Bag-ong mga Sumbanan sa Relief Society Mipanalangin sa mga Miyembro
Si Julie B.Beck, kinatibuk-ang presidente sa Relief Society, mianunsyo og bag-o nga mga sumbanan alang sa Relief Society nga mga miting unom ka bulan ang milabay diha sa kinatibuk-ang miting sa Relief Society, ug ang mga resulta mipanalangin sa mga kinabuhi sa mga sister sa tibuok kalibutan.
Ang pagdawat sa bag-o nga mga sumbanan mainiton sa kinatibuk-an, miingon si Sister Beck, nagtudlo nga ang mga miyembro sa tibuok kalibutan makahimo na karon og mga miting sumala sa ilang tinagsa nga mga panginahanglan, nagtugot og labaw nga pag-uyon sa usa ka simbahan nga walay kinutuban diha sa usa ka kultura o dapit.
“Kini nahimo nga usa ka positibo kaayo nga lakang alang sa usa ka tibuok kalibutan nga organisasyon,” miingon si Sister Beck. Nahigugma kami sa mga sister, nagsalig kami sa mga sister, ug nasayud kami nga kon sila naghimo niini nga usa ka butang sa hugot nga pagtuo ug pagkamasulundon, dili sila makabaton og problema niini.
Ang pakigpulong ni Sister Beck, nga giulohan og “Relief Society: Usa ka Sagrado nga Buhat” (Liahona, Nob.2009, 110) kinahanglan nga magsilbi isip ang opisyal nga palisiya kalabut sa mga miting, ug ang mga lider sa Relief Society nga adunay mga pangutana mahitungod sa mga palisiya kinahanglan nga magpakitambag uban sa ilang mga lider sa priesthood.
Kinatibuk-an nga mga Kausaban
Kini gimatuod nga ang mga magtatambag sa Relief Society kinahanglan nga mosunod sa sundanan sa priesthood ug pagatawagon og una o ikaduha nga magtatambag. Ang calling nga kaniadto nailhan og panimalay, pamilya ug personal nga pagpalambo nga lider kinahanglan nga pagatawagon og coordinator sa miting sa Relief Society. Ang sister niini nga calling kinahanglan nga magpadayon sa paghan-ay og mga miting nga himoon sa mga adlaw sa semana (gawas sa Dominggo) ubos sa direksyon sa kapangulohan.
Mga Sumbanan sa Miting sa Relief Society
Sa iyang pakigpulong, si Sister Beck misulti kon unsaon ang gitawag kaniadto og “panimalay, pamilya ug personal nga pagpalambo” karon yano nga pagatawagon og mga miting sa Relief Society.
Gihulagway ni Sister Beck kon unsaon sa presidente sa Relief Society sa pagdumala ang tanan nga mga miting ug pagpakitambag uban sa bishop o presidente sa branch, kinsa nagtugot sa mga plano sa miting.
Ang presidente sa Relief Society kinahanglang magdumala sa mga miting, apan mahimo nga mohangyo sa una o ikaduha nga magtatambag—o magrekomen og usa ka sister diha sa ward o branch nga pagatawagon—nga mahimong coordinator sa mga miting. Bisan og usa ka miyembro sa kapangulohan kinahanglan nga anaa sa tanan nga mga miting.
Ang mga miting sa kinatibuk-an kinahanglan nga pagahimoon binulan, apan sa dili mokubos kausa sa tulo ka bulan, matag higayon gawas sa Dominggo o Lunes sa gabii. Ang bishop o presidente sa branch ug ang presidente sa Relief Society mosusi sa kasubsob sa mga miting, ug ang mga sister kinahanglan nga dili pabation nga obligasyon ang pagtambong sa tanan niini nga mga miting.
Kon magplano og mga miting, ang kapangulohan sa Relief Society kinahanglan nga maghunahuna sa mga isyu sama sa oras, pasalig, bili, kawalay kuyaw, ug ang distansya sa pagbiyahe.
Ang mga miting kinahanglan nga makakab-ot sa “maloloy-on ug praktikal nga mga responsibilidad” sa Relief Society, nagdugang sa hugot nga pagtuo ug personal nga pagkamatarung ug naghunahuna sa espirituhanon ug temporal nga mga panginahanglan sa tagsa-tagsa ug sa pamilya.
Sa pagplano og mga miting ang kapangulohan sa Relief Society kinahanglan nga mohatag og unang pagtagad sa mga hilisgutan nga nagtuman sa mga katuyoan sa Relief Society; ang mga miting makapunting diha sa usa ka hilisgutan o pagabahinon ngadto sa labaw kay sa usa ka klase o kalihokan. Ang mga magtutudlo sa kinatibuk-an mga miyembro sa ward o stake.
“Ang paggamit sa mga miting sa Relief Society sa husto nga paagi modugang sa abilidad sa Relief Society sa pagtrabaho sa gamhanan nga mga paagi uban sa mga lider sa priesthood sa matag ward,” miingon si Sister Beck.