Mga Pangutana ug mga Tubag
“Unsaon nako sa pag-angkon og limpyo nga panghunahuna kon ako makakita og daghang dili tarung og sininaan nga nagpalibut kanako?”
Mora og walay na’y dapit karon nga ikaw dili makakita og mga tawo nga dili tarung og sininaan. Dili nimo makontrolar kanunay ang imong mga palibut, apan imong makontrolar ang imong hunahuna.
Kon ikaw makakita og tawo nga dili tarung og sininaan, mahimo kang molingiw dayon o mopahawa sa imong nahimutangan. Kon ang hugaw nga panghunahuna mosulod sa hunahuna, pilia nga dili magpadayon sa paghunahuna niini, hinoon pun-a kini og limpyo nga mga panghunahuna. “Himoa ang hiyas nga modayan-dayan sa inyong mga hunahuna nga walay paghunong; unya … ang Espiritu Santo mao ang inyong kauban sa kanunay” (D&P 121:45–46). Ang pagbaton og limpyo nga panghunahuna makatabang kanimo nga mas malipayon ug makabati sa impluwensya sa Espiritu.
Himoang batasan kanunay ang pagbaton og limpyo nga panghunahuna. Paningkamot nga makauban sa mga tawo kinsa tarung og sininaan, ug likayi ang mga sitwasyon diin ikaw makakita og law-ay nga sinina. Pag-ampo sa Langitnong Amahan sa pagtabang kanimo. Pagmemorya og mga himno o mga kasulatan aron ikaw adunay maayong mga butang nga hunahunaon kon ikaw tintalon. Pagbasa sa mga kasulatan kanunay, ug adto sa templo kon mahimo. Dayon kon ikaw makakita og usa ka tawo kinsa dili tarung og sininaan, ikaw makahunahuna og usa ka butang nga positibo.
Kita Dili Iya sa Kalibutan
Kita kinahanglan nga mahinumdom nga kita anaa sa kalibutan apan dili iya sa kalibutan. Kitang tanan espesyal nga anak nga mga lalaki ug babaye sa atong mahigugmaong Langitnong Amahan. Tungod niini nga rason, ang kaaway mas motintal pa gayud kanato, apan kita kinahanglan nga mas lig-on kaysa tintasyon. Ang kalibutanong mga tawo mahimong magsinina og dili tarung, wala masayud nga ang lawas usa ka sagrado nga templo. Apan ang mga Santos sa Ulahing mga Adlaw aduna niini nga kahibalo. Busa, kita kinahanglan nga magpabilin sa atong kaugalingon nga mahiyason ug putli. Kon ang law-ay nga mga panghunahuna mosulod sa atong mga hunahuna, kita kinahanglang mangayo dayon og tabang gikan sa atong Langitnong Amahan pinaagi sa pag-ampo, kay walay laing tawo ang mas makatabang kanato gawas Kaniya.
Dayana H., edad 19, São Paulo, Brazil
Hangyoa ang Inyong mga Higala sa Pagtabang
Isip nag-inusarang miyembro sa Simbahan sa ikaunom nga ang-ang sa akong eskwelahan, nag-atubang ko og bulgar nga pinulongan, dili tarung og sininaan, ug pagpamugos [pressure] sa pagsunod sa kadaghanan. Apan sa pagsugod sa tuig, akong gipasabut ngadto sa akong mga higala ang akong mga sumbanan ug ako mosunod niini bisan unsa pay mahitabo. Sila nakakat-on sulod sa pipila ka mga buwan kabahin sa akong mga mithi sa Simbahan. Ang imong mga higala motabang kanimo kon imong ipasabut ang imong mga mithi ug mga sumbanan ngadto kanila. Ang mga kinaiya, sininaan, ug pinulongan sa akong mga higala nausab ngadto sa mas maayo. Nakakat-on ako nga kon sila imong tinuod nga mga higala, sila motabang kanimo sa paghunahuna og limpyong mga panghunahuna ug motabang kanimo nga magpabilin sa tul-id ug pig-ot nga dalan.
