Presidente Spencer W. Kimball (1895–1985)

Nagtubo sa balangay sa Arizona, si Spencer W. Kimball nakakat-on sa tinud-anay nga pagtrabaho sa sayo nga pangidaron. Apo ni Apostol Heber C. Kimball (1801–68) ug anak sa usa ka stake president, si Spencer nakaugmad usab og lig-ong pagpamatuod ug nakahupot og debosyon sa ebanghelyo.

Sa gamay pa siya nga bata, sa kasagaran katungdanan ni Spencer ang pagtungtong sa ibabaw sa dagami diha sa karomata, sa pagdasok sa mga dagami samtang ang iyang mga magulang nga lalaki motunol niini. Init kadto, abog, ug katol nga trabaho, apan siya mihimo niini—gawas lang kon ang kampana sa simbahan mobagting na sa pagpahibalo nga magsugod na ang Primary, diin kaniadto himoon kini sulod sa semana. Perpekto ang iyang rekord sa pagtambong ug walay palta. Ang iyang igsoong mga lalaki adunay laing ideya ug misugod sa paghakot sa mga dagami ngadto sa karomata nga mas paspas. Sa dihang nakabantay sila nga ang dagami nahapnig na, katunga na ang gilay-on ni Spencer ngadto sa Primary.

Si Spencer W. Kimball nakaserbisyo isip usa ka misyonaryo, usa ka bishop, ug usa ka stake president sa wala pa siya matawag sa pagka apostol niadtong 1943. Ang iyang maayo nga kinaiya sa pagtrabaho nailhan kaayo, bisan sa ubay-ubay nga mga grabeng sakit nga naglakip sa atake sa kasingkasing ug kanser sa tutunlan. Iyang giawhag ang mga miyembro sa Simbahan sa pagpataas sa ilang lakang, ug ang personal niya nga motto mao ang yano nga “Buhata Kini.” Tungod sa iyang panglawas, ang uban nagtuo nga ang administasyon ni Spencer W. Kimball isip Presidente sa Simbahan mubo ra. Apan gidumala niya ang Simbahan hangtud 12 ka tuig, diin nianang panahona ang gidaghanon sa gigamit nga mga templo nadoble, ang gidaghanon sa mga misyonaryo mitubo og 50 porsyento, ug ang priesthood ihatag na ngadto sa tanang takus nga mga miyembro nga lalaki.

Ang dili mapaling niya nga debosyon sa ebanghelyo ug ang lig-on niya nga maayong kinaiya sa pagtrabaho mihimo kang Spencer W. Kimball gikan sa mapainubsanon nga mga sinugdanan sa balangay sa Arizona ngadto sa pagpangulo sa mga council sa Simbahan. Ang iyang administrasyon isip Presidente sa Simbahan nailhan pinaagi sa makahuluganon nga kalamboan sa pagtukod og mga templo ug sa misyonaryo nga buhat. Sa wala: Kauban sa iyang asawa, nga si Camilla (1894–1987).