Paghimo sa Kaminyoon sa Templo nga usa ka Prayoridad
Si Vitaly natawo sa Omsk, Russia, ug si Ekaterina (Katya) Shmakov sa Yekaterinburg, Russia. Silang duha nagpamiyembro sa Ang Simbahan ni Jesukristo sa mgaSantos sa Ulahing mga Adlaw panahon sa ilang kabatan-on, ug silang duha nakaalagad og misyon—Si Vitaly sa Czech Prague Mission ug si Katya sa Russia Novosibirsk Mission. Miingon sila nga ang ilang pag-istoryahanay miabli sa ilang mga hunahuna ngadto sa mga posibilidad sa malipayon, masaligon, malampuson nga kinabuhi, ug ang ilang misyon milig-on sa ilang mga tinguha sa pagmugna og panimalay nga nagsentro sa ebanghelyo, nga nagsugod sa pagminyo sulod sa templo. Kini ang ilang istorya.
Vitaly: Dihang nauli ko gikan sa akong misyon sulod sa pipila ka bulan, gitawag ako nga counselor sa usa ka lokal nga youth conference. Si Steven C. Smith, presidente sa Russia Novosibirsk Mission, mitawag kanako ngadto sa iyang opisina. Nagdahum ako og usa ka bag-o nga calling o usa ka pormal nga interbyu sa pipila ka matang. Hinoon, si Presidente Smith misulti kanako mahitungod sa usa ka tawo nga gusto niya nga akong mahimamat—usa ka batan-ong babaye kinsa bag-ohay lang nakahuman sa iyang misyon ug mipauli sa laing bahin sa Russia apan moanhi sa lungsod alang sa komperensya.
Ako wala pa makakita ni Katya kaniadto, apan sa dihang miabut ako sa komperensya, akong gipaila-ila ang akong kaugalingon, ug kadiyot ra kaming nagkaistorya sulod sa pipila ka minutos. Wala madugay nianang gabhiona akong gihangyo si Katya sa pagpanayaw. Sa pagkasunod nga adlaw lain na usab ang akong gihangyo kaniya.
Katya: Sa akong pagdako, gamay ra ang akong nailhan nga mga batan-on, dili minyo nga mga tighupot sa priesthood, apan kanunay akong nanghinaut nga ang Ginoo mohatag kanako og takus nga batan-ong lalaki nga akong minyoan. Wala akoy ideya kon kanus-a o sa unsang paagi kami magkita, apan aduna akoy pagsalig sa Ginoo ug sa Iyang mga saad.
Human sa akong misyon, gidapit ako nga mo-tsaperon og usa ka youth conference. Sa dihang akong nakita si Vitaly didto sa conference, diha-diha dayon interesado ko nga makaila kaniya. Among gigahin ang pinakanindot ug dili makalimtan nga tulo ka adlaw sa komperensya.
Kusog ang akong pagbati sa sayo pa niadto nga siya ang lalaki nga akong pakaslan. Siyempre, dili tanan ang makasinati og ingon niini nga pagbati sa bag-o lang nga pagpangulitawo. Mao nga unsaon namo sa pagkahibalo nga padulong kami sa husto nga direksyon? Nakakat-on ako didto sa akong misyon unsaon sa pag-ila sa Espiritu ug sa pagsunod sa Iyang direksyon nga walay mga pagduha-duha. Mao nga sa dihang akong gibati ang mga pag-aghat nga kinahanglan nga akong ikaila si Vitaly, mihukom ako sa pagsunod niini.
Nasayud ako nga ang Espiritu mogiya kanatong tanan kon kita magtinguha sa Iyang pagpakig-uban. Importante nga dili nato ikumpara ang kaugalingon natong dalan ngadto sa uban—ang Espiritu dili mogiya kanatong tanan sa managsama gayud nga paagi—apan kon kita nagsunod sa Espiritu, makasalig kita nga husto ang atong dalan alang kanato.
Pagbuntog sa mga Babag
Vitaly: Atol niadtong tulo ka adlaw, akong naamgohan nga nakakaplag ako og usa ka espesyal nga butang. Nasagmuyo ako nga ang komperensya nahuman ug si Katya ug ako magkalagyo. Maayo na lang, bisan pa niana, adunay young single adult komperensya pagkasunod nga bulan. Diha-diha dayon nagsugod ako sa pagpaabut niini.
Kadto nga komperensya usa ka talagsaon sigun sa akong gipanghinaut. Si Katya ug ako migahin og daghang panahon sa pag-ilhanay gayud sa usag-usa. Dihang nahuman na ang kalihokan, naghinatagay kami og mga numero sa telepono ug namauli sa tagsa-tagsa namo nga siyudad.
Sa pagkasunod nga mga semana magkaistoryahay kami kadaghanan pinaagi sa mga tawag sa telepono ug pinaagi sa mga mensahe sa text. (Sa akong pagtuo walay usa ka bulan nakakat-on ako sa pagtext sa akong cell phone nga mas pas-pas pa kay sa ubang tawo nga mo-type sa laptop!)
