I le Kalena
Konafesi Aoao
Aua ne’i galo: o le a faia le sauniga aoao a Tamaitai Talavou i le aso 27 o Mati, ae o le a faia le konafesi aoao i le aso 3 ma le 4 o Aperila.
O le a le konafesi aoao? O se sauniga a le Ekalesia i le lalolagi atoa, e faalua ona tauaofia i le tausaga—i le faaiuga o le vaiaso muamua o Aperila ma Oketopa. Nai lo le auai atu i sauniga masani o le Ekalesia i Aso Sa, e faapotopoto le au paia ina ia maua mai fautuaga mai le perofeta, o ona fesoasoani, Aposetolo e Toasefululua, ma isi taitai o le Ekalesia.
O le konafesi aoao e faia lava i le Aai o Sate Leki, Iuta, ma o taualumaga e faia i ni sauniga se fa e tai lua itula le umi mo tagata uma o le ekalesia ma se sauniga e tasi ma le afa itula mo i latou uma o loo umia le perisitua. O nisi tagata o le Ekalesia e auai atu i le konafesi i le Maota Autu mo Konafesi lea e i ai ni nofoaga e 21,000, ae o le toatele lava latou te maimoaina e ala i se faasalalauga. E i ai nisi o eria e mafai ona maimoa sa’o i le taimi o le konafesi aoao. O isi eria o le a tauaaoina lipine na pueina o ata vitio po o le leo o le konafesi i se taimi e le mamao talu ona maea uluai faasalalauga o le konafesi. Siaki i lou taitai perisitua po o le www.conference.lds.org mo faamatalaga e uiga i taimi ma nofoaga o le faasalalauga.
A maea le konafesi, e mafai ona e faitau ma suesue i savali o le konafesi aoao i lomiga o le Liahona ia Me ma Novema.
O le sauniga aoao a Tamaitai Talavou—o se sauniga a le Ekalesia aoao mo tamaitai talavou o vaitausaga e 12 e oo i le 18, o o latou tina, ma taitai o Tamaitai Talavou—e faia i tausaga taitasi ia Mati, ae o le sauniga aoao a le Aualofa e faia ia Setema. O nei sauniga e lua e faasalalau i le afiafi o le Aso Toonai i le vaiaso i luma mai o le konafesi aoao.