Tabang nga Kini Mahitabo

Ni Richard M. Romney

Mga Magasin sa Simbahan

Mao kini ang gipangsulti sa mga batan-ong babaye gikan sa India gumikan sa ilang yano nga proyekto sa pagserbisyo nga nakapahinam sa ilang tibuok branch kabahin sa family home evening.

Ang batan-ong mga babaye sa Chennai Second Branch, Chennai India District, ganahan nga mo-awhag sa mga sakop sa branch sa paghimo og family home evening. Dali ra alang kanila ang paghimo og yano apan praktikal nga ideya. Sila naghimo og mga roleta sa family home evening: mga tsart nga may pampatuyok aron sa pagtimaan sa ilang mga buluhaton sama sa pag-ampo, paghatag og leksyon, ug pag-andam og “lamiang pagkaon.”

Ang mga roleta nga papel yano apan daghan og kolor. Kini gihimo sa usa ka kalihokan sa Young Women diha sa meetinghouse usa ka gabii, ang matag usa gihimong personal pinaagi sa pagbutang og mga litrato sa pamilyang manag-iya niini. Duha sa batan-og mga babaye, nga sila si Sushmitha Santhosh Kumar, 15, ug ang iyang igsoong babaye nga si Sujeetha, 14, naghinam-hinam kaayo sa dihang ilang nasayran isip mga bag-ong mga miyembro sa Simbahan, sila ug ang ilang pamilya makadawat sa una nga roleta.

“Human sa Mutual kami isip grupo miadto sa ilang apartment ug mipresentar sa roleta ngadto sa ilang amahan,” miingon si Daisy Daniel, 16. “Ang tibuok pamilya daw nalipay.” Ang pamilya nag-istoryahanay na kabahin sa family home evening uban sa full-time nga mga misyonaryo, ug ang roleta mihatag kanila og dugang kasayon sa pag-follow up unsa ang ilang nakat-unan.

Ang mga batan-ong babaye mihimo usab og paigong mga roleta aron sa paghatag sa matag pamilya sa mga bata sa Primary sa ilang branch. Dayon sila mihimo og dugang pang mga roleta alang sa mga full-time nga mga misyonaryo aron ipanghatag ngadto sa mga bag-ong nakabig.

“Kadaghanan namo sa branch mga bag-ong miyembro, ug kami dili anad sa paghimo og family home evening,” miingon si Daisy. “Apan aduna akoy pagpamatuod nga ang family home evening makatabang sa mga bata ug sa mga ginikanan aron magkahiusa, ug naglaum ko nga sa matag higayon nga kining mga pamilya makakita sa roleta sa family home evening, sila maghunahuna, ‘OK, ang mga miyembro sa Simbahan nahigugma kanato, ug sila mihatag kanato niining pahinumdum, busa kita mag-family home evening.’” Siya nanagna nga sa dili madugay ang family home evening mahimong matag semana nga kalihokan sa daghang mga tawo sa branch.

Usa ka Maayo nga Serbisyo Modala ngadto sa Lain

Ang mga roleta sa family home evening usa lamang sa pipila ka mga proyekto sa pagserbisyo nga nakompleto niining batan-ong mga babaye. Sa paningkamot sa pagtabang sa usa ka biyuda sa branch nga mobati nga dili kaayo mingaw, ang batan-ong mga babaye miadorno og usa ka basket ug mipuno niini ug mugbo, malipayong sinulat sa kamot nga mga mubong sulat. “Walay usa ang anaa aron sa pag-atiman kaniya,” miingon si Daisy. “Mao nga gusto namong ipahinumdom kaniya nga ang mga sakop sa branch naghunahuna kaniya.” Ang mga batan-ong babaye mismo ang midala sa basket ngadto kaniya ug mipasabut nga siya mahimong mobasa og usa ka mubong sulat matag adlaw aron makapahiyum kaniya.

Ang basket sa mubong mga sulat nakadasig og laing ideya. Ang mga batan-ong babaye mihukom sa pagsulat og pagdayeg ngadto sa usag usa.“Ang matag usa kanamo nagsulat og usa ka nindot nga sulat ngadto sa usa’g usa,” mipasabut si Monisha Kalai Selvam, 13.

Mabuhi ang Family Home Evening!

Pinaagi niini ug sa uban pang mga kalihokan, ang mga batan-ong babaye sa Chennai Second Branch nagkat-on nga bisan ang yanong mga buhat sa pagserbisyo makapaduol sa mga tawo ngadto sa Manluluwas. Siguro ang mga sakop sa branch dugay nga makalimut sa mga roleta sa family home evening tungod kay daghan ang nakadawat niini ug naggamit nang daan niini. Bisan og ang mga roleta temporaryo nga pahinumdom, okey lang sab kini.

