Ta eo Jej Tōmak ie

E Em̧ōj An Jerkak

Jān Būreejtōn Thomas S. Monson

Jabdewōt jikin ij ito itak n̄ane, ij kajjeon̄ in kōļļāik juōn iien loļo̧k n̄an ūlleej eo. Ej juōn iien kōļmenļo̧kjeņ, kōn jekjekin eo an unleplep in mour in im wāween an pen jeor jān mej. Ilo ūlleej in edik ilo bukwōn eo ilo Santa Clara, Utah, ij kememej enan̄in aolepen etan ro ineen armej in Swiss ro rej jeje ioon lūb ko. Elōn̄ iaan armej ro rekar em̧m̧akūt jān m̧ōko m̧wer im baam̧le ko aer ilo Switzerland im, ilo eo̧ron̄ kūr eo “Itok n̄an Zaion,” kar jukjuk im amņak ilo jukjuk in pād ko ijo rej pād ie kiiō “pād ilo jikin eo rem̧ōņōņō ie.” Raar kijoone ibwijleplep ko ilo jibriin̄, m̧ōrā ko ilo jam̧ar, iien totak ko jikin kallip ko rej jab lukkuun kalle, iien jerbal ko reppen. Raar likūt juōn bwebwenato in karmejjete.

Ūlleej ko reļļap tata, im ilo elōn̄ kautiej ko n̄an jabdewōt ro raar bōktok n̄an kōļmenļo̧kjeņ en̄jake in iakwe ko reļļap, rej kautiej er āinwōt jikin kakkije ko an armej ro rekar mej ilo juōn tōren tariņae eo jeļā kake āinwōt tariņae ilo aer ekkōņak iunibo̧o̧m ko an laļ eo aer. Juōn ej ļōmņak kake an kar jab kūrm̧ool ļōmņak ko, an jab kūrm̧ool kōjatdikdik ko, bōro ko reobrak kōn būrom̧ōj, im ro rem̧m̧an dettaer raar mej itok wōt jān tariņae.

Ekar kanooj lōn̄ rikōm̧m̧an lūb ro ilo bukwōn ko ilo France im Belgium kar kwaļo̧k wōran rimej ro ilo Pata eo Kein Kajuōn. Verdun, France, ilo m̧ool ej juōn ūlleej eo eļap an kilep. Kajjojo jibriin̄ ilo an rikallip ro rube bwidej eo, rej loe juōn at in tariņae ijin, juōn bū ijeņ—bōktok kakememej ko reppen an milien armej ro raar kalibobo bwidij in kōn bōtōktōk in mour ko aer.

Mour ej āinwōt juōn bok, im Mej ej jab jemļo̧kin bok eo

Elōn̄ iiō rem̧ootļo̧k ikar jutak iturin beet eo an juōn likao em̧m̧an dettan, jemān ruo ajri ro, ilo an kar pād ilo an do̧lo̧o̧l im iten mej. Ekar jibwe peiū ilo pein, kar kalimjek mej ko meja, im akweļap im kar kajjitōk, “Bisop, ijeļā epaak aō iten mej. Jiron̄ eō ta eo ej waļo̧k n̄an jetōb eo aō n̄e ij mej.”

Ikar jar kōn jipan̄ jān lan̄. Ļōmņak eo aō ekar iook ļo̧k Bok in Mormon eo ioon tebōļ eo turin beet eo an. Ikar jino kōļap ainikien aō riit:

“Kiō, kōn ļamļam in jetōb eo ikōtaan mej im jerkakpeje eo —.… bwe jetōb ko an aolep armej, ilo wōt iien eo rej ilo̧k jān ānbwinnin kanniōk in,.… rej ilo̧k n̄an jikier n̄an Anij eo eaar leļo̧k n̄an er mour.

