Juōn Tampeļ n̄an Kona
Ke Leroy im Rose Alip rekar kaarmejete aer kōņaan im etal n̄an tampeļ eo kajjojo allōn̄, Irooj ekar kōjeraam̧m̧an er eļap ļo̧k jen jon̄an jāān ko aer n̄an etal—im n̄an bōk armej ro jet ippāer.
Leroy Alip ekar lukkuun ron̄jake ke kar kajno̧ļo̧k e n̄an jerbal ilo kaunjeļ eo eutiej an stake ioon Big Island ilo Hawaii. Ilo kōjeraam̧m̧an eo Būratōr Alip kar jiron̄ e enaaj kar pād ioon ene eo n̄e juōn tampeļ ekar ekkal ijeņ im bwe enaaj jerbal ilo tampeļ eo. Menin ekar ilo 1981, im tampeļ eo wōt ilo Hawaii ekar pād ioon enen Oahu, elōn̄ m̧aeļ (kilomitōr) jerak kōn ļoon ak baļuun.
Kōjeraam̧man an priesthood eo ekar kājjimourur Būratōr Alip. “Ij tōmak bwe n̄e kwōj bōk juōn kōjeraam̧m̧an, ewōr am̧ juōn eddo n̄an kōm̧m̧ane jon̄an eo komaron̄e n̄an bōktok kōjeraam̧m̧an eo n̄an eok,” ej ba. Innām e im kōrā eo pāleen, Rose, kar pepe n̄an etal n̄an tampeļ eo ioon Oahu juōn kōttan juōn allōn̄.
Kōm̧m̧ane menin ekar jab pidodo. Ialen ito itak n̄an ijeņ ej wōnāān U.S. $300, juōn jāān eļap n̄an juōn pea in ripālele ro rej mour kake kōļļā eo an Būratōr Alip jān opiij in kabermen ijo ekar jerbal ie. Wāween eo wōt remaron̄ tōpōrak ilo tūreep eo ekar ebbōk jāān jen jāān in kako̧ņko̧ņ ko aer. Rekar kōm̧m̧ane ilo m̧ōņōņō.
Iloan wōt juōn iiō, kōn menin, ekar maat aer jāān. “Ak būruwōm̧ rekar pād ilo tampeļ eo,” Būratōr Alip ekar ba. “Jej aikuj in wōnm̧aanļo̧k wōt im etal. Innām kōm kar jar kōn jipan̄.”
Ejjab etto ālkin wōt, Būratōr Alip ekar jab kōtmene in kar bōk juōn menin leļo̧k kakobaba in kōļļā eo an jen ri leto letak peba ko jen juōn peejnej in jikin eo. Kōn leto letak kein ilo jibon̄ tata, ekar kōļļā turin ļo̧k $700 juōn allōn̄. Kōn eļap ļo̧k an bwe jāān ko n̄an wōnm̧aanļo̧k im etal n̄an tampeļ eo, Būratōr im Jejtōr Alip kar im̧we n̄an likūt orļo̧k ko ilo jāān in tampeļ eo aer eaorōk.
Jen Juun 1986 un eo bwe im̧we ņe en erom allikar: kiiō rej mour ilo Kona Hawaii Stake, remaron̄ kar bōk n̄an tampeļ juōn wōran kōrā ro jān stake eo ro rekar erreo ak rekar jab maron̄ in bōk menin letok kwojarjar ko aer. Innām kajjojo allōn̄, Alip rekar bōk juōn jejtōr ippāer n̄an Oahu. Kajjojo iien, jejtōr eo ekar ro̧o̧l im kwaļok naan in kam̧ool eo an ekajoor eo an jetōb im lan̄lōn̄ eo ekar en̄jaake ilo jerbal in tampeļ eo an make im ro jet. Ejjab etto, jetōb eo an jerbal in tampeļ eo ekar ajeded peļaakin stake eo, im elōn̄ uwaan ro rekar jino pukōt wāween ko n̄an aer etal n̄an tampeļ eo.
Jen iaron̄ron̄ ko ippān Būratōr Alip ilo jikin ialen ito itak eo, ekar maron̄ karōk dikļo̧k in wōnāān ekkāke, ialen ito itak ioon dān im ene, im jikin kōppād n̄an aolep ro ilo stake eo ro rekōņaan in etal. Jen 1994 elōn̄ ļo̧k jen 100 uwaan ro an Kona Stake rekar kōm̧m̧an tūreep kajjojo allōn̄ n̄an Laie im Hawaii Tampeļ. Būratōr Alip ej ettōn̄. Ej kamemej, “Tampeļ būreejtōn eo ekar kōm̧m̧an kōjak kōn Armej ro Rekwojarjar jān Kona rekar kamej mejān rak ko kōnke elōn̄ iaer rekar pād ilo tampeļ eo.”
