Greece

Sila si Rigas Pofantis ug Nicholas Malavetis kaniadto pang nagpangita sa relihiyusong kamatuoran sulod sa tulo na ka tuig dihang nakabasa sila og artikulo sa mantalaan niadtong 1898 nga naghisgut og Mormon. Naintriga sila ug misulat ngadto sa Church headquarters aron makakat-on og dugang. Ang mga lider sa Simbahan mipadala sa presidente sa Turkish Mission sa pagbisita ug sa pagtudlo sa duha didto sa Greece. Niadtong 1903 si Nicholas Malavetis namatay, apan duha ka tuig human niadto, si Rigas Pofantis misulat na usab ngadto sa Church headquarters ug mihangyo nga magpabunyag. Ang mga lider sa Simbahan mipadala na usab sa mission president sa Turkish Mission, kinsa mibunyag kang Brother Pofantis ug sa uban pang lima, lakip na sa biyuda nga asawa ni Nicholas Malavetis.

Ang unang mga misyonaryo miabut sa Greece paglabay sa unom ka bulan human niining pinakauna nga pagbunyag, apan sa pagsugod niadtong 1909, ang Simbahan mipahunong sa misyonaryo nga buhat didto sulod sa hapit 70 ka tuig, tungod sa problema sa politika sa mao nga dapit. Sa mao nga panahon, ang personnel sa militar nga nakapwesto sa maong dapit nagsugod sa pagsangyaw sa ebanghelyo ngadto sa mga tawo nga Greek. Sa gihapon, hinay ang pag-uswag; sa dihang ang Athens Branch gipuli sa yunit sa mga sundalo sa Simbahan niadtong 1967, ang listahan sa Simbahan naglakip og 80 ka mga miyembro sa branch apan walo lamang ang mga Greeks.

Niadtong 1972 si Elder Gordon B. Hinckley (1910–2008), nga sakop sa Korum sa Napulog Duha ka mga Apostoles, mipahinungod sa Greece alang sa pagsangyaw sa ebanghelyo. Sukad niadtong higayuna daghang kalamboan ang nakadasig sa pagtubo sa gidaghanon sa mga miyembro sa Simbahan, lakip na ang pagmantala sa hinubad ngadto sa Greek nga Basahon ni Mormon niadtong 1987, ang pagmugna sa Athens Mission niadtong 1990, ug ang pagpahinungod sa balay tigumanan sa Greece niadtong 1999.

Mga miyembro (2009).	661
Mga District	1
Mga Branch	5

Sa bag-ohay lang nga katuigan ang Mars Hill, ang lokasyon diin gihimo ang sermon ni Apostol Pablo diha sa Mga Buhat 17, nahimo nga dapit alang sa mga miting sa pagpamatuod, mga proyekto sa pagserbisyo, ug sa mga kasaulugan sa maayong ehemplo nga mga lungsuranong Greek.