“… Jetōb ko an ro raar jim̧we naaj bōk er ilo juon mejatoto in m̧ōņōņō, eo ņa etan paradise, juon mejatoto in kakkije, juonmejatoto in aenōm̧m̧an, ijo renaaj kakkije jān aolep inepata ko aer im jān aolep ailparo, im būrom̧ōj” (Lale Alma 40:11–12)

Likao in jera ekar kiil mej ko mejān, kar kwaļo̧k juōn kam̧oolol eo em̧ool, im jetōb eo an ekar em̧m̧akūt ilo ejjeļo̧k ainikien n̄an paradise eo me kōmro kar kōnono kake.

Anjo ioon Mej in kanniōk

Kōtļok bwe Luk, taktō eo, en kōmeļeļeik en̄jake eo an Mary Magdalini im Mary jinen Jemes ilo aer kar epaake ļo̧k lōb eo:

“Im rej lo ejm̧aan eo e dāpiļo̧k jān lōb eo. …

“… Im rej deļo̧n̄ ilowaan, im jab lo ubōn Irooj Jisōs.

“… Im ke eļap aer pere kake, lo, ruo armej rej jutak iturir, ilo nuknuk ko re jatōltōl:

“Im.… ba n̄an er, Etke kom̧ij pukot eo E mour, ippān ro re mej?

“E jab pād ijin, a em̧ōj An jerkapeje” (Lale Luke 24:2–6).

Menin ej kūr n̄an m̧akūtkūt n̄an aolep Rikūrijin ro. M̧ool eo an Jerkakpeje eo bwe ej bōktok n̄an juōn im n̄an aolep aenōm̧m̧an eo eļļā ilōn̄ in meļeļe otemjej. Ej kaenōm̧m̧an jabdewōt ro jitōn bōro ro aer rej babu ilo eria in ituiōn̄ in Europe ijo elōn̄ ritariņae ro rekar mej ie ak ro rekar jako ilo lomalo eo emulaļ ak ro rej kakkije ilo jikin jidikdik eo ilo Santa Clara. Menin ej juōn m̧ool ilo peļaakin laļ in.

Ijo ediktata ippān rijilōk ro An, Ij kwaļo̧k aō make kam̧ool bwe mej in kanniōk em̧ōj eļļā ioon, bwe anjo ioon lōb em̧ōj an wiin. Naan ko ren kar kwojarjar jān E eo ekar kakūrm̧ooli ren erom̧ jeļāļokjeņ eo em̧ool n̄an aolep. Kememeji. Kaorōki. Kautieji. E Em̧ōj an Jerkak

1. Jaar itok n̄an laļ n̄an katak, n̄an mour, n̄an eddōk ļo̧k ito itak in ad ejjeļo̧k jemļo̧kin m̧ae wāppen.

2. Jet rej mour ioon laļ kōn jidik wōt iien, ak ro jet rej mour aitok ļo̧k ioon ene eo. Jon̄ak eo ej jab ewi jon̄an ad mour ak ewi wāween an em̧m̧an ad mour.

3. Innām ej itok mej in kanniōk im ijjino in juōn jepta kāāl an mour.

4. Jepta in ekāāl ej tōl ļo̧k n̄an raan in jerkakpeje eo aiboojoj, n̄e jetōb im ānbwin renaaj bar koba ippāndoon, jamin bar jepelļo̧k.

Jān “E Ej Jerkak,” Liahona, Eprōļ. 2003, 2–7.

Kraist ekar ba Martha, “N̄a jerkakpeje eo im mour eo: Eo ej lōke Eō, men̄e mej, enaaj bar mour: Im jabdewōt eo ej mour im lōke Eō, e jamin emj indeeo.” (John 11:25–26).

Jerkakpeje eo an Kraist, āinwōt m̧ōttan Pinm̧uur eo, ej kōpeļļok ial eo n̄an kōjwōj aolep n̄an jerkakpeje.

Jān Anmiin̄: My Redeemer Lives, jān Roger Loveless, maron̄ jab kapeiki; kōmļeļe ko an pija eo jān Matthew Reier, Christina Smith, im Welden C. Andersen; Behold My Hands and Feet jān Harry Anderson; Lazarus, jān Carl Heinrich Bloch