Kajjitōk im Uwaak ko
“Ewi wāween an ļōmņak ko aō erreo n̄e Ij loe paatokin ekkōņak ko rej jab lukkuun em̧m̧an ipeļaakū”
Āinwōt kwōj jab maron̄ ilo̧k n̄an jabdewōt jikin rainin ijjelo̧kin am̧ loe armej ro rej nuknuk kōn nuknuk ko rejjab em̧m̧an, men̄e ilo armej ak ilo pija. Ejjab aolep iien konaaj maron̄ in dāpij to ko ipelakkūm, ak komaroñ dāpij ļōmņak ko rem̧m̧an am̧.
Ñe kwōj loe juōn armij eo ej kōņak nuknuk ko rejjab em̧m̧an, komaroñ mōkaj in reilo̧k jāne ak kōmakūt eok make jān jōkljōk eo. Ñe ewōr iien an men ko renana rej waļok ilo ļōmņak eo am, jab kālōt bwe kwoj jokwe ie, ak kwōn kabool am ļōmņak kōn men em̧m̧an. “Katļok bwe kien erreo en jipañ eok ilo am ļōmņak; innām.… Jetōb Kwojarjar enaaj pād ippam aolep iien” (D&C 121:45–46). Ñe ewōr ļōmņak erreo enaaj jipan̄ eok bwe kwōn m̧ōņōņō ļo̧k im Jetōb eo enaaj pād ippām.
Kōm̧m̧an bwe en juōn iminene iien otemjej en wōr ļōmņak ko rerreo. Kajjioñ pād ilubeiljin armij ro rej ekkōņak nuknuk ko rem̧m̧an, im bōbrae iien rōt ko komaron̄ in loe ekkōņak nuknuk ko rejjab em̧m̧an. Jar bwe Anij Jemed Ilañ en jipañ eok. Kiili al jar ko ak eoon ko bwe en wōr men ko rem̧m̧an n̄an ļōmņak kake eļan̄n̄e ewōr menin kabo. Riiti jeje ko rekwojarjar aolep iien, im etal ñan tampeļ eļan̄n̄e emaron̄. Innām ñe kwōj lo juōn armij eo im ejjab ekkōņak nnuknuk ko rejjab em̧m̧an, komaroñ ļōmņak kōn jet men em̧m̧an.
Jej jab Armej in Laļin in
Jej aikuj kememej bwe jej pād iion laļin ak jejjab jān in laļin. Jej jet ian armej ro nejin Anij Jemed Ilañ ro raorōk. Kōn wōnin in, rinana eo ej lapļo̧k an kabo, ak jej aikuj in kajoor jen men ko renana. Armej in laļ rejjab ekkōņak nuknuk ko rem̧m̧an, rejjab jeļā ke ānbwinnier ej juōn tampeļ ekwojarjar. Ak Armej ro Rekwojarjar Ilo Raan Kein Āliktata ewōr jeļāļo̧kjeņ in ippāer. Kōn menin, jej aikuj dāpij bwe mour ko ad ren wānōk im erreo. Ñe ewōr ļōmņak ko renana rej itok ilo kōļmenļo̧kjeņ ko ad, jej aikuj pukōt ak kajjitōk jipan̄ eo jen Jemed Ilañ ilo ad jar ñane, kōnke ejjeļok bar juōn em̧m̧an ļo̧k an jipan̄ kōj jān E.
Dayana H., age 19, São Paulo, Brazil
Kajjitōk Ippān Ro M̧ottam n̄an Jipañ
Āinwōt kar juōn wōt kūlaaj jiljiljino ej Armej ro Rekwojarjar ilo jikuuļ eo aō, iaar jelm̧ae kōn naan ko renana, ekkōņak nuknuk ko rejjab em̧m̧an, kapo in aetōl n̄an ļoor jarlepju eo. Ak ilo jino in iiō eo, iaar kōmļeļe ñan ro m̧ōtta ke ewōr jet iaan kien ko me Ij dāpiji im enaaj āindein jekdoon ta. Raar katak jen allōn̄ ko kōn aorōk ko ilo Kabun̄kōn aō. Ro m̧ōttan renaaj jipañ eok ñe kwōj kōmļeļe ñan er kōn wāween ko im kien ko am̧ ñan er. M̧wil ko an armej ro m̧ōtta, nuknuk ko, im kōnōnō rekar oktak n̄an em̧m̧an ļo̧k. Iaar katak ke ñe rej lukkuun m̧ōttam̧, renaaj kwaļok aer jipañ eok kōn jet iaan ļōmņak ko im ial eo eādik im jim̧we.