Celia N., edad 12, Virginia, USA
Ang Pag-ampo Makatabang
Nakita nako samtang nanlimbasug ako sa pagpadayon og limpyo nga mga panghunahuna, ang pag-ampo mao ang tinuod nakong tubag sa pagpadayon og limpyo nga hunahuna ug motugot sa impluwensya sa Espiritu nga mouban kanako bisan asa ako paingon. Ang pag-ampo matag buntag sa Langitnong Amahan aron sa pagtabang kanako nga makaangkon og limpyo nga panghunahuna ug sa paghatag kanako og paggiya sa tibuok adlaw ug sa pagpasalamat Kaniya sa gabii mihatag kanako og mas maayo nga relasyon uban Kaniya ug mitabang kanako nga mapalayo sa dili tarung og sininaan ug magpadayon sa akong mga sumbanan. Ang pag-ampo matag buntag ug gabii makatabang kanimo sa pagdapit sa Espiritu nga makauban kanimo samtang ikaw moatubang sa kalibutanong mga pagsulay. “Kinahanglan magmakanunayon ug dili mausab, sa kanunay puno sa mga maayo nga buhat” (Mosiah 5:15).
Gunnar R., edad 16, Wisconsin, USA
Kita Mga Templo
Kon ang mga tawo sa imong palibut dili tarung og sininaan; ayaw sila sawaya, aron ikaw makaangkon og maayo nga panghunahuna. Himoa nga usa ka ehemplo ngadto kanila pinaagi sa pagpakita kanila nga ikaw nagsunod sa mga sumbanan sa Simbahan. Ug tabangi ang mga tawo pinaagi sa paghigugma ug pagsulti kanila nga ang atong Langitnong Amahan nahigugma kanila ug gusto nga sila limpyo sa moral nga paagi sa mga linihokan ug sa mga hunahuna. Ang pagkaputli mahinungdanon sa atong kaluwasan, tungod kay kita mga templo sa atong Dios.
Maricris B., edad 19, Quezon, Philippines
Pagsunod sa mga Pagtulun-an sa Ebanghelyo
Ako nasayud nga kita makaangkon og limpyo nga mga panghunahuna pinaagi sa pagtuon sa mga kasulatan ug paggamit niining mga pagtulun-an. Kon atong gamiton ang tanang mga mithi nga gitudlo sa simbahan, kon kita mobasa sa Alang sa Kalig-on sa mga Kabatan-onan, ug kon kita moadto sa templo, kita makaangkon og limpyo nga mga panghunahuna.
Jossi O., edad 16, Antioquia, Colombia
Ang Hunahuna Sama sa usa ka Entablado
Ang Isangyaw ang Akong Ebanghelyo adunay seksyon nga naghisgut kabahin sa hiyas. Kini naghisgut nga ang atong hunahuna sama sa usa ka entablado sa usa ka sinehan. Niining entablado, usa lamang ka tawo ang makapasundayag sa usa ka higayon. Kon kita maghunahuna og limpyo, mahiyason nga mga panghunahuna, ang atong hunahuna magpabilin nga nakapokus niining mga panghunahuna, ug ang entablado sa atong mga hunahuna dili mapulihan og hugaw nga mga panghunahuna. Ang hiyas usa ka kinaiya ni Jesukristo nga gisugo nga atong palamboon. Sa simbahan kita nakakat-on nga kita kinahanglan nga maghunahuna og limpyo nga mga butang, apan kon adunay usa ka hugaw nga butang nga motintal kanato, kita makakanta sa atong paboritong himno o maghunahuna sa atong paboritong kasulatan. Ang labing dako nga tabang makita sa 2 Nephi 32:9: “Mag-ampo sa kanunay ug dili mawad-an sa paglaum.”
Elder McEachron, edad 21, Brazil João Pessoa Mission
Hunahunaa ang Uban isip Mga Anak sa Dios
Kontrolaha unsaon nimo pagsanong sa imong nakita. Tungod lamang adunay usa ka butang diha, dili nimo kini kinahanglan nga hunahunaon. Pilia unsa ang imong hunahunaon; pilia nga magpabilin kining limpyo. Likayi nga magtan-aw sa dili tarung og sininaan kutob sa imong mahimo, ug kanunay nga magsinina og tarung. Dayon hunahunaa kadtong imong nakaila isip mga anak sa Dios, nga may balaanong potensyal, gihigugma sa personal nga paagi sa atong Amahan nga anaa sa Langit. Kon akong lantawon ang uban isip mga anak sa Dios, lisud kini nga dili ko mobati og kasubo tungod sa dili tarung og sininaan nga akong nakita.
Amy S., edad 19, Utah, USA