Sa Faaluaina La Matou Taulaga Anapogi

Brooke Mackay, Kalefonia, ISA

A o ma saofafai i le sauniga faamanatuga i le taeao o se tasi Aso Sa, na saunoa mai lo matou epikopo i tagata o la matou uarota e foai atu se taulaga anapogi limafoai. O i maua o se ulugalii e le’i leva ona faaipoipo ma sa ma taumafai lava e faafetaui ma mea tautupe a o faamaea e lo’u toalua ana aoga. Pe le o tagata mauoloa o le uarota e tatau ona faatele a latou taulaga anapogi?

Na folafola mai e le epikopo i tagata o le uarota o le a oo ni vavega i o latou olaga pe a faaluaina a latou taulaga anapogi. E ui i o’u atugaluga, ae na faamautu mai e le Agaga ia te au e moni lana folafolaga.

A o ou tusia le siaki o le ma taulaga anapogi i le vaiaso na sosoo ai sa tetete o’u lima, na ou faaluaina ai le aofai. “O le a ta fiaaai,” o la’u tala lea ia te a’u lava a o ou faamauina le teutusi.

O ni nai aso mulimuli ane a o ou oso atu i totonu o la’u taavale ou te alu i le galuega, na mumu mai le moli lapatai o le taavale mo le suauu. Sa ou utuina i ai le suauu, ae na toe sisina mai i le afi i le saosaoa na ou liligiina ai i totonu. Ina ua ou telefoni atu i le ma enisinia, sa fai mai ou te alu atu sa’o e ave atu le taavale i le fale enisinia. Sa taofiofi lava lo’u tagi, a o ou aveina atu le taavale i ni nai maila i le fale enisinia ma ou faia se tatalo le leoa.

Sa lapatai mai le enisinia atonu o le a tele se galuega e faia i le taavale, ae e tatau lava ona fai. Sa fai mai foi ua toeitiiti oo i le taimi e sui ai le pa’u [timing belt] e ola ai le taavale—o se isi tupe faaalu ma te le gafatia. Sa ou tuua le taavale i le fale enisinia ae ou alu ma le faanoanoa i le galuega.

Mulimuli ane, ina ua telefoni mai le enisinia, sa sagisagi ma fiafia mai o ia. “Ioe ua fiafia o ia,” o o’u mafaufauga ia, “o le a maua ni ana tupe se tele mai ia i ma’ua.”

O le mea moni, na telefoni mai o ia e faasoa mai se tala ofoofogia. A o galue o ia i le ma taavale, sa afe atu sa na uo i lona fale enisinia. Na fesili atu lana uo, lea e faigaluega i se fale taavale e siaki ai ituaiga taavale na i ai la’u taavale, ma fesili atu i le ma enisinia pe o le a lana mea sa fai. Ina ua faamatala atu e le ma enisinia le faafitauli, sa faapea ane lana uo, “Ia, e te iloa na toe valaau mai le kamupani na faia ituaiga taavale na e toe ave atu e toe foia le faafitauli lena. E totogi atoa e le kamupani fai taavale.”

Sa ou le talitonu i ai! Ona faamatala mai lea e le ma enisinia e faapea, ua suauua atoa le afi o le taavale, o lea o le a totogi ai e le kamupani fai taavale le suiga o le pa’u e ola ai le taavale ma isi pa’u!

Na maligi o’u loimata o le agaga faafetai ina ua ou vaaia faamanuiaga na ma maua mai le Alii. Na ou lagona le lofituina i Lona alofa ma ou matamuli ai i le le lava o lo’u faatuatua.

E le faapea ua atoatoa lo’u faatuatua talu mai lenei mea na tupu i nai tausaga ua mavae, ae ua ou iloa e silafia lelei e le Alii o tatou manaoga ma faigata. Ua ou iloa e alofa o Ia ia i tatou ma finagalo e fesoasoani mai. Ua ou iloa foi o le a tofotofoina i tatou e le Tama Faalelagi ma e le o taimi uma e vave tali mai ai i a tatou talosaga e pei ona sa Ia faia i lenei tulaga.

Ae o le mea aupito taua, ua i ai sa’u molimau i faamanuiaga e mafai ona tatou maua e ala i le totogiina o se taulaga anapogi limafoai ma faamanuiaga e maua e isi ona o lo tatou limafoai.

Sa ou utuina i ai le suauu, ae na toe sisina mai i le afi i le saosaoa na ou liligiina ai i totonu. Sa taofiofi lava lo’u tagi, a o ou aveina atu le taavale i le fale enisinia.