapitoa. Ua faamanino mai e le Alii lenei mea e ala i le Perofeta o Iosefa Samita ina ua Ia folafola mai, “Aua o i latou uma o e maua se faamanuiaga mai ia te a’u e ao ina tausia tulafono na atofaina mo lena faamanuiaga atoa ma ona tulaga, e pei ona faatuina a o lei faavaeina le lalolagi” (MFF 132:5).
Ia, e leai se isi faamaninoga sili atu o le tulaga ua tuuina mai e le Alii, ma i lo’u manatu, ua toatele naua matua o le Au Paia o Aso e Gata Ai i aso nei ua taofia i latou lava ma a latou fanau mai se tasi o aafiaga aupito manaia faaleagaga ua tuuina mai e le Tama ia i latou.
O Le Aso Anapogi Faalemasina
E faaopoopo atu i le aafiaga o le anapogi e fai i nisi taimi mo se faamoemoega faapitoa, ua faamoemoe mo tagata taitoatasi o le Ekalesia e faamisi ia ‘aiga [sosoo] e lua i le Aso Sa anapogi ma molimau. …
Ua ta’u mai e nisi o foma’i atamamai e aoga se piriota o le anapogi i nisi taimi mo o tatou tino. O le faamanuiaga numera muamua lena, ma atonu foi e aupito itiiti sona taua. Lona lua, tatou te foai atu le tupe ua sefe mai le misia o ‘aiga [e lua] e fai ma taulaga anapogi e tuuina atu i le epikopo mo le tausiga o i latou e matitiva ma lē tagolima. Ma le lona tolu, tatou te seleseleina se aoga faapitoa faaleagaga lea e leai se isi lava auala e mafai ona oo mai ai ia i tatou. O se faapaiaga o le agaga mo i tatou i aso nei, e pei lava foi ona sa i ai mo nisi o tagata usiusitai na soifua i le 2,000 tausaga ua mavae. Ou te ta’ua faapuupuu le upu mai le Tusi a Mamona: “E ui lava i lea, ua latou anapogi ma tatalo soo, ma ua tauau ina faamaulalo atili ai i latou, ma ua tauau ina mausali atili i le faatuatua ia Keriso, e oo i le faatumuina o latou loto i le olioli, ma ua faamafanafanaina, ioe, e oo i le faamamaina ma le faapaiaina o latou loto, ua oo mai lea faapaiaina ona ua latou tuuina atu o latou loto i le Atua” (Helamana 3:35). Mata e te le manao e tupu lenei mea ia te oe? E te iloa, e mafai!
Na e matauina o loo faapea mai o i latou e faia lenei mea e faatumuina o latou agaga i le “olioli ma le faamafanafanaina”? Ua outou iloa la, e manatu le lautele o le lalolagi, o le anapogi o se taimi mo “ie talatala ma le lefulefu,” o se taimi e i ai le foliga faanoanoa, e pei o se tagata e tatau ona misi alofa i ai. E ese mai i lo lena, ua apoapoai mai le Alii:
“Pe a outou anapopogi, aua ne’i outou mata faanoanoa pei o tagata pepelo; aua ua latou faaleaga o latou mata ina ia iloa e tagata ua latou anapopogi. E moni ou te fai atu ia te outou, ua maua e i Latou lo latou taui.
“A o oe, pe a e anapogi, ia uu lou ulu, ma mulumulu ou mata;
“Ina ia le iloa e tagata ua e anapogi, na o lou Tama o i le mea lilo: o lou Tama foi o loo silasila i le mea lilo, na te avatu faaaliali se taui ia te oe” (Mataio 6:16–18).
Faamanuiaga o le Anapogi
Tatou liliu atu nei loa i le vaega aupito taua o lenei tulafono sili. E oo mai i le taimi nei, e na o vaega lava e faamanuiaina ai i tatou ua tatou talanoaina. O le olioli moni e o mai faatasi ma le faamanuiaina o e matitiva ma lē tagolima. Aua o le faataunuuina o lenei aga matagofie faaKeriso tatou te faatinoina ai le “faatuatua mama ma le faamaoni” e pei ona fai mai ai Iakopo [tagai Iakopo 1:27]. E mafai ea ona e mafaufau i se aga faaKerisiano e sili atu ona lelei pe sili atu ona atoatoa nai lo le “faatuatua mama ma le faamaoni”? Ou te le mafaia.