Si Katya nagpuyo sa Yekaterinburg, nga 11 ka oras ang biyahe sa train gikan sa akong gipuy-an sa Omsk, Siberia. Bisan pa niana, kami gusto na kaayo nga magkita og usab. Gisugdan namo ang regular nga pagbiyahe sa matag katapusan sa semana. Ako ang mobisita kaniya sa katapusan sa usa ka semana, ug sa pipila ka semana nga mosunod, siya na usab ang mobisita kanako. Kon mobisita ko ni Katya, adto ko mopuyo sa among mga higala didto sa ilang lungsod, ug kon siya ang mobisita kanako, mopuyo siya sa among mga higala nga nagpuyo sa among lungsod. Sa kasagaran magpalabay kami sa panahon kauban niini nga mga higala gikan sa simbahan atol sa among mga pagbisita.
Katya: Ang onse ka oras maingon og layo kaayo nga biyahe, apan alang sa Russia, usa na lang gayud kana ka mubo nga lakaw! Tungod sa gilay-on, ang among mga pag-date dili kaayo pirmi sigun sa among gusto. Magkauban lang kami kausa sa pipila ka semana ug mogahin og duha o tulo ka adlaw sa dili pa ang usa mopauli. Sa kasagaran, maingon og nagkinahanglan kami og mas daghang panahon kay sa niana, ug ang pagpanamilit kanunay nga malisud. Apan tungod kay gikinahanglan namo ang ingon nga paningkamot aron magkita sa usag-usa, gipasalamatan namo ang matag minuto nga kami magkauban. Sa dihang ang among relasyon milambo, gisugdan namo ang paglantaw sa usa ka panahon nga kami dili na manamilit sa usag-usa.
Ang among mga date makaikag kaayo og lahi ra: magbisiklita kami ug magsakay og kabayo, magbisita og mga museum, magbasa og mga kasulatan, magluto, maglakaw-lakaw sa mga parke (gani nakasayaw kami sa usa niini), ug moadto sa mga orphanage aron mag-alagad ug makigdula sa mga bata.
Sa matag higayon nga kami magkita, may buhaton kami nga bag-o, mao nga nalingaw kaayo kami. Akong gidayeg kon unsa ka mamugnaon ni Vitaly sa pagplano sa among mga date. Ang mga kalihokan nga iyang giplano nakatabang kaayo kanamo nga magkaila sa usag-usa.
Vitaly: Tungod kay ako nag-eskwela, dili ako makagasto og daghang maanindot nga mga butang. Akong nagasto ang hapit tanan nakong kwarta sa pagbiyahe aron makita si Katya ug sa pagbayad sa akong mga bayranan sa telepono. Apan ang pagkalimitado sa akong badyet wala magpasabut nga ang among pag-date dili madanihon o dili mabungahon. Sa pagkatinuod, ang pipila sa among mga date walay gasto bisan usa ka sentimo.
Daw kataw-anan nga pamation, apan akong gusto nga makit-an kon unsay buhaton ni Katya kauban sa mga bata, mao nga nangadto kami sa orphanage. Maingon niana ang kadaghanan sa among mga date; gipaningkamutan namong mailhan ang matag usa kanamo kutob sa among mahimo.
Ang Pagsunod sa Pamaagi sa Ginoo
Vitaly: Sa Russia, sama sa daghang mga dapit, kinaiya sa mga tawo nga magpuyo-puyo sa dili pa magminyo. Human sa akong pagtanyag kang Katya og kaminyoon, pipila sa akong mga higala nangutana kanako kon unsaon kaha nako sa pagpakasal kaniya nga wala pa masayud kon kami magkauyon ba gayud. Nangatarungan sila sama usab sa gibuhat nila kang Katya, nga ang bugtong paagi aron mailhan gayud kon siya mao ba ang hustong babaye alang kanako mao ang pagpuyo-puyo sulod sa igong panahon.
Giingnan nako sila nga dili kinahanglan nga magpuyo-puyo sa usa ka tawo aron lang makaila kaniya. Gisulayan usab nako sa pagpasabut ang akong mga higala sa paagi nga sila unta makasabut nga ako nag-ampo ug nakadawat og tubag nga kinahanglan kong makigminyo ni Katya. Tungod kay giampo na nako ang akong desisyon, wala akoy pagkahadlok mahitungod sa kinabuhing minyo. Madasigon ako ug akong gibati nga ingon og akong nakita ang usa ka tibuok bag-ong kinabuhi diha sa akong atubangan. Walay bisan usa nga misupak o misaway kanako sa paghupot niini nga baruganan. Sa pagkatinuod, ila akong gisuportahan sa akong desisyon.
Katya: Sa dihang mitanyag si Vitaly og kaminyoon, ang akong mga ginikanan naningkamot sa pagdani kanako sa dili pagminyo. Nagtuo sila nga sayo pa kaayo alang kanamo nga magkasinabut ug ako nagkinahanglan nga mas makaila kang Vitaly kay sa akong nahimo. Ang akong boss sa trabaho miingon kanako sa samang butang ug midugang, “Kinahanglan kamong magpuyo-puyo sa dili pa kamo mohimo og desisyon nga ingon niana.”
