Meaai mo le Vaiaso Atoa

Mariela Torres Meza, San José, Costa Rica

A o latalata mai le faauuga a le aoga maualuga, sa matou faatalitali ma le naunautai ma a’u uo i le siva o le faauuga. Ae ina ua faasilasila mai e le aoga le aso o le siva, sa matuai ou faanoanoa ona o le a faia i le Aso Sa.

“Mariela, e faatasi i le tausaga ona tupu lenei mea!” na fai mai ai se tasi o a’u uo ia te a’u. “E tatau lava ona e alu. Ona le toe misi ai lava lea o sau lotu. Ae o le tasi lea, e tatau ona faamisi le lotu ae alu i le siva.”

Sa ou faamalamalama atu ia te ia e le na o le misi o le lotu—e faatatau i le tuuina atu o se aso i le Alii. Ae a o ou mafaufau i lana tala na fai mai, sa ou mafaufau faapea, “Mata e i ai se afaina tele pe a ou le faamamaluina le Sapati, i le taimi e tasi lenei?” Ma le isi, e le o toe umi ae matou valavala ma a’u uo, ma sa matou tulimatai atu i lenei fuafuaga mo le tele o tausaga. O le siva o le avanoa mulimuli lea mo i matou e fiafia faatasi ai.

A o ou mafaufau i la’u faaiuga, na ou manatua na aoaoina a’u e lo’u tamā o le aso Sapati o le “meaai” lea mo le vaiaso atoa. Mata e tatau ona ou misia ia faamanuiaga faaleagaga ma faaletino ua folafola mai e le Alii i tagata usiusitai? Sa ou fuaina a’u filifiliga, ma ou iloa ai la’u faaiuga e tatau ona fai.

Sa le malamalama a’u uo ina ua ou tau atu i ai la’u faaiuga ou te le alu. I ni nai vaiaso na sosoo ai, sa ou lagonaina ai le le fiafia i taimi uma lava ou te faalogo ai o talanoa se tasi o i latou e uiga i le siva, ae na ou iloaina sa sa’o la’u filifiliga.

Ina ua latalata mai le aso o le siva, na tupu ai se mea e le’i faamoemoeina. Sa i ai ni mafuaaga na tonu ai i le aoga e sui le aso o le siva. Nai lo le faia i le afiafi o le Aso Sa, o le a faia le siva i le afiafi o le Aso Toonai! Sa ou fiafia lava ina ua mafai ona ou alu ma maua se taimi sili ona manaia ma a’u uo. Ae o le mea na faapitoa ai lava lo’u fiafia o le iloaina lea na ou faamamaluina la’u tautinoga e usitai i le Alii.

Ou te faafetai ona sa mafai ona ou auai i le siva, ae na ou iloaina e le o taimi uma e faamanuiaina ai i tatou i auala faapenei. O nisi taimi e tatau ai ona tatou faia ni osigataulaga taua mo le talalelei a Iesu Keriso. Ae na ou aoaoina i lena taimi, ma ua ou iloa i le taimi nei, e faamanuia mai i tatou e le aunoa e se Tama Faalelagi alofa i soo se itu lava pe a tatou usiusitai.

O le faatuina o se mamanu o le usiusitai i le aoga maualuga ua ou maua ai faamanuiaga e tele i le avea ai ma se talavou matua. E pisi tele au fuafuaga faatulagaina i meaaoga o le kolisi, tautinoga i le galuega, ma gaoioiga faaaga fesootai, ae ua ou iloa ou te maua se avanoa e malolo ai mai na galuega i vaiaso taitasi e ala i le tuuto atu o le Aso Sa i le Alii.

Na sa’o lava lo’u tamā: o le Aso Sa o se punavai sili lea o meaai faaleagaga. O le tausia o le Aso Sapati o le a avea pea ma a’u faamuamua ina ia mafai ona faafouina a’u feagaiga, faatumu la’u faatanoa faaleagaga, ma faafou lo’u mafaufau mo le vaiaso e sosoo ai.

“O le tasi lea, e tatau ona faamisi le lotu ae alu i le siva,” na fai mai ai se tasi o a’u uo ia te a’u.