Pagtabang sa Pagpakaon sa mga Karnero sa Manluluwas

Ni Presidente Henry B. Eyring

Unang Magtatambag sa Unang Kapangulohan

Gikan sa usa ka pakigpulong sa Oktubre 1997 nga kinatibuk-ang komperensya.

Ang Manluluwas gilansang ug unya nabanhaw. Ang Iyang mga disipulo miadto sa Galilea. Nangisda sila tibuok gabii, nga walay nakuha. Sa dihang duol na sila sa baybayon, pagka-kaadlawon, sa sinugdanan wala sila makaila Kaniya. Gitawag Niya sila, nagsulti kanila kon asa iitsa ang ilang mga pukot, ug sa dihang ila kining gihimo, ang mga pukot napuno. Nagdali-dali sila aron motimbaya Kaniya didto sa baybayon.

Nakakita sila og hinaling nga mga uling nga may giluto nga isda ug pan. Ug Siya mihatag kanila og kasugoan nga mao gihapon ang sugo alang sa matag usa kanato.

“Ug sa nakapamahaw na sila, si Jesus miingon kang Simon Pedro, Simon, anak ni Jonas, gihigugma mo ba ako labaw pa niini? Siya mitubag kaniya, Oo, Ginoo, nasayud ka nga gihigugma ko ikaw. Siya miingon kaniya, Pakan-a ang akong mga nating karnero” (Juan 21:15).

Ang mga Santos sa Dios kanunay gayud nga ubos sa pakigsaad sa pag-amuma sa usag usa sa espirituhanong paagi, ilabi na niadtong linghod pa sa ebanghelyo.

Ang usa ka bata makahimo sa mga butang nga makaamuma sa hugot nga pagtuo sa uban. Ang mga bata makadapit sa usa ka bag-ong kinabig sa pag-uban kanila sa usa ka miting. Ang mga bata mahimong mopahiyum ug moabi-abi sa usa ka bag-o nga miyembro nga mosulod sa simbahan o nganha sa klase. Ug sa atong pagbuhat niini, ang Espiritu Santo mao ang atong kauban.

Ang matag pulong nga atong ilitok makapalig-on o makapahuyang sa atong pagtuo. Kita nagkinahanglan og tabang gikan sa Espiritu sa pagsulti sa mga pulong nga makaamuma ug makalig-on.

Kita makahimo pinaagi sa yano nga pagsunod makatabang sa Ginoo sa pagdala sa nati nga mga karnero, Iyang nati nga mga karnero, ngadto sa Iyang mga bukton pauli ngadto sa ilang Amahan ug atong Amahan.

Nasayud ako nga si Jesus mao ang Kristo. Nasayud ako nga Siya buhi. Ug nasayud ako nga Siya mogiya kanato niining buluhaton—Iyang buluhaton—sa pagpahinabo sa kinabuhi nga dayon sa mga anak sa Iyang Amahan.

Ang pag-amuma nagpasabut sa pagpakaon.

Pag-atiman sa mga Karnero

Ang mga karnero huyang ug dili makadepensa sa ilang mga kaugalingon. Sila nagkinahanglan og espesyal nga pag-atiman aron sila motubo nga himsug ug kusgan. Tan-awa ang mga litrato sa pipila ka mga butang nga gikinahanglan sa karnero.

Pagkaon

Tubig

Usa ka luwas nga lugar aron makatulgan.

Proteksyon gikan sa mga lobo ug uban pang mga kakuyaw.

Kinsa ang Mga Karnero sa Manluluwas?

Gisugo sa Manluluwas ang Iyang mga disipulo sa paghatag og espesyal nga pag-atiman niadtong mga tawo kinsa dili pa lig-on sa ebanghelyo o bag-ong mga miyembro sa Simbahan. Iyang gitawag kining mga tawhana og “mga karnero.” Sila nagkinahanglan og usa ka tawo aron sa pagtabang kanila aron sila mahimong motubo nga lig-on—lig-on sa ebanghelyo.

Kolori ang mga litrato nga mabuhat sa mga bata aron sa pagtabang sa mga karnero sa Manluluwas. Dayon pag-drowing og usa ka litrato sa usa ka butang nga mahimo ninyong buhaton.

Pag-abi-abi sa usa ka bag-o nga miyembro sa klase.

Pagdapit og usa ka higala sa pagtambong sa Primary.

Pagpakigbahin sa Liahona

Gikan sa wala: Ang Nawala nga Karnero, ni Del Parson; mga litrato sa lobo ug karnero © Getty Images; litrato sa kwadra © Corbis; mga litrato sa pagkaon ug tubig pinaagi ni David Stoker; mga paghulagway pinaagi ni Apryl Stott