Iyang Gituman ang Akong Hangyo

Juan Carlos Fallas Agüero, San José, Costa Rica

Sa dihang gibunyagan ako sa edad nga 18, nasayud ako nga ang pagsunod sa ebanghelyo ni Jesukristo maoy mahimong paagi sa kinabuhi. Akong gibati ang importansya ug ang ka seryuso sa pagsunod sa mga sumbanan sa ebanghelyo, ug ang pagbuhat sa ingon mipanalangin sa akong kinabuhi sa daghang mga paagi.

Usa ka baruganan nga importante gayud kanako mao ang pagbalaan sa Adlaw nga igpapahulay. Naghatag kini kanako og higayon nga makapahulay sa naandan nakong mga buluhaton ug mopukos sa akong hunahuna ngadto sa akong Langitnong Amahan.

Nagtrabaho ako sa turismo sa Costa Rica. Niini nga industriya, kinaiya sa mga tawo nga motrabaho matag Dominggo. Sa pagsugod nako sa trabaho, gipaila nako ang akong kaugalingon nga miyembro sa Simbahan. Mihangyo ako—ug gitugutan—nga Dominggo ang akong pahulay sa trabaho.

Tungod sa dili talagsaon nako nga hangyo, ang akong mga kaubanan ug ang akong boss nakuryuso. Ila kong gipangutana og daghan kabahin sa akong mga gituohan. Sa paglabay sa panahon nakahigayon ako sa pagpasabut kanila sa pipila ka mga butang sa gituhoan sa mga Santos sa Ulahing mga Adlaw. Sa daghang mga hinungdan ang akong mga pagpasabut sa mga doktrina sa ebanghelyo nakakuha sa ilang pagtahud.

Usa ka adlaw ang akong boss mipundok sa among mga kawani alang sa usa ka pahibalo. “Gikinahanglan nako kamong tanan nga motrabaho sa Dominggo sa mosunod nga duha ka semana,” siya miingon. Ang akong kasingkasing nahugno. Nagpasabut kini nga kinahanglan kong motrabaho og Dominggo.

Dayon ang akong boss mipadayon: “Kana, alang sa tanan gawas lang ni Juan Carlos. Nasayud kami nga walay makapatrabaho kaniya og Dominggo.”

Nahuwasan ako. Gituman sa akong boss ang akong hangyo! Tungod sa akong kinaiya ug sa mga sumbanan nga akong gipakita sa trabaho, akong naangkon ang iyang pagtahud. Agi og sangputanan andam siya nga motahud sa akong gituohan.

Nahibalo ako nga kon himoon nato nga prayoridad ang mga sumbanan sa ebanglyo sa atong kinabuhi, ang Ginoo manalangin kanato.

“Gikinahanglan nako kamong tanan nga motrabaho sa Dominggo sa mosunod nga duha ka semana,” miingon ang akong boss. Ang akong kasingkasing nahugno. Nagpasabut kini nga kinahanglan kong motrabaho og Dominggo.