Ang Talento ni Taylor

Heather Hall, Utah, USA

Mahimo bang imo kong sultihan unsa ang talento ni Taylor nga akong ikapaambit sa klase?” ang magtutudlo nako sa Primary sa nanag-edad og walo ka tuig nangutana kanako. Nanawag siya sa telepono tungod kay ang klase ni Taylor maghisgot mahitungod sa mga talento nga ilang nadawat gikan sa Langitnong Amahan.

Nablangko ang akong hunahuna. Akong gihuna-huna og balik ang milabay nga walo ka tuig, sa paningkamot nga makahatag og usa ka tubag. Sa edad nga upat si Taylor giatake hinungdan sa grabeng kadaot sa iyang utok ug dili mapugngan nga pagpanggahi. Dili siya makakita, makasulti, o makatabi. Wala na gayud siya’y kalamboam nga molabaw pa sa unom ka tuig nga mentalidad sa usa ka bata. Kadaghanan sa iyang panahon anaa ra siya sa usa ka wheelchair samtang kami moatiman kaniya ug paningkamutan nga makomportable siya.

Mangalipay kami kon siya makat-on sa pagkatawa o sa pag-inom gamit ang espesyal nga baso, ug magmaya kon siya mobarug ug molakang og gamay. Apan samtang kami nanagmaya ug nangalipay, sa sulod kanamo kami nagbakho tungod sa kamatuoran nga kining gamay nga kalampusan malagmit ingon ka makahuluganon nga makab-ot ni bisan kinsa pa nga Taylor. Sa bisan unsang paagi ako wala magtuo nga mao kini ang gustong madungog sa iyang magtutudlo sa Primary.

Akong giigham ang akong tutunlan ug dili komportable nga mitubag, “si Taylor sa tinuod walay mga talento nga akong mahunahunaan.”

Kining mabination nga sister dayon sa hangtud nakausab sa akong relasyon sa akong anak pinaagi sa iyang tubag.

“Sigun sa akong paghunahuna niini nga leksyon, akong nahibaloan nga ang matag anak sa Dios adunay talento,” siya miingon. “Akong isugyot nga ang talento ni Taylor mao nga gitudloan niya ang uban sa pag-alagad. Kon kana OK ra nimo, gusto nakong isulti sa akong klase ang akong nakit-an diri sa Simbahan nga talento ni Taylor. Akong nakita ang ubang mga bata sa Primary nga moduso sa iyang wheelchair, moabli sa pultahan alang kaniya, ug mobuntog sa ilang kahadlok sa pagpahid sa iyang suwang gamit ang panyo kon gikinahanglan. Sa akong pagtuo kana usa ka talagsaon nga talento nga iyang gipanalanginan ang atong kinabuhi.”

Nagbagulbol ako apan miuyon, ug nanamilit kami sa hilom. Ambot lang kaha kon kadto nga magtutudlo sa Primary nahibalo ba kon unsa ka dakong epekto ang nahimo niadto nga panagsultihay sa akong kinabuhi. Si Taylor nagpabilin nga mao lang gihapon. Nagkinahanglan lang gihapon og hilabihan nga pag-amuma. Ang mga ospital, mga doktor, ug mga therapist padayon nga mikuha og dakong bahin sa akong kinabuhi. Apan ang akong panglantaw nausab, ug nasugdan nako ang pagkakita sa iyang talento.

Akong nakita kon sa unsang paagi nga ang mga tawo nga naglibut kanamo nausab dihang nagtinguha sila sa pag-atiman kaniya. Namatikdan usab nako kon sa unsang paagi siya nakapahinumdom kanamo sa paghinay-hinay lang, paghibalo sa iyang mga kinahanglan, ug sa pagkahimong mas manggiloy-on, mabinantayon, ug mapailubon.

Wala ako masayud sa tuyo sa Dios sa paghimo kang Taylor nga magsagubang sa ingon kalisud nga hagit, apan mituo ako nga ang iyang magtutudlo sa Primary mihatag kanako og gamay nga ideya niini. Ania siya aron mopaambit sa iyang talento ngari kanamo. Ania siya dinhi sa paghatag kanamo og opurtunidad sa pagkat-on unsaon sa pagserbisyo.

Akong nakita ang ubang mga bata nga moduso sa iyang wheelchair, moabli sa pultahan alang kaniya, ug mobuntog sa ilang kahadlok,” miingon kanako ang magtutudlo sa Primary sa akong anak nga lalaki.