Tala Faamamai o le Talalelei
Ia Le Faaseseina
O Iosefa Filitia Samita, le Peresitene lona 10 o le Ekalesia, sa soifua mai i le aso 19 o Iulai, 1876. Sa faauuina o ia o se Aposetolo i le aso 7 o Aperila, 1910, ma sa lagolagoina o se Peresitene o le Ekalesia i le aso 23 o Ianuari, 1970. I le saunoaga lenei, sa fofogaina i le 1953, sa aoaoina ai e Peresitene Samita le autalavou i auala e le faaseseina ai i latou i manatu sese o le lalolagi.
Mai le “Entangle Not Yourselves in Sin,” Improvement Era, Sete. 1953, 646–47, 671–72, 674, 676–78; ua faalaugatasia mataitusi tetele ma faailoga.
A o suia e isi o latou tulaga faatauaina ia ogatasi ma aga a le lalolagi, e tatau lava ona tatou tutumau mausali i tusitusiga paia ma upu moni faaalia o le talalelei.
Ua tatou ola i se lalolagi ua matuai faigata, ma o le a ou talanoa manino atu lava: o loo tatou nonofo i se lalolagi ua latou faaleaogaina le Atua pe ua televave foi lo latou faia faapea. O loo tatou nonofo i se lalolagi ua faamata’uina ai faifeau Kerisiano o tapuaiga eseese e filosofia o tagata ma, o le mea lea, ona o lo latou le mauaina o le Agaga o le Alii, ua latou taumafai ai e sui tusitusiga paia, po o uiga o mau, ina ia mafai ona latou faaogatasia ma aoaoga sese ua matele ai le lalolagi i aso nei, o aoaoga ia ua matuai feteenai lava ma faaaliga faalelagi; ae peitai o nei foi tagata, ona o le matatau, ma le pulea e faatosinaga o filosofia sese, ua latou suia ai aoaoga faavae ina ia latou ogatasi ai ma nei aoaoga ma manatu e le faaleatua o latou faavae. E le tatau ona tatou faia lena mea. …
“E susulu atu le malamalama i le pouliuli, a e le iloa e le pouliuli; a e ui i lea, o le a oo mai le aso tou te malamalama ai le Atua lava, ona ua faaolaina ia te ia ma e mai ia te ia.
“Ona outou iloa ai lea na outou vaai ia te au, o i ai au ma o au lava o le malamalama moni e ia te outou, ma o i ai outou ia te a’u; ana leai ua le mafai ona outou ola” (MFF 88:49–50).
O se faaaliga matagofie lenei. Ua faamalamalamaina ai le tele o mea e sili ona taua i tagata uma o le Ekalesia. Mata e to’a fia i tatou ua faitauina le vaega e 88? Aua le tuua i le na o le faitauina o le vaega lenei e tasi. Ia fai ma au mau tauave—e leai se mea e sili atu—ae o le faitau o le faaaliga atoa. Leai! Faitau le tusi atoa. Na poloai mai le Alii i le vaega muamua o le Mataupu Faavae ma Feagaiga, o le faatomuaga lea o le tusi lenei, le faatomuaga a le Alii:
“Ina saili nei poloaiga, aua ua moni ia ma faamaoni lava, ma o valoaga uma ma folafolaga o i ai o le a faataunuuina” (MFF 1:37).“Ina sailia nei poloaiga.” O le a le tele o lo tatou alofa i le Alii? O le a le poloaiga ua sili i poloaiga uma? Ua ta’u mai e le Alii ia i tatou iinei, i le vaega e 59 o le Mataupu Faavae ma Feagaiga, lea