Ang Bili sa usa ka Magtutudlo

Ni Presidente Thomas S. Monson

Gikan sa “Only a Teacher,” Tambuli, Okt.: 1990, 3–8.

Dihay higayon kaniadto tulo ka batang mga lalaki naghisgut kabahin sa ilang mga amahan. Ang usa misulti, “Ang akong papa mas dako kay sa imong papa,” tungod niini ang usa mitubag, “Nan, ang akong papa mas kamao kay sa imong papa.” Ang ikatulo nga bata misagbat, “Ang akong papa usa ka doktor.” Dayon, milingi ngadto sa usa ka bata, misulti siya dala ang pagtamay, “Ug ang imong papa usa lamang ka magtutudlo.”

Adunay usa ka magtutudlo kansang kinabuhi milabaw sa tanan. Nagpakabuhi Siya dili aron alagaran apan aron moalagad, dili aron sa pagdawat apan aron sa paghatag, dili aron sa pagluwas sa Iyang kinabuhi apan sa pagsakripisyo niini alang sa uban. Iyang gihulagway ang gugma nga mas matahum pa kay sa kahigal, ang kakabus nga mas adunahan pa kay sa bahandi. Nanudlo Siya nga may awtoridad ug dili sama sa gibuhat sa mga eskriba. Namulong ako mahitungod sa Gamhanan nga Magtutudlo, gani si Jesukristo, ang Anak sa Dios, ang Manluluwas ug Manunubos sa tanang katawhan.

Sa dihang ang mapahinunguron nga mga magtutudlo misanong sa malumo Niyang imbitasyon nga “Dali pagkat-on kamo kanako,” nahimo silang mga mag-aambit sa Iyang balaan nga gahum.

Kadto ang akong kasinatian isip gamay nga bata nga maanaa ubos sa impluwensya sa ingon niana nga magtutudlo. Sa among klase sa Sunday School mitudlo siya kanamo mahitungod sa Paglalang sa kalibutan, sa Pagkapukan ni Adan, ug sa maulaon nga sakripisyo ni Jesus. Sa iyang klase, siya mitudlo kabahin nila ni Moises, Josue, Pedro, Tomas, Pablo, ug gani ni Kristo. Bisan tuod kami wala makakita kanila, nakakat-on kami sa paghigugma, pagtahud, ug sa pagsunod kanila.

Sa dihang ang batang lalaki nakabati sa mga pagtamay: “Ang akong papa mas dako kay sa imong papa,” “Ang akong papa mas kamao kay sa imong papa,” “Ang akong papa usa ka doktor,” mahimo ra unta siyang motubag, “Ang imong papa tingali mas dako kay sa akong papa; ang imong papa tingali mas kamao kay sa akong papa; ang imong papa tingali usa ka piloto, usa ka enhinyero, o usa ka doktor; apan ang akong papa usa ka magtutudlo.”

Unta ang matag usa kanato angayan kanunay og ingon niana ka sinsero ug talahuron nga pagdayeg!

Ang Pagpangutana og mga Pangutana Nga Adunay Epekto

Ang calling nga lecturer wala sa Simbahan. Ang usa ka lecturer mopaambit lamang og kahibalo. Apan ang usa ka magtutudlo modapit sa mga sakop sa klase sa pagkat-on, og mga bahin pinaagi sa pagtinudloay sa usag-usa. Usa ka siguradong paagi sa paghimo sa usa ka puol nga lecture ngadto sa usa ka makalingaw, puno sa Espiritu nga leksyon mao ang paghatag og epektibong mga pangutana.

Sa inyong pagpangandam sa leksyon, planoha ang mga pangutana nga ikapangutana sa tibuok leksyon. Hunahunaa ang mga pangutana nga gisugyot diha sa manwal. Paghuna-huna og ubang tawo nga tingali makatabang sa inyong klase. Tinguhaa ang Espiritu aron sa pagtabang kaninyo nga mopili og pipila ka mga pangutana alang sa matag mahinungdanong ideya nga gusto ninyong itudlo.
Aron sa pagtabang sa mga sakop sa klase nga makahisgot kon unsay kalabutan sa konsepto sa ebanghelyo diha sa ilang kinabuhi, mahimo kamong mangutana og tulo ka lain-laing matang sa sunod-sunod nga mga pangutana:
- Usa ka pangutana nga matubag og tinuod nga hitabo: “Kinsa ang giingon sa Ginoo nga kinahanglan natong pasayloon?”
- Usa ka pangutana nga matubag pinagi sa paggamit sa baruganan: “Sa unsang paagi nga ang pagpasaylo sa uban makaapekto kanato?”
- Usa ka pangutana nga makaaghat sa pagpaambit og mga kasinatian: “Unsa ang nindot ninyong kasinatian sa pagpasaylo sa uban?”

Ang Wali sa Bukid, ni Carl Heinrich Bloch, gigamit nga may pagtugot sa National Historic Museum sa Frederiksborg sa Hillerød, Denmark, dili pakopyahan