Celia N., dettan 12, Virginia, USA
Jar Ko Rej Jipañ
Iaar lo ke ilo aō kar iion jet ian ļōmņak ko rejjab em̧m̧an, jar ekar juōn uwaak eo im emaroñ kōm̧m̧an bwe ļōmņak ko ao ren erro im kōm̧m̧an bwe Jetōb eo en pād ippa aolep jikkin ko Ij etal ie. Jar aolep jibboñ ñan Anij Jemed Ilañ n̄an jipañ ña bwe ļōmņak ko aō ren erreo, im tōl eo an eaar letok ñan eō ilo raan ko im Ij kam̧m̧oolol e ilo jōta eaar kōm̧m̧an bwe in epaake im jipañ ko an raar tōl eō jen men ko rejjab jim̧we bwe in dāpij jon̄ok ko. Jar in jibboñ im jōta rej m̧ōttan men ko remmaroñ jipañ bwe Jetōb eo en pād ippam ilo ami jelm̧ae apan̄ ko an laļ in. “Kōn menin, ikōnaan bwe kom̧in pen im dim, iien otemjej baptoami il jerbal ko rem̧m̧an” (Mosaia 5:15).
Gunnar R., dettan 16, Wisconsin, USA
Jej Tampeļ ko
Ñe armej ro peļaakum̧ rej ekkōņak nuknuk ko rejjab em̧m̧an, jab kōrraat er, bwe kwōj aikuj wōr ippam ļōmņak ko rem̧m̧an. Kwaļok juōn waanjoñok eo em̧m̧an ñan er bwe ren jeļā ke kwōj jon̄ak ko an Kabun̄. Innām jipañ armij ilo am kwaļok am iakwe er im kwōn ba ñan er ke Jemed Ilañ ej bar iakwe er im ekōnaan bwe ren jet armej ro im erreo ilo aer m̧akūtkūt im ilo aer ļōmņak. Erreo ej aorōk n̄an lo̧mo̧o̧r eo ad, kōnke jej tampeļ ko an Anij.
Maricris B., dettan 19, Quezon, Philippines
Mour Kōn Katakin ko an Gospel
Ijjeļā ke ļōmņak ko ad remaroñ em̧m̧an ñe jej katak jen jeje ko rekwojarjar im likūt katakin ko ilo kaminene. Ñe jej likūt kaminene ko aolep aorōk ko me rej katakin ilo kabun̄, n̄e jej riit Ñan Kakajoorļo̧k Jodikdik Ro, im ñe jej etal ñan tampeļ, jej maroñ in bōk ļōmņak ko rem̧m̧an ak erreo.
Jossi O., dettan 16, Antioquia, Colombia
Ļōmņak Ej Āinwōt juōn jikin ikkure
Kwaļok Gospel Eo Aō ej kwaļok kōn jet iaan men ko wānōk. Ej kwaļok ļōmņak eo ad ej āinwōt juōn jikin ikkure ilo juōn im̧ōn ikkure. Iion jikkin program in, juōn wōt armij emmaroñ in kōm̧m̧ane makūtkūt eo an mokta. Ñe jej ļōmņak kōn men ko rejim̧we im em̧m̧an, ļōmņak ko ad renaaj pād wōt ilo kōn men kein, im ļōmņak ko ad reban po ippān jet ian ļōmņak ko rejjab jim̧we. Wānōk ej m̧ōttan men eo ippān Jisōs Kraist me em̧ōj jiron̄ kōj n̄an ejaake. Ilo kabuñ in jej katak ke je aikuj ļōmņak kōn men ko rejim̧we, ak ñe ewōr iien an men renana itok ñan kapo kōj, remmaroñ bar al jen bok in al ko ak ļōmņak kōn jeje ko rekwojarjar rem̧m̧an ipped. Juōn wāween eo em̧m̧antata ilo an jipañ kōj ej pād ilo 2 Nipai 32:9: “Komij aikuj jar iien otemjej, im jab kijeļok.”
Eļtōr McEachron, dettan 21, Brazil João Pessoa Mission
Ļōmņak Kōn Ro Jet āinwōt Ajri ro nejin Anij
Komaroñ dāpij wāween am̧ uwaak n̄an ta eo kwōj loe. Kōnke juōn men ej pād ijeņ, ejjab meļeļen kwōj aikuj likūt ilo ļōmņak eo am̧. Kwe eo kwōj kālet ta ko kwōj ļōmņak kake; kwōn ļōmņak kōn men ko rej erreo im jim̧we. Kajjioñ etal jen men ko rejjab jim̧we jōñan am̧ maroñ, im kwōn kōm̧m̧ane men ko rejim̧we aolep iien. Ļōmņak kōn armej ro kwōj ioon āinwōt jet armij ro rej nejin Anij, kōn iakwe, im kwaļok ke rej aorōk ippān Anij Jemed Ilañ. Ilo Aō lale ro jet āinwōt ajri ro nejin Anij, elōn̄ iien an pen aō ļōmņak kōnke Ij buromōj kōn ro im ejjab jim̧we ta ko rej kōm̧m̧ane ilo Aō ioon er.
Amy S., dettan 19, Utah, USA