Na fetalai mai le Alii, e ala ia Mose, e faapea:
“Afai e ia te oe se tagata mativa o sou uso o i ai i se tasi o au aai i lou nuu ua foaiina mai e Ieova lou Atua ia te oe, aua nei e faamaaa atu lou loto, pe uu mau lou lima i lou uso mativa:
“A ia e matua faamafola atu lou lima ia te ia” (Teuteronome 15:7–8).
Ona Ia folafola mai lea i le tagata e limafoai: “E faamanuia ai oe e Ieova lou Atua i au galuega uma, ma mea uma lava e tago i ai ou lima” (Teuteronome 15:10). Na Ia faaiuina: “O le mea lea ou te fai atu ai ia te oe, o loo faapea atu, Ia e matua faamafola atu lou lima i lou uso, i le ua tigaina, ma le ua mativa e ia te oe i lou nuu” (Teuteronome 15:11). …
O Se Tulafono e Faaatoatoa Ai
Ioe, o le tulafono o le anapogi o se tulafono atoatoa, ma e le mafai ona tatou amata oo atu i le atoatoa sei iloga e fai lea tulafono ma se vaega o o tatou olaga. E pule lava oe i le taimi e amata ai ma faauma ai le anapogi, ae mata e le o se mea manaia le faaumaina ma i ai i le faatumutumuga o lou faaleagaga mo le sauniga anapogi ma molimau?
E pule lava foi oe i le aofaiga e te tuuina atu i le epikopo e fai ma foai, ae pe le o se mea faagaeetia loto ea le iloa ua totogi ma le fiafia ma le sa’o lau tupe i le Alii?
O Le Faamalieina e O Mai Faatasi ma le Usiusitai
… Na e matauina ea le loloto o le faamalieina i taimi uma e te usitai ai i le finagalo o le Tama Faalelagi? E leai se mea e tutusa ma le toafilemu o le mafaufau lea e oo mai faatasi i taimi uma o se taui o le usiusitai i le upumoni.
E manaomia e le lalolagi le loto pulea. E mafai ona e maua le loto pulea i le anapogi ma le tatalo. Ua mama’i lo tatou augatupulaga ona o le leai o se loto pulea. O le anapogi ma le tatalo e fesoasoani e musuia ai [i tatou] i lenei uiga taua.
E faalagolago le lumanai o le lalolagi i se toe foi vave i le lotogatasi o aiga. O le anapogi ma le tatalo o le a fesoasoani e faamaonia ai lena lotogatasi. Ua matuai manaomia lava e tagata taitoatasi le taitaiga faalelagi. E leai lava se isi auala e sili atu ona lelei e maua ai. E manaomia e i tatou uma ona faatoilalo i mana o le fili. O ana faatosinaga e le mafaatusalia i le anapogi ma le tatalo. …
… Ou te faaopoopo atu i le molimau a Alema o anamua ina ua ia tautino mai:
“Faauta, ou te molimau atu ia te outou, ua ou iloa ua moni lava nei mea uma ua ou tautala atu ai. Pe ni a fa outou i le ala ua ou iloa ai ua moni nei mea?
“Faauta, ou te fai atu ia te outou, ua faaalia mai ai ia te au e le Agaga Paia o le Atua. Faauta, ua ou anapogi ma tatalo i aso e tele ina ia ou iloa nei mea mo a’u lava. O lenei foi, ua ou iloa mo a’u lava ua moni; aua ua faaalitinoina ia te a’u e le Alii le Atua i Lona Agaga Paia” (Alema 5:45–46). ◼
Faamatalaga O Le Liua o Alema le Itiiti ma Atalii o Mosaea, na saunia e David Linn, mai faaaloaloga a le Falemataaga o Talafaasolopito o le Ekalesia; ata na saunia e Matthew Reier
Agavale, mai luga: ata na saunia e Jerry Garns ma Michael Sandberg; taumatau: ata na saunia e Steve Bunderson