Selyadong mga Lubnganan

Ni David L. Frischknecht

Departamento sa Kurikulum

Ang mga mahimong maangkon sa usa ka pamphlet sa sales daw dili katuohan—daw kataw-anan—apan kini nagpahinumdom kanako og usa ka saad nga garantisadong molungtad sa kahangturan.

Pagkasunod adlaw human sa pagkamatay ni Papa, ang akong inahan, mga igsoong lalaki, igsoong babaye, ug ako kinahanglan nga moadto sa punerarya aron sa pagpakigsabut para sa haya ug lubong. Ang among buluhaton naglakip sa pagpili og lungon ug usa ka lubnganan diin asa ibutang ang lungon.

Samtang naghunahuna kami sa mga kapilian, ako nakabantay og pamphlet sa sales nga nag-promote og usa ka piho nga lubnganan. Kini miingon, labaw sa tanang butang, nga ang lubnganan mosilyo ra sa iyang kaugalingon [self-sealing], ug kini gigarantiyahan nga mosilyo sulod sa 75 ka tuig. Bisan tuod nga ang okasyon usa ka mahinuklugon, ang garantiya nakapahimuot kanako.

“Kinsa man ang motan-aw sa silyo inigka 75 ka tuig?” Naghunahuna ako. “Ug kon adunay usa ka tawo nga mobuhat niini ug mapakyas, si kinsa man ang mokolekta sa garantiya? Unsa ang mga purohan, sa tinuoray,” nahimuot ko, “nianang lubnganan nga magpabiling nakasilyo?”

Nianang mapalandungon nga higayon, naghunahuna ako og laing lubnganan, kadtong gihulagway sa Mateo 27. Kini nga lubnganan, sa tinuoray usa ka lubnganan sa dugay nang panahon ug dapit, adunay lungag nga kaagian nga gitabunan og dakong bato:

“Ug sa pagkasunod nga adlaw, sa ato pa tapus sa adlaw sa pangandam, ang mga sacerdote nga punoan ug ang mga Fariseo nanagtigum sa atubangan ni Pilato,

“Miingon kaniya, Senyor, nahinumdom kami nga kadtong limbongan, sa buhi pa siya nag-ingon, ‘Tapus sa tulo ka adlaw, mabanhaw ako.

“Busa magsugo ka nga ang lubnganan pabantayan pag-ayo hangtud sa ikatulong adlaw, kay tingali unyag adtoon ug kawaton siya sa iyang mga tinun-an, ug unya manugilon sila sa mga tawo nga manag-ingon, nabanhaw Siya gikan sa mga patay: ug ang ulahing limbong molabaw pa unya hinoon kangil-ad kay sa nahauna.

“Si Pilato miingon kanila, pagkuha kamog mga bantay nga sundalo: lumakaw kamo, ug himoa ninyo kini nga malig-on sumala sa inyong mahimo.

“Ug sila nanglakaw, ug ilang gilig-on ang lubnganan pinaagi sa pagtimri sa bato ug pagbutang didtog mga bantay” (Mateo 27:62–66).

Sa tanang mga sugo nga gihatag sukad-sukad sa kasaysayan sa mga hari ug mga heneral ug mga magmamando, ang sugo ni Pilato sa pagbantay og sigurado sa lubnganan mao tingali ang hilabihan ka walay pulus.

Unsa ang purohan nga kadtong lubnganan magpabiling silyado? Sa tinuoray, walay paagi alang sa mga sundalo sa pagtuman niadto nga sugo sama nga walay paagi nga ang lubnganan maablihan: “Tan-awa, miabut ang usa ka dakong linog: kay dihay manolunda sa Ginoo nga mikunsad gikan sa langit, ug miabut ug iyang giligid ang bato” (Mateo 28:2).

Tungod sa pagbukas niadtong usa ka lubnganan, ang tanang mga lubnganan nga gipangsilyohan maablihan. Garantisado.

Ang Bato sa Atong Kaluwasan mao ang atong tigluwas gikan sa kamatayon ug gikan sa impyerno. Siya mao “ang pagkabanhaw, ug ang kinabuhi” (Juan 11:25). Tungod Kaniya “ang impyerno motugyan sa iyang bihag nga mga espiritu, ug ang lubnganan kinahanglan motugyan sa iyang bihag nga mga lawas, ug ang mga lawas ug ang mga espiritu sa mga tawo ipahiuli sa usa ngadto sa usa; ug kini pinaagi sa gahum sa pagkabanhaw sa Usa nga Balaan sa Israel” (2 Nephi 9:12).