Mour ko Rem̧m̧an Kar Kememeji
Būreejtōn Spencer W. Kimball (1895–1985).
Rittoļo̧k ilo Arizona, Spencer W. Kimball ekar katak n̄an lukkuun in jerbal ilo tōre ko em̧m̧an dettan. Jibūn Rijilōk Heber C. Kimball (1801–68) im nejin juōn stake būreejtōn, Spencer ekar barāinwōt ejaake juōn naan in kam̧ool eo epen im lukkuun aje ļo̧k e n̄an gospel eo.
Ke ekar juōn ļaddik, ekar ekkā bwe en eddo eo an Spencer n̄an iuwe ilōn̄tata in wāikōn eo eobrak kōn ujooj, iuun laļ ļo̧k ujooj ko kōn neen ilo an būratōr ro an rerittoļo̧k julōn̄ ļo̧k ujooj ko n̄an ioon wāikōn eo. Ekar bwil, bin̄aln̄al, kabōņōjņōj jerbal eo, ak ekar kōm̧m̧ane—ijjello̧kin n̄e peeļ in jar eo ej jan̄ n̄an kwaļo̧k jinoin Piraimere, eo ilo tōre in ekar kōm̧m̧an ilo ilowaan wiik eo. Ekar wōr juōn an reko̧o̧t em̧m̧an im ekar jab jako jān jar. Būratōr ro an ekar wōr aer ļōmņak ko jet im kar jino in iūm ļo̧k aer likūt ujooj ko ioon wāikōn eo. Ke rekar kile bwe ujooj ko rekar eojōk lōn̄ļo̧k, Spencer ekar tōpar ioļapen iaļ eo an n̄an Piraimere.
Spencer W. Kimball ekar wōnm̧aanļo̧k im jerbal āinwōt juōn mijinede, juōn bisop, im juōn stake būreejtōn m̧okta jān kūr n̄an doulul in rijilōk ilo 1943. Wāween jerbal ko an rekar kili im jeļā kaki, men̄e jet nan̄inmij ko reļļap me rekar kobaik juōn jorrāān in menono im nan̄inmij in bōro. Ekar kōketak ro uwaan Kabun̄ eo n̄an aer kaitok ļo̧k jetn̄akin neer, im unin tōl eo an ekar pidodo “Kōm̧m̧ane.” Kōn ājmour eo an, jet rekar ļōmņak Spencer W. Kimball opiij eo an āinwōt Būreejtōn eo an Kabun̄ in emaron̄ kar kadu. Ak eaar tōl Kabun̄ in ium̧in 12 iiō ko, tōre eo nōm̧ba in tampeļ ko rej jerbal ekar ruo kōttan an lōn̄ļok, nōm̧ba in mijinede ro ekar wanlōn̄ kōn 50 bōjjāān, im priesthood eo ekar ajjeded n̄an aolep em̧m̧aan ro rerreo.
An jakkijeje ilo kijejeto n̄an gospel eo im wāween jerbal ko reppen kar bōk Spencer W. Kimball jān ijjino eo ettā ilo jikin eo ilo Arizona n̄an kaunjeļ in tōl ko an Kabun̄ in. Opiij eo an āinwōt Būreejtōn eo an Kabun̄ in ekar kōkkaļļeiki eddōkļo̧k eo em̧m̧an ilo ekkal tampeļ im jerbal in mijinede. Tuanmmiin̄: Ippān kōrā eo pāleen, Camilla(1894–1987).