“Bisan kinsa makahimo og ilang kaugaling roleta o tsart o yanong molingkod uban sa lapis ug papel ug mohimo og mga plano,” miingon si Daisy. “Kami nasayud gayud nga ang family home evening importante sa matag usa, ug kami gustong motabang nga kini mahitabo.”

Ang mga Kasulatan Makatabang Usab

Ang mga kasulatan usab may dakong kalabutan sa family home evening —pangutan-a lang ang mga batan-ong lalaki sa Chennai Second Branch. Sa dihang sila nakadungog kabahin sa nagtubo nga interes sa family home evening sa ilang branch, sila mihukom sa pagpangita og mga bersikulo sa kasulatan nga mahimong, uban sa giya sa mga ginikanan, magamit sa mga leksyon. Mao kini ang pipila nga ilang girekomendar:

Si Karthikeyan Venkatesan, 18, miingon nga ang Alma 32:21, 28 mao ang talagsaong mga bersikulo alang sa usa ka leksyon kabahin sa hugot nga pagtuo. “Si Alma nagkompara sa pulong sa Dios ngadto sa usa ka binhi, mao nga kini sayon lamang ang paghisgut kabahin sa mga binhi ug sa unsang paagi kini motubo,” siya miingon. “Kini nga bersikulo nakatabang kanako sa pagpalambo sa akong hugot nga pagtuo, mao nga makahimo ako sa pagpamatuod niini ngadto sa uban.”

Ang iyang 16-anyos nga igsoong lalaki, nga si Meganathan, mipakli ngadto sa Alma 36:3, usa ka bersikulo nga nagtudlo kabahin sa pagsalig. “Si Alma miingon nga kon kamo mosalig sa Dios, Siya motabang kaninyo,” miingon si Meganathan. “Kinahanglan nga kita mosalig sa Langitnong Amahan. Walay dili mahimo sa Dios; Siya makatabang kaninyo sa bisan unsang problema.”

Si Daniel Stephen, 15, mibasa sa 3 Nephi 18:20 ug miingon nga kini magamit sa leksyon kabahin sa pag-ampo. “Ganahan ko niining bersikulo tungod kay kini miingon nga bisan unsa ang inyong pangayoon sa Amahan, diha sa pangalan ni Jesukristo, nga matarung lamang, inyo kining madawat. Ayaw pangayo og makadaut o walay pulos nga mga butang; pangayo og makaayo nga mga butang. Kon inyong sundon ang Espritu, kini motabang kaninyo aron makahibalo unsa ang pangayoon.”Ang presidente sa Young Men

Si Bharath Raj Ramesh Babu, 19, miingon nga iyang gamiton ang 1 Nephi 19:9 sa usa ka leksyon kabahin ni Jesukristo. “Kini nga bersikulo miingon nga ang kalibutan mohukom kang Kristo nga walay bili apan Siya magmahigugmaon ug magmainantuson ngadto kanila. Siya nagpakita og gugma ngadto sa tanan, bisan unsa ang ilang gibuhat ngadto Kaniya, ug nagtudlo kanako nga mas mahigugmaon.

Aduna pa, siyempre, daghang mga bersikulo sa kasulatan nga magamit isip bahin sa leksyon sa family home evening. Hisguti kini uban sa inyong pamilya. Unsa nga bersikulo sa kasulatan ang inyong gamiton?

Nakasinati na ba ang inyong pamilya nga adunay talagsaong family home evening nga nakabasi sa kasulatan? Istoryahi kami kabahin niana pinaagi sa [e-mail].

Usa ka Taas nga Prayoridad

“Motambag kami sa mga ginikanan ug mga anak sa paghatag og pinakataas nga prayoridad sa pag-ampo sa pamilya, family home evening, pagtuon ug panudlo sa ebanghelyo, ug maayo nga mga kalingawan sa pamilya. Hinoon ang takus ug uban pang angay nga mga panginahanglan o mga kalihokan mahimo, kinahanglang dili tugutan nga mosakmit sa mga responsibilidad nga balaanong gihatag nga mahimo lamang buhaton sa mga ginikanan ug mga pamilya.”

Sulat sa Unang Kapangulohan, Peb. 11, 1999; tan-awa sa Liahona, Dis. 1999, 1.

Gilitratohan ni Richard M. Romney

Karthikeyan

Meganathan

Daniel

Bharath Raj