Perpetual Education Fund eo ej Wōnm̧aanļo̧k Ruwatimjuōn Iiō ko ālkin an kar Ijjino
Tyson Kemege, eo eaar jorāān kōn boļio im ejelok jinen im jemen ke ej nin̄nin̄ wōt, eaar rūtto ļo̧k ilo Nairobo, Kenya, ijo ejan̄in kar kiki ioon juōn pito̧n̄ im ekkā an ejeja jen ilo juōn raan. Ej em̧akūtkūt imeļaan ko kōn wot jipan̄ jen juōn pea in jokon.
Eaar likūt ilo kōļmenļo̧kjeņ eo an bwe en pād ilo Kenya Augustana College im katak kabeel ko rōkāāl ikijien ial in leto-letak meļeļe, ak ilo an ejjeļo̧k an baam̧le im ejjeļo̧k jāān, tokālik eo eaorōk an ilo kalimjeke ejjeļo̧k kōjatdikdik ie.
Būratōr Kemege, eo eaar kobaļo̧k ilo Kabun̄ jejjo iiō m̧oktaļo̧k ālkin an kamōj an jikuul ilo high school, kar kepaak juōn ruo ripālele rej mijenede im kwaļo̧k n̄an er kōņaan ko an. Mijenede rein raar kōm̧m̧an bwe en tōpar kamitii eo an Perpetual Education Fund (PEF). Juōn PEF ļoon eaar jipan̄ e bōk mālim in deļo̧n̄ ļo̧k ilo jikuul.
“Naij juōn armej eo eļap an jeraam̧m̧an tata ilo laļ in,” Būratōr Kemege elōn̄ iien ej jiron̄ ļo̧k mijenede ro.
Būratōr Kemege ekar jerbal āinwōt juōn būreejtōn kar kālete n̄an m̧akūtkūt ikijjeen ri jikuul ro ilo Augustana University im bōk ruo an kūr ko ilo ward eo an.
Ruwatimjuōn iiō ko ālkin an Būreejtōn Gordon B. Hinkley (1910–2008) kar jinoe an kōjjeļā kōn PEF eo, būrookraam̧ eo ewōr elōn̄ ļo̧k jen 38,000 ro raar bōk koņaer ie ilo 42 laļ ko. Mekarta ewōr wāween ko reppen ikijjeen m̧akūtkūt in jāān ilo aolepen laļ in, Perpetual Education Fund eo ej wāmourur im jipan̄ armej ro āinwōt Tyson Kemege bōk juōn jeļāļo̧kjeņ, etal jen mour in jeram̧ōļ, im jipan̄ ļo̧k jukjuk im pād ko aer.
Elōn̄ ļo̧k jen 87 bōjjāān in in PEF kōn ro raar bōk jipan̄ ro emoj aer kadede ļo̧k aer jikuul im kiiō rej jerbal.
Eļļā ioon Apan̄ ko
Men̄e būrookraam̧ eo ejjan̄in jo̧o̧r jen wōtlo̧k in jāān, ro me rej lale būrookraam̧ eo rej ba bwe ekar aikuj in kar eļļā ioon jet apan̄ ko. Juōn iaan apan̄ ko reļļap tata kar jelm̧ae jen būrookraam̧ in ej jon̄an ļōn̄ļo̧k in ro rej bōk jipan̄ jene.
“Bōbrae ko im kōmij kar aikuj in iooni im eļļā ioer rej ejja bōbrae ko rej etal ļo̧k wōt ippān ļo̧k kōn eddōk ļo̧k im juōn kōttōpar eo em̧ōkaj an laļ ko,” Eļtōr John K. Carmack ekar ba, uwaan ro rerūtto ilo Jiljilimjuōnn̄oul im ritōl eo eutiej an jāān in jipan̄ eo. “Jet bōbrae ko rekoba wāween karon̄ armej kake, kōm̧m̧ane ta ko remenin aikuj im ta ko repād n̄an jeļā kaki, im rejtake ro rej bōk koņaer.”
Būrookraam̧ eo ej pād iumin karōk an opiij ko reļļap an Kabun̄ jen juōn kumi jidikdik jen opiij, ekoba jejjo rijerbal ro, ripālele ro rej mijinede, im jet rijikin ro rej jipan̄ ilo ejjeļo̧k wōnāān. Ej pād iumin kōjparok an ruo jeban ro Reutiej an Kabun̄, Eļtōr Carmack im Eļtōr Richard E. Cook.
N̄an lale eddo eo an būrookraam̧ in erbakbak, rijerbal ro an PEF im mijenede ro ippān Eria Būreejtōnji ro rej leļo̧k kaminene n̄an ritōl ro an eria, ro rej ro̧o̧ltok im jerbal ippān ritōl ro an jikin eo wōt n̄an leļo̧k kaminene im jipan̄ n̄an rūkaki ro, rijerbal ro, ri-jipan̄ ro, im ro uwaan.
“Ekar jen jinoin im kiiō ej wōnm̧aanļo̧k im juōn em̧m̧akūt ekkajoor,” Rex Allen eaar ba, e ej jeban kaiminene eo im leto-letak meļeļe ko ikijjien būrookraam̧ eo. “Ekāāl ilo aolep ļābōļ, kōn menin leto-letak meļeļe im kaminene rej kanooj in aorōk.”
