Usa ka Templo para sa Kona
Sa dihang sila si Leroy ug Rose Alip mihukom sa pagsakripisyo sa pag-adto sa templo matag bulan, ang Ginoo mipanalangin kanila labaw pa kaysa ilang kapanguhaan sa pag-adto—ug sa pagdala sa uban kuyog kanila.
Si Leroy Alip naminaw pag-ayo samtang siya gi-set apart sa pag-alagad isip high council sa stake sa Big Island sa Hawaii. Sa panalangin si Brother Alip nasultihan nga siya maakaadto sa isla kon aduna nay templo nga itukod didto ug siya moalagad sa templo. Kini nahitabo niadtong 1984, ug ang templo sa Hawaii anaa lamang sa isla sa Oahu, daghang mga milya kon sakyon og barko o eroplano.
Ang panalangin sa priesthood midasig ni Brother Alip. “Nagtuo ko nga kon kamo hatagan og panalangin, kamo adunay responsibilidad sa pagbuhat kutob sa inyong mahimo aron sa pag-angkon niana nga panalangin,” siya miingon. Busa siya ug ang iyang asawa, nga si Rose, mihukom sa pagtambong sa templo sa Oahu kausa kada bulan.
Sa pagbuhat niini dili sayon. Ang gasto sa pagbiyahe didto kay U.S. $300, dako kaayong kantidad alang sa magtiayon nga may igo lamang gyud nga sweldo ni Brother Alip gikan sa opisina sa gobyerno diin siya nagtrabaho. Ang paagi aron sila makahimo niini nga pagbiyahe mao lamang ang pagkuha gikan sa ilang tinigum. Ila kining gibuhat nga malipayon.
Sulod sa usa ka tuig, bisan pa, sila wala nay kwarta. “Apan ang among mga kasingkasing anaa sa templo,” miingon si Brother Alip. “Kami gustong mopadayon sa pagtambong. Busa kami nag-ampo alang sa panabang.”
Sa wala madugay, si Brother Alip wala magdahum nga makadawat og tanyag isip dugang sa iyang kinitaan pinaagi sa paghatud og mga papel ngadto sa usa ka lokal nga negosyo. Alang niining sayo sa buntag nga paghatud, siya gibayran og duol sa $700 kada bulan. Nga may sobra na nga kwarta sa pagpadayon og adto sa templo, sila si Brother ug Sister Alip giaghat sa paghatag sa sobra ngadto sa ilang kaugalingong espesyal nga pundo para sa templo.
Pagka Hunyo 1986 ang rason alang niadtong pag-aghat nahimong klaro: karon nga nagpuyo sa Kona Hawaii Stake, sila makadala ngadto sa templo og pipila ka mga babaye gikan sa stake kinsa takus apan wala pa makadawat sa ilang mga endowment. Busa kada bulan, ang mga Alip modala og usa ka sister uban kanila ngadto sa Oahu. Matag higayon, ang sister inig-uli mopamatuod sa espirituhanong gahum ug hingpit nga kalipay nga iyang gibati sa pagbuhat sa buluhaton sa templo para sa iyang kaugalingon ug sa uban. Sa wala madugay, ang diwa sa buluhaton sa templo mikatap sa tibuok stake, ug mas daghang mga miyembro misugod sa pagpangita og mga pamaagi sa pagtambong sa templo.
Pinaagi sa kaila ni Brother Alip sa travel industry, siya nakahimo sa paghan-ay og mga diskwento sa plite sa eroplano, plite sa bus, ug bayad sa balay abtanan sa tanang mga miyembro sa stake kinsa ganahan nga moadto. Pagka 1994 labaw sa 100 ka mga miyembro sa Kona stake ang naghimo sa binulang mga pagbiyahe ngadto sa Templo sa Laie Hawaii. Si Brother Alip nagkatawa. Siya mihinumdom, “Ang presidente sa templo nagbinuang nga ang mga Santos sa Kona mao ang nakadaut sa mga karpet tungod daghan kaayo sila sa templo.”
Pagka 1997 si Presidente Gordon B. Hinckley (1910–2008) mipahibalo sa bag-ong direksyon alang sa pagtukod og templo. Ang pagtukod og mas gagmayng mga templo makahimo nga mas daghang mga templo ang matukod. Ang pagkamatinud-anon sa mga Santos sa Big Island gigantihan unom ka bulan ang milabay sa dihang si Presidente Hinckley mipahibalo og usa ka templo para sa Kona. Human sa pagpahinungod sa templo niadtong 2000, si Brother Alip gitawag isip ikaduhang magtatambag sa kapangulohan sa templo. Karon, kompletong miretiro na sa iyang panarbaho apan kompletong miapil sa buluhaton sa Ginoo, siya ang nagdumala sa mga worker kinsa nagtrabaho nga maanindot kanunay ang nataran sa Templo sa Kona Hawaii.
Sila si Brother ug Sister Alip mapasalamaton alang sa mga pamaagi nga ang Langitnong Amahan mipanalangin kanila sa pagbaton sa mga butang nga ilang gikinahanglan aron padayon sa pag-alagad sa uban. Sa ilang unang pag-abut sa Kona, si Brother Alip miingon, “Kami walay luna nga kapuy-an gawas lang sa usa ka gamay nga payag diha sa bungtod alang sa usa ka trabahante sa umahan og kape.” Sila nagpuyo didto sa pipila ka bulan hangtud sila nakaabang og gamay nga balay.
Pipila ka tuig ang milabay, sila aduna nay igong tinigum ug kinitaan sa paghunahuna og mas arang-arang nga balay, apan wala sa ilang nakit-an ang angay para kanila. Usa ka adlaw samtang si Brother Alip nagtrabaho sa nataran sa templo sa Kona, usa ka tigulang nga babaye ang miagi. Siya naghilak. Si Brother Alip milingo-lingo sa iyang ulo. “Siya gipapahawa sa iyang panimalay ug wala nay lugar nga kapaingnan. Sa pipila ka rason, ako siyang giingnan sa pagbisita sa iyang mga apo, ug kon siya mobalik, siya mahimong mopuyo uban kanamo. Ang problema lang, ang balay sa mga Alip igo lamang para kang Brother ug Sister Alip. Busa sila misugod sa pag-ampo—ug matinguhaong nangita og mga pamaagi sa pag-angkon sa mga panalangin nga ilang gikinahanglan.
Sa wala madugay, usa ka tigbaligya og yuta ug balay midapit kanila sa pagkonsiderar sa duha ka andana nga balay nga may unom ka kwarto. Sila ganahan niini, apan sila naghunahuna nga ang balay mas mahal kaysa ilang maabut. Bug-at sa buot, sila mibalibad sa tanyag.
Apan usa ka paagi ang mitumaw. Sulod sa pipila ka mga semana, ang presyo sa balay miubos, ug ang mga Alip nakahibalo nga sila adunay igong kwarta sa pagpalit sa balay. Isip resulta, ang sister nga nanginahanglan aduna nay lugar uban ni Brother ug Sister Alip sa dihang kini mibalik sa Kona, ug ang tulo ka mga anak sa mga Alip, nga nanginahanglan usab sa ilang kaugalingon, nakakaplag og panimalay alang sa ilang pamilya diha sa balay.
“Ang Ginoo miatiman gayud kanamo,” miingon si Brother Alip. “Kon among ipakita nga kami andam sa pagsakripisyo sa among panahon, mga talento, ug mga kapanguhaan alang Kaniya, Siya mobubu ngari kanamo sa Iyang malumong mga kalooy.”
Paghulagway pinaagi ni Steve Kropp; litrato pinaagi ni R. Val Johnson