Gipanalanginan ni Mama Taamino

Victor D. Cave, Mga Magasin sa Simbahan

Sa dihang akong nahimamat si Taumatagi Taamino, batan-on pa ako nga misyonaryo nga nag-alagad sa kaugalingon nakong nasud. Usa ka edaran na nga biyuda, si Sister Taamino bako na og gamay tungod sa katigulangon ug sa bug-at nga trabaho, apan kanunay siyang motunol sa iyang kamot sa pag-abi-abi kanako ug sa akong kompanyon ug halokan kaming duha sa among mga aping, kay mao kini ang naandan sa French Polynesia.

Si Sister Taamino luya na, ug hinay nang molakaw ug pinugos, apan giatiman niya ang matag-usa. Iya gayud nga siguroon nga ako ug ang akong kompanyon kanunay nga adunay limpyo nga ikasul-ob. Ang mga bata ganahan nga moduol kaniya tungod kay siya moabi-abi kanila ug maminaw unsay ilang isulti. Nagpuyo siya og yano nga kinabuhi sa balay nga adunay duha ka kwarto nga gilibutan og balas, mga lubi, pamilya ug mga higala. Agi og pagtahud, ang tanan motawag kaniya og “Mama Taamino.”

Ang Mission president sa Tahiti Papeete midestino sa akong kompanyon, nga si Elder Tchan Fat, ug kanako sa pagtabang og andam sa usa ka pundok sa 80 ka Santos a Ulahing mga Adlaw sa pagdawat sa ilang mga endowment ug ma-seal isip pamilya sa pinakaduol nga templo—ang Templo sa Hamilton New Zealand, lima ka oras sa eroplano. Si Mama Taamino nakabiyahe na ngadto sa templo kada tuig sulod na sa unom ka tuig, ug niining tuiga moadto na usab siya. Naghunahuna ko kon unsaon niya sa paghimo ang ingon ka dako og gasto nga biyahe kon ang iyang panginabuhi daginuton kaayo. Paglabay sa unom ka tuig akong nahibaloan ang tubag.

Niadtong 1976, isip presidente sa Papeete Tahiti Stake, kanunay akong mag-inspeksyon sa mga meetinghouse sa stake. Usa ka adlaw sa pagkaudto mihunong ako sa chapel sa Tipaerui. Nianang panahona, aduna pa kami gisuweldohan nga mga custodian, ug didto akong nakit-an si Mama Taamino, nga karon anaa na sa mga 60 ang edad, nga nagtrabaho isip custodian nga itabang sa pagsuporta sa dako niya nga pamilya. Iya akong giabi-abi sa iyang naandan nga “Dali ug kaon,” apan mitubag ko, “Mama Taamino, dili ka na batan-on, ug sa paniudto ang naa ra kanimo usa ka gamay nga piraso sa pan, gamayng lata sa sardinas, ug gamayng botelya sa juice? Wala ka bay igong kinitaan aron makakaon og mas daghan pa kay niini?”

Siya mitubag, “Nagtigum ako alang sa pagbiyahe og usab ngadto sa templo.” Ang akong kasingkasing natandog sa pagdayeg tungod sa iyang ehemplo sa gugma og sakripisyo. Si Mama Taamino nakabiyahe ngadto sa templo sa New Zealand hapit na sa 15 ka higayon—matag tuig hangtud sa pagpahinungod sa Templo sa Papeete Tahiti niadtong Oktubre 1983. Didto sa pagpahinungod misanag siya sa hingpit nga kalipay.

Pagka 1995, niining panahuna isip mission president, nakita na usab nako si Mama Taamino. Mibalik siya og puyo sa isla sa Makemo, dili layo sa iyang yutang natawhan. Karon sa iyang edad nga mga 80, dili na siya makalakaw, apan ang mga kunot sa iyang nawong nagpahayag og kalinaw, pailub, ug lawom nga panabut sa kinabuhi og sa ebanghelyo. Anaa gihapon kaniya ang matahum nga pahiyum, ug ang iyang mga mata nagpakita og tiunay nga gugma.

Sayo sa pagkasunod nga buntag siya akong nakita nga naglingkod sa usa sa mga kabulakan sa meetinghouse, nga naglimpyo ug nangibut og sagbut. Usa sa iyang mga anak mipas-an kaniya didto. Pagkahuman niya sa usa ka dapit, mogamit siya sa iyang mga kamot og mga bukton aron mobalhin sa laing dapit. Kini mao ang iyang paagi sa pagpadayon og serbisyo sa Ginoo.

Sa usa ka hapon na kaayo sa dihang nagpahigayon ako og interbyu sa rekomend sa templo, si Mama Taamino gidala ngadto sa dapit diin ako naglingkod sa landong sa kahoy duol sa chapel. Gusto niyang makuha ang higayon sa pagtubag sa matag pangutana nga gikinahanglan sa rekomend sa templo.

“President, dili na ako makaadto sa templo,” siya miingon. “Tigulang na ako og masakiton, apan kanunay akong gusto nga adunay rekomend sa templo.”

Akong makita kon unsa ka dako ang iyang tinguha nga makabalik sa templo, ug nasayud ako nga ang iyang pangandoy dawaton sa Dios. Sa wala madugay human niadto, gibiyaan niya ang yutan-on niyang lawas aron motipon niadtong iyang gialagaran sa kamatinud-anon didto sa balay sa Ginoo. Siya walay nadala gawas sa iyang hugot nga pagtuo, pagpamatuod, kamabination, gugmang putli, ug kaandam nga moserbisyo.

Si Mama Taamino usa ka tinuod nga Polynesian pioneer kansang ehemplo mipanalangin sa daghang mga kaigsoonan—lakip na ako.

Bisan sa edad niya nga 80 si Sister Taamino mitrabaho sa mga kabulakan sa meetinghouse, nga naglimpyo ug nangibut og sagbut. Kini mao ang iyang paagi sa pagpadayon og serbisyo sa Ginoo.