Ngadto sa mga Batan-ong Lalaki kabahin sa Pagpakipag-date

Sa Kinatibuk-ang Kapangulohan sa Young Men

Unsa Ang Pagpakig-date?

Mga batan-ong lalaki, ang pagpakig-date mao kon kamo modapit sa usa ka batan-ong babaye sa pag-apil ug sa pakighinabi uban kaninyo sa usa ka giplano nga magtapok-tapok nga kalihokan [social activity].

Ngano ang Pagpakig-date Importante?

Ang pagpakig-date mahimong usa ka talagsaong kasinatian sa pagkat-on alang kaninyo ug sa mga batan-ong babaye nga inyong gi-date. Makakat-on kamo og daghan kabahin sa inyong kaugalingon, ug makapalambo sa inyong pagsabut, pagrespeto, ug pagdayeg sa talagsaon ug bililhong anak nga mga babaye sa Dios.

Daw kini layo pa sa karon, apan ang kaminyoon mao ang usa sa labing importante nga desisyon sa inyong kinabuhi. Ang panahon sa inyong pagkabatan-on dili mao ang panahon sa paghimo niana nga desisyon, apan ang saktong pagpakig-date makatabang kaninyo nga maandam sa paghimo nianang desisyon kon angay na. Ang pagpakig-date mohatag kaninyo og mga oportunidad sa pagpalambo og sosyal nga mga kahanas nga makatabang kaninyo nga mahimong masaligon ug madanihon ngadto sa mga batan-ong babaye nga inyong gika-date. Makasabut unya kamo ug maganahan niadtong mga batasan ug mga kanaiya nga mahimong importante alang kaninyo diha sa mahangturong panag-uban. Ang sakto nga pagpakig-date makatabang usab kaninyo nga mahimong angay ug andam sa pagminyo sa templo alang sa panahon karon ug hangtud sa kahangturan sa sakto nga tawo sa sakto nga panahon.

Kining tanan makatabang sa inyong pagtagamtam sa usa sa labing dako nga panalangin sa kinabuhi: usa ka malipayon ug malampusong kaminyoon.

Unsa Ang Mga Saktong Sumbanan sa Pagpakig-date?

Ang mga propeta sa Ginoo nagtambag kaninyo nga dili makig-date hangtud dili kamo mag-edad og 16. Kon kamo magsugod sa pagpakig-date, i-date lamang kadtong adunay taas og mga sumbanan ug kansang pagpakig-uban makatabang sa pagsunod sa inyong mga sumbanan. Kanunay nga moapil sa limpyo nga mga kalihokan nga motugot kaninyo ug sa inyong gi-date sa pagpabilin og respeto sa kauglingon ug sa pagpabiling duol sa Espiritu sa Ginoo. Importante gayud ang pagbaton og limpyong mga panghunahuna ug mga pagbati. Likayi ang pagpakig-relasyon diin ang inistoryahan o linihokan makapainit sa sekswal nga pagbati. Likayi ang pag-date nga kamo rang duha o dugay kaayo nga mamauli. Kamong duha responsable sa pagtabang sa usag usa nga magpabilin sa kabalaan sa priesthood ug sa pagkababaye ug sa pagprotekta sa kahalangdon ug hiyas sa usag usa. Kanunay nga magmabination ug magrespeto sa mga batan-ong babaye kon kamo mohangyo o modawat og usa ka date ug sa tanan ninyong mga kasinatian sa pagpakig-date.

Kon kamo magsugod sa pagpakig-date, uban sa usa o mas daghan pa nga nag-date. Likayi ang pag-uban kanunay sa mao gihapon nga tawo o sa pagpalambo og seryuso nga relasyon sa sayo pa kaayong pangidaron.

Hinumdumi nga magpabiling balanse sa inyong kinabuhi kon kamo makig-date. Kinahanglang dili kamo kanunayng mag-date nga kini hinoon modaut na sa relasyon sa inyong pamilya o makabalda sa inyong pag-eskwela o sa pagpalambo sa inyong mga kahanas ug mga talento. Siguradoha nga ang inyong mga ginikanan nakahimamat ug komportable sa mga batan-ong babaye nga inyong ika-date.

Kami moawhag kaninyo sa pag-apil sa maayong gipangplano nga mga kalihokan sa pagpakig-date nga yano, positibo, barato, ug kanang makatabang kaninyo nga mailhan ang mga batan-ong babaye nga inyong i-date.