Ij Aikuj in Etal n̄an Tampeļ eo
Juōn jorāān, raan ko im bon̄ōn̄ ko ioon juōn baj, ial eo aitok ioon tim̧a, wōnāān ko reļļap rekar jab dāpij būratōr in jān Brazil jān an etal n̄an tampeļ eo.
Jose Goncalves da Silva ekar m̧ōkaj an jerkak kōn an armej kūr et eo etan. Ekar marok, im ejjeļo̧k an meļeļe ia eo ekar pād ie.
“Ikar kiki ke baj eo ekar pedo,” Jose ej kakememej jimarokin jibon̄in jorāān eo ilo Jānwōde 2008. “Ejjeļo̧k ekar maron̄ loe eō kōnke ikar pād tulikin baj eo lipopo kōn kōban̄ ko. Jet iaan em̧m̧aan ro rekar āliktata kar loe eō ke rekar jino aini kōban̄ ko.”
Ke rikattōr baj eo ekar jab maron̄ dāpij jōbwe in wa eo ilo juōn jikin ial eo ekōbōōb ilo buļan wōjke ko ilo tulaļ in Venezula, Jose im armej ro rekwojarjar jān Manaus, Brazil, rekar enan̄in pād jimitan in jān tūreep ko jilu aer n̄an Caracas Venezuela Tampeļ. Jose ekar en̄taan kōn jet kinej ko reddik, ak būratōr ro im jejtōr ro jet rekar bōk er n̄an jikin rirolo̧o̧l ilo aujpitōļ.
“Ej iien am̧ bōjrak in etal n̄an tampeļ eo,” ro uwaan baam̧le rekar jiron̄ ļo̧k Jose, eo ekar 80 ke jorāān eo ekar waļo̧k. Jab Ebbeer, mekarta, ekar kwaļo̧k: “Ij aikuj in etal n̄an tampeļ eo. Eļan̄n̄e Irooj eo ej kōtļoke menin, Inaaj ro̧o̧l.”
Em̧ōkaj an kar jino kakkoņ jāān ko n̄an tūreep ko an kein kemen n̄an Caracas, eo ekar kōm̧m̧ane ilo im̧aan 2009. N̄an Būratōr Goncalves da Silva, 40 awa ko iuwe ioon baj epidodo keidi n̄an jilu tūreep ko ekar kōm̧m̧ani m̧okta ļo̧k n̄an Sao Paulo Brazil Tampeļ. Kōn elōn̄ iiō ko, Sao Paulo Tampeļ, ekar pād taujin m̧aeļ tuiōn̄ turōk in Manaus, ekar tampeļ eo epaake tata n̄an bukwōn in ruo milien armej ro ilo bukwōn eo turear in Amazonas. Innām, ilo 2005, Manaus ekar erom̧ m̧ōttan wōt Caracas Venezula Tampeļ District.
Ilo iiōōn ito itak ko n̄an Sao Paulo, “kōm kar bōk juōn tim̧a ijeņ ilo Manaus im joļok emen raan ko jipadōk ļo̧k Porto Velho,” bukwōn in kweiļok eo eļap an Rondonia, Jose ej ba. “Innām kōm kar bōk juōn baj emen raan in iuwe ioon n̄an Sao Paulo. Kōrā eo pāleeō ej jab uwaan Kabun̄ in, im ke ikar etal n̄an tampeļ eo jinointata ilo 1985, ikar etal make iaaō. Ikar joļok juōn bon̄ ilo jikin kōttar baj eo ilo Porto Velho kōnke ekar rum̧ij aō itaak ļo̧k im ekar ejjeļo̧k baj. Jibbōn̄ōn̄ eo tok juōn Iaar jipadōk ļo̧k Sao Paulo. Ekar juōn en̄jake em̧m̧an, ak ikar mōk jidik ke Ij itaak ļo̧k.”
Innām ekar joļok jilu raan likio jerbal ilo tampeļ eo m̧okta jān an kōm̧m̧m̧ane rualitōk tūreep ko ro̧o̧ltok n̄an m̧weo. Ekar bōk n̄an e juōn iiō n̄an bwe jāān eo ekar kakkoņe jān jāān in jortoklik ko an n̄an kape wōnāān an ito itak n̄an tampeļ.
“Menin ej juōn kaarmejete eo n̄an etal, ak eaorōk,” Būratōr Goncalves da Silva ej ba, eo ekar kōm̧m̧ane jerbal eo ejjejet n̄an baam̧le eo an. “Ikar en̄jake juōn lan̄lōn̄ eo eaorōk raan eo ikar peptaij kōn jema, ke juōn ekar peptaij kōn jinō, im ke pinej jenkwan jema ilo an ro jinō im jema liabe ippāndoon. Ekar juōn iien em̧m̧an. Aolep būratōr ro im jejtōr ro aō kiiō rem̧ootļo̧k, ak ededeļo̧k aō kōm̧m̧ane jerbal eo n̄an er ilo tūreep ko an n̄an tampeļ eo.”
Jose ej tōmak bwe kaarmejete aorōk in ito itak eo ettoļo̧k n̄an tempeļ enaaj jipan̄ Armej ro Rekwojarjar ilo Raan Kein Āliktata ilo Manaus kam̧m̧oolol kōn raan eo juōn tampeļ ej aje ijeņ. “Eļap aō m̧ōņōņō kōn raan ņe.” ej ba.
Manaus ewōr juōn branch eo edik kōn 20 uwaan ro ke Jose ekar kobatok ilo Kabun̄ in ilo 1980. Jān tōre eo em̧ōj an loe eddōk ļo̧k eo an Kabun̄ ijeņ n̄an enan̄in 50,000 uwaan ro rej jokwe ilo rualitōk stake ko.
“Ke kōjjeļā eo ekar itok ilo 2007 bwe juōn tampeļ enaaj ekkāl ilo Manaus,”Jose ej ba, “Ikar jan̄ kōn juōn lan̄lōn̄ eļap ikar en̄jake, im ikar jar bwe Irooj enaaj kar kōtļo̧k aō mour m̧aan ļo̧k n̄an aō loe aje bwidej,” eo ekar waļo̧k juōn iiō tokālik. Kiō ej jar bwe enaaj mour n̄an an loe tampeļ eo dedeļo̧k im kōrā eo pāleen peptaij bwe erro en maron̄ liabe ippāndoon.
“Jej jab jeļā n̄āāt jenaaj mej, ak jej aikuj in pojak im m̧ōņōņō n̄e iien eo ej itok,” Būratōr Goncalves da Silva ej ba. “Ij errem̧aan ļo̧k n̄an ro̧o̧l n̄an im̧aan mejān Jemed Ilan̄ im aō RiLo̧mo̧o̧r, Jisōs Kraist. Pād ilo tampeļ ej jipan̄ eō pojak n̄an raan ņe.”
Anmiin̄: pija in Caracas Venezula Tampeļ © IRI; lōn̄ anmiin̄ im lōn̄ anm̧o̧o̧ņ: pija jān Micheal R. Morris
Caracas Venezula Tampeļ Eo.
Lōn̄: Rio Negro, ijo Jose Goncalves da Silva ekar jino tūreep ko an rualitōk n̄an Sao Paulo Brazil Tampeļ.
Laļ: Būratōr Goncalves da Silva ilo 40 awa ko iuwe ioon baj eo n̄an Caracas Venezula Tampeļ. Ej ba jerbal ilo m̧weo im̧ōn Irooj ej aorōk ej bōk kaarmejete n̄an etal.