Jimarok in Jibbōn̄in Jabōt
Likao rein ilo Fiji rej jerkak im etal laļ ļo̧k ilo juōn iaļ aitok, bōtaab rej kijoror in kōm̧m̧ane eddo eo aer.
Ej jotan Jādede ilo Waila Ward eo an Nausori Fiji Stake. Eddo ko an raan eo raar kūrm̧ool, im ro rej kabwijer Priesthood eo an Arōn raar kōppojak n̄an Jabōt eo im rej kiiō koba ilo m̧weo im̧ōn Būratōr im Jejtōr Maiwirwiri. Ej juōn iien em̧m̧an n̄an er n̄an mōn̄ā jidik m̧okta jān aer jino jitlo̧k eo aer—kar ālkin kiki ioon jaki ko ilo m̧weo im̧ōn Maiwiriwiri.
Jibbon̄ n̄an ļikao rein an Priesthood eo an Arōn emōkaj an waļo̧k. M̧ōkta jān an joraan tak, em̧ōkaj aer ruj, ekkōņak aer jōōt mouj im tae ko im jito̧kin kilmej ko, im ilo 6:00 jibbon̄ raar ilo̧k n̄an m̧weo im̧ōn Būratōr im Jejtōr Maiwiriwiri ruo illo̧k ruo— āinļo̧k wōt mijenede ro. Kajjojo iaan m̧ōttā kein ewōr aer iaļ make n̄an tōbrak ļo̧k ilo im̧ōn jar eo ilo 10:00 jibbon̄, n̄e kweilo̧k an priesthood eo ej jino. Eddo eo aer ej n̄an bōjrak ilo kajjojo im̧ōn ro uwaan ilo iaļ eo aer im karuwaineneik er n̄an leļo̧k jortak ko.
Likao rein rej etal laļ ļo̧k jilu m̧aeļ (5km) jān m̧weo im̧ōn Maiwiriwiri ilo jem̧ļo̧k in ward eo n̄an imōn kweilo̧k eo ilo jem̧ļo̧k in ward eo. Ej juōn iien em̧m̧an n̄an kakūrm̧ool jerbal eo aer im karuwaineneik ro uwaan Kabun̄ in n̄an bōk kuņaer ilo jerbal in kōjparok ro emej ļōmaro pāler eļap im ro jeier im jatier ilo leļok n̄an jortak ko. Būreejtōn eo an Stake eo an Nausori Fiji Alipate Tagidugu eaar ba bwe āinwōt juōn tōbrak jān kijejeto in jān Priesthood eo an Aroōn, leļo̧k ko an jortak ko em̧ōj aer wanlōn̄ļo̧k 20 būjāān.
Āinwōt an aorōk, likao rein ewōr aer iien em̧m̧an n̄an kakūrm̧ool jerbal eo aer im jipan̄ ro uwaan ward eo dāpij wōt bujen ko aer raar kōm̧m̧ani ilo peptaij:
“Āinwōt kom̧ij kōņaan itok ilo wōrwōr an Anij, im kom̧ij m̧ōņōņō n̄an ineek eddo ko an ro jet, bwe ren maron̄ mera;
“Aaet, im kom̧ij m̧ōņōņō in jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an, im n̄an jutak āinwōt ri kam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko kom̧ maron̄ pād ie, em̧ool m̧ae mej, bwe kom̧in maron̄ bōk lo̧mo̧r an Anij, im bōnbōn ippān ro ilo jerkakpeje eo m̧oktata, bwe kom̧in maron̄ bōk mour indeeo” (Mosaia 18:8–9).
N̄an likao rein rem̧m̧an, aiini jortak ko ejjab juōn eddo bōtaab juōn kōjeram̧m̧an. Rej m̧ōņōņō in kōņak jōōt mouj ko im tae ko aer, kijoroor jerkak ilo jibbon̄ tata, im m̧ōņōņō in kōļaļaļ ilo kōjām ko an ro uwaan ilo awa ko jino in tata ilo jibbon̄ n̄an karuwaineneik er n̄an bōk m̧ōttan kōjeram̧m̧an ko me rej itok jān leļo̧k juōn jortak in jouj.
Ilo aō kalimjōk likao rein kōpopo n̄an im kakūrm̧ool jerbal eo aer āinwōt ro rej kabwijer priesthood eo, ikar ļōmņak juōn kōjeram̧m̧an aiboojoj enaaj n̄an er ilo aolepen mour ko aer n̄an meļeļe kōn aorōk in kijejeto ko aer n̄an karuwaineneik ro uwaan Kabun̄ in n̄an epaakeļo̧k RiLo̧mo̧r eo ilo leļo̧k jortak ko. Ewi jon̄an aer naaj erom mijenede ro rem̧man, im ewi jon̄an aer naaj em̧m̧aan in ripālele ro rem̧m̧an im ro jemen renaaj erom̧ āinwōt juōn tōbrak in kijejeto ko an priesthood eo aer.
Enaaj ļap aer meļeļe eoon in kōn armej ro an Irooj: Irooj eaar kūr armej ro an Zaion kōnke raar juōn wōt bōro im juōn wōt ļōmņak, raar joke ilo jim̧we, im eaar ejjeļo̧k ri jeramōl ilubwilijer (Moses 7:18).
Juōn kōjeram̧m̧an n̄an rein rej kabwijer priesthood eo n̄an jeļā raar karuwaineneik ro uwaan n̄an epaakeļo̧k RiLo̧mo̧r eo.
Raan eo ej ijjino ilo jibbon̄ tata, bōtaab kōn ettōn̄ dikdik ko likao rein rej etal laļ ļo̧k jān jem̧ļo̧k in ward eo n̄an bar ijo juōn, aiini jortak ko ilo iaļ eo.
Fiji
New Zealand
Australia
Jem̧ļo̧kin: pija © Dynamic Graphics, Inc.; pija ko jān Talat Mehmood; map kar bōk jān Map in Jipan̄ ko