Naguol ako nga ang mga tawo mibati sa ingon niana nga paagi mahitungod sa kaminyoon ug sa pamilya. Wala ako maghunahuna nga sila makasabut kon unsa ka malipayon ang mga magtiayon kon sila maminyo ug makasal sa templo. Ang dakong gugma og kalipay nga gibati nako ug ni Vitaly sa among kaminyoon mas nalig-on pa tungod sa kahibalo nga kami gi-seal hangtud sa kahangturan.
Vitaly: Si Katya ug ako nakasal sa Omsk niadtong Pebrero 25, 2006. (Ang mga balaod sa Russia nanginahanglan og sibil nga kaminyoon sa dili pa ma-seal sa templo, sama sa ubang mga nasud.) Sa pagkasunod nga buntag mibiyahe kami ngadto sa Templo sa Stockholm Sweden. Misakay kami og eroplano didto sa Omsk ug tulo ka oras sa eroplano padulong sa Moscow, diin didto namo gigahin ang nahibiling mga adlaw. Dayon misakay kami sa panggabii nga tren padulong sa Saint Petersburg. Sa among pag-abut nanakay kami og bus kauban sa ubang mga miyembro sa Simbahan ug mibiyahe sulod sa upat ka oras ngadto sa Helsinki, Finland. Ang katapusan nga bahin sa among biyahe mao ang 11 ka oras nga biyahe sa barko ngadto sa Stockholm.
Sa katapusan, miabut kami sa templo.
Alang sa uban, ang ingon ka layo nga biyahe daw usa ka hagit, apan sa daghang paagi, ang among biyahe tadlas sa Europe nahimong usa ka talagsaon nga honeymoon.
Sa adlaw sa among pag-seal, Marso 1, 2006, usa ka talagsaon nga adlaw—usa ka adlaw sa kalinaw ug kasiguroan. Nasayud ako nga ang tawo kansang kamot akong gigunitan mao ang tawo nga akong ikauban sa kahangturan. Bisan gani ang paghinumdom lamang niini nakahatag kanako og dakong kalipay ug pasalamat ngadto sa Langitnong Amahan nga Iyang gisalig kanako kining usa ka babaye nga mahimo nakong asawa. Akong gibati nga mas duol Kaniya kay sa kaniadto.
Ang Pagpangita og Sama kang Kristo nga mga Kinaiya
Katya: Karon si Vitaly ug ako aduna nay usa ka anak nga batang babaye. Siya talagsaon. Gusto ko nga sa umaabut nga adlaw maminyo siya sa templo, ug ang pinakamaayong ikasuporta nga among ikatanyag kaniya mao ang among mga mahigugmaong panag-uban ug ang pagkaginikanan.
Unta makakaplag siya og usa ka takus nga tighupot sa priesthood kinsa adunay daghang sama kang Kristo nga mga kinaiya. Ang akong pagkakita niana nga mga matang sa kinaiya diha kang Vitaly maoy nakatabang kanako nga mahibalo nga siya ang akong pakaslan.
Unsa ang nakadani kanako kang Vitaly? Siyempre, guwapo siya ug makamao, ug nasayud siya kon unsaon sa pagpangulitawo sa usa ka babaye. Apan dili kini ang pinakauna nga kriterya. Siya aduna niining gusto nakong tawagon og “mga mata sa usa ka disipulo ni Kristo.” Akong gibati ang kahayag nga anaa kaniya. Usa siya ka matarung nga tighupot sa priesthood.
Vitaly: Siyempre, nindot kaayo nga maminyo sa tawo nga nakadani kanimo. Apan kon ang atong pokus mao lamang ang lawasnong mga kinaiya, dili kalikayan nga mapakyas kita sa pinakaimportante nga mga butang—personalidad, espiritwalidad, ug uban pang mga kalidad nga may kalabutan sa molahutay nga kaminyoon.
Nakamatikud ako nga ingon og usa kini ka hagit alang sa mga young adult ang pagpangita og kaparis dinhi sa Simbahan tungod kay walay daghang mga miyembro sa Simbahan dapit sa ilang gipuy-an. Nakasabut ako kanila. Bisan pa niana, nasayud ako nga bisan unsa pa ang atong mga kahimtang, kon mobuhat kita sa atong bahin ug mangandam sa atong kaugalingon aron ma-seal sa templo, ang Langitnong Amahan makahatag og paagi.
Sa wala: Ang mga Shmakov sa adlaw sa ilang pag-seal niadtong 2006; ang ilang biyahe padulong sa Templo sa Stockholm Sweden mikabat og 30 ka oras.
Sa tuo: Karon, ang mga Shmakov aduna nay gamay nga anak nga babaye. Si Katya miingon, “Gusto ko nga sa umaabut nga adlaw maminyo siya sa templo, ug ang pinakamaayong ikasuporta nga among ikatanyag kaniya mao ang among mga mahigugmaong panag-uban ug ang pagkaginikanan.”
Mga litrato sa pamilya sa maayong kabubut-on sa mga Shmakov