Ilo 1997 Būreejtōn Gordon B. Hinckley (1910–2008) kar kōjjeļāik kōn juōn tōl n̄an kalōk tampeļ eo. Tampeļ ko reddik renaaj maron̄ kamaron̄ elōn̄ ļo̧k tampeļ ko n̄an ekkal. Lukkuun tōmak an Armej ro Rekwojarjar ioon Big Island kar nōbar er jiljino allōn̄ ko tokālik tōre eo Būreejtōn Hinckley ekar kōjjeļā kōn juōn tampeļ n̄an Kona. Ālkin an tampeļ eo kar aje ilo 2000, Būratōr Alip kar kūri āinwōt rikakpilōklōk kein karuo ilo būreejtōnji eo an tampeļ. Rainin, lukkuun jem̧ļo̧k jān jerbal eo an ak lukkuun wijlep ļo̧k e ilo jerbal eo an Irooj, ej jeban rijerbal ro rej dāpij an laļ in Kona Hawaii Tampeļ eo aiboojoj.
Būratōr im Jejtōr Alip rej kam̧m̧oolol kōn wāween ko Jemed Ilan̄ ekar kōjeraam̧m̧an er bwe en wōr ta ko rej aikuji n̄an wōnm̧aanļo̧k im jerbal n̄an doon. Ke rekar jino itok n̄an Kona, Būratōr Alip ej ba, “Ekar ejjeļo̧k jikin n̄an am pād ijjeļo̧kin juōn em jibaba ilo tōl jiddik ko kar ekkal jen juōn rijerbal ilo jikin kallip coffee eo. Rekar mour jilu allōn̄ ko m̧ae rekar maron̄ jaataik juōn em̧ jidikdik.
Jet iiō ko tokālik, ekar bwe jāān joortoklik ko im kōļļā ko n̄an ļōmņake juōn em̧ em̧m̧an ļo̧k, ak ejjeļo̧k juōn rekar loe im en̄jaake ke ejim̧we n̄an er. Juōn raan tōre eo Būratōr Alip ekar jerbal ilo laļ in Kona tampeļ, juōn jejtōr erūtto ekar itok. Ekar jan̄. Būratōr Alip ej kajjiboluli bōran. “Kar kadiwōjļo̧k e jān m̧weo im̧ōn im ekar ejjeļo̧k jikin n̄an etal n̄ane. Kōn jet un ko, Ikar jiron̄ e bwe en loļo̧k ajri ro jibūn, im n̄e ej ro̧o̧ltok, emaron̄ em̧m̧akūt tok ippām.” Jorāān eo ekar, m̧weo im̧ōn Alip ekar bwe an ļap n̄an Būratōr im Jejtōr Alip wōt. Innām rekar jino jar—im lukkuun kappukōt wāween ko n̄an bōk kōjeraam̧m̧an eo rej pukōte.
Jidik iien, juōn rijerbal in ļo̧o̧n em̧ ekar kūrtok er n̄an ļōmņak kake juōn ajjuur jiljiljino ruum iloan. Raar iakwe, ak rekar jab jeļā m̧weo enaaj kar ļap wōnāān jen jon̄an eo remaron̄ kōļļāik. Rekar jenliklik kōn menin leļo̧k eo, ilo m̧ōņōņō.
Ak juōn ial ekar peļļo̧k. Iloan jejjo wiik ko, wōnāān em̧ ekar wōtļo̧k, im Alip rekar katak bwe ebwe ippāer jāān n̄an wiaik m̧weo. Āinwōt juōn waļo̧k, jejtōr eo ilo ewōr an aikuj ekar wōr juōn jikin ippān Būratōr im Jejtōr Alip ke ekar ro̧o̧l n̄an Kona, im jilu iaan ajri ro nejin Alip, ilo aikuj er make, kar loe juōn em̧ n̄an baam̧le ko aer ilo m̧weo.
“Irooj ekar kōjparok kōm,” Būratōr Alip ej ba. “N̄e jej kwaļok bwe jej m̧ōņōņō in kaarmejete iien ko ad, taļōņ ko, im jāān ko n̄an E, E uttidikdiki kōj kōn tiriam̧o ko An.”
Kōmļeļe jen Steve Kropp; pija jen R. Val Johnson