Wāween An Jerbal
Būrookraam̧ in eaar maron̄ bōk jikin kōn buki taujin kajjojo armej ro raar leļo̧k jāān n̄an jāān in jipan̄ in. Aolepen jāān ko leļo̧k ilo jipan̄ kar etal n̄an ro rej bōk koņaer.
N̄an ro rej bōk koņaer, jekjek eo ej jinoe kiiō kōn juōn in kōpojak eo kōpooje jen būrookraam̧ eo an kabun̄ eo me uwaan eo ej deļo̧n̄e. Kōn jipan̄ jān opiij ko an LDS n̄an jipan̄ kappok jerbal, ro rej bōk koņaer rej bōk ko̧o̧j ko kōn”Karōk in Jeraam̧m̧an” im kaminene ko n̄an ikijjien jerbal m̧okta jen kamōje apiļikejen in ļo̧o̧n eo ilo online.
Iien eo wōt ļo̧o̧n ko rej mālim, ro rej bōk koņaer rej pukōt jeļāļo̧kjeņ kōn meļeļe eo ke renaaj kōļļā muri ko aer bwe ro jet ren bar maron̄ jeraam̧m̧an jen ejja jāān in jipan̄ in wōt. Ro rej bōk koņaer rej bar kōļļā eļapļo̧k jen US$2.5 milien n̄an ļo̧o̧n ko aer aoleb iiō.
Eļtōr Carmack ej ba bwe būrookraam̧ eo ej em̧m̧an an wōnm̧aanļo̧k ejjab wōt kōn jāān in jipan̄ jen ro uwaan kabun̄ ak bārāinwōt kōn tōl ko rem̧m̧an. “Jemān Perpetual Education Fund eo ej Gordon B. Hinckley,” E eaar ba, “bōtab jipan̄ im itok limo eo an Būreejtōn [Thomas S.] Monson reļļap āinwōt ko an Būreejtōn Hinckley. [Būreejtōn Monson] eaar pād ilo jekjek eo jen jinoin im tōl e rainin kōn loļo̧kjeņ an rikanaan.”
Tōprak Ko
Ke kar kōjeļļāik būrookraam̧ eo ilo Eprōļ 2001 ilo kar kweiļo̧k eo eļap, Būreejtōn Hinckley eaar ba: “Kōn kabeel in jerbal ko rem̧m̧an jen jerbal, likao im jiron̄ rein remaron̄ in jutak ļo̧k jen jeram̧ōļ eo im epepen ko m̧okta jen er ko raar jeļā kake. Renaaj maron̄ em̧m̧an aer kakke aikuj ko n̄an baam̧le ko aer. Renaaj jerbal ilo Kabun̄ eo im eddōk ļo̧k ilo wāween tōl im eddo. Renaaj bar koļļāik ļo̧o̧n ko aer n̄an kōm̧m̧an bwe ro jet ren jeraam̧m̧an āinwōt er raar bar jeraam̧m̧an” (“The Perpetual Education Fund,” Liaona, Juļae 2001, 60; Ensign, Māe 2001, 51).
Ritōl ro an būrookraam̧ eo rej wōnm̧aanļo̧k n̄an kakūrm̧ool naan ko an Būreejtōn Hinckley. Jon̄an lōn̄in 10 ļo̧k n̄an 15 bōjāān in ritōl ro an Kabun̄ kiiō ilo laļ in emālim PEF eo rej ro raar ribōk leen jāān in.
“Menin in ejjab juōn kōņaan eo ebwebwe,” Būreejtōn Hinckley eaar wōnm̧aanļo̧k. “Ewōr wāween jipan̄ ko ippād kōn em̧m̧an im jouj an ro jerad ro reobrak kōn jipan̄. Epād ippād doulul eo. Epād ippād kajoor eo im rijerbal ro an Irooj rej wujlep tok aer n̄an kōm̧m̧an bwe menin en tōbrak. Ej juōn kōtōpar eo aoleb rej jipan̄ ilo ejeļo̧k jāān enaaj jelōt Kabun̄ eo. Kōjwoj ej jar ilo ettā im kam̧oolol bwe Anij enaaj kōrōlļo̧k kōttōpar in im bwe enaaj bōktok jeraam̧m̧an ko, m̧weie im em̧m̧an, n̄an ioon bar ko an taujin ejja āinwōt ro im̧aanļo̧k an doulul eo, Perpetual Emigration Fund, eo kar bōktok jeraam̧m̧an ko jab jeļā kaki ioon mour an ro raar bōk koņaer ilo wāween ko rem̧m̧an an.”
Ruwatimjuōn iiō ko tokālik, būrookraam̧ eo ej eddōk, maron̄ bōk jikin, ekkar n̄an Būratōr Allen, “kōn eļap jouj im eļap tōmak.”
Ro uwaan im rej maron̄ bōk jipan̄ in renaaj jeraam̧m̧an …
ilo bōk m̧ōttan leen ko an Perpetual Education Fund eo …
im ilo kōro̧o̧l ļo̧k bwe ro jet bwe ren maron̄ bōk jeraam̧m̧an barāinwōt.
Kōmļeļe ko jen Brad Teare