Pagpangita ug Pagdawat og Personal nga Pagpadayag

Itudlo kini nga mga kasulatan ug mga kinutlo o, kon gikinahanglan, pagtudlo og lain nga baruganan nga mopanalangin sa mga sister nga inyong bisitahan. Pagpamatuod kabahin sa doktrina. Dapita kadtong inyong gitudloan sa pagpakigbahin unsay ilang gibati ug nakat-unan.

Unsaon man Nako sa Pagpangita og Personal nga Pagpadayag?

“Mangandam kita aron sa pagdawat og personal nga pagpadayag sama sa gibuhat sa mga propteta, pinaagi sa pagtuon sa mga kasulatan, pagpuasa, pag-ampo, ug sa paglig-on sa pagtuo. Ang hugot nga pagtuo mao ang yawe. Hinumdumi ang pagpangandam ni Joseph alang sa Unang Panan-awon:

“‘Kon aduna man kaninyoy nakulangan og kaalam, papangayoa siya sa Dios. …

“‘Hinoon kinahanglan nga mangayo siya uban sa pagtuo, sa walay pagduha-duha.’”¹

Elder Robert D. Hales sa Korum sa Napulog Duha ka mga Apostoles.

“Ang pag-ampo mao ang inyong personal nga yawe ngadto sa langit. Ang kandado anaa sa inyong kilid sa tabil.

“Apan dili kay kana ra. Ngadto sa nagtuo nga ang pagpadayag modagayday lamang bisan kon walay paningkamot, ang Ginoo miingon:

“‘Ikaw wala makasabut; Ikaw nagdahum nga Ako mohatag niini nganha kanimo, samtang ikaw wala maghunahuna gawas sa pagpangutana kanako.

“‘Apan, tan-awa, Ako moingon nganha kanimo, nga ikaw kinahanglan gayud nga magtuon niini diha sa imong hunahuna; unya ikaw kinahanglan nga mangutana kanako kon kini husto, ug kon kini husto Ako mohimo sa imong dughan nga moinit diha sulod kanimo; busa, imong mabati nga kini husto.’”²

Presidente Boyd K. Packer, Presidente sa Korum sa Napulog Duha ka mga Apostoles.

Unsaon man Nako sa Pagdawat og Personal nga Pagpadayag?

“Diha sa mas sinati nga matang, ang pagpadayag o inspirasyon moabut pinaagi sa mga pulong o sa mga panghunahuna nga gisulti diha sa hunahuna (tan-awa sa Enos 1:10; D&P 8:2–3), pinaagi sa kalit nga paglamdag (tan-awa sa D&P 6:14–15), pinaagi sa positibo o negatibo nga mga pagbati mahitungod sa gihunahuna nga pagabuhaton, o bisan gani pinaagi sa madasigong mga pasundayag, sama sa mga pasundayag sa art. Sigun sa giingon ni Presidente Boyd K. Packer, … Presidente sa Korum sa Napulog Duha ka mga Apostoles, ‘Ang inspirasyon moabut nga labaw pa kay sa usa ka pagbati kay sa usa ka tingog.’”³

Elder Dallin H. Oaks sa Korum sa Napulog Duha ka mga Apostoles.

“Ang templo usa ka balay alang sa pagkat-on. Ang mga panudlo nga gipaambit sulod sa templo kadaghanan mga simbolo ug makat-unan pinaagi sa Espiritu. Nagpasabut kini nga kita gitudloan gikan sa kahitas-an. … Ang atong panabut sa kahulugan sa mga ordinansa ug sa mga pakigsaad motubo kon kita mobalik sa templo kanunay dala ang kinaiya sa pagkat-on ug sa pagpamalandong sa mahangturon nga mga kamatuoran nga gipangtudlo. … Atong tagamtamon ang espirituhanon nga kalig-on ug ang pagpadayag nga atong madawat sa atong pag-adto sa templo kanunay.”⁴

Silvia H. Allred, unang matatambag sa kinatibuk-ang kapangulohan sa Relief Society.

Paghulagway sa litrato pinaagi ni Juan Pablo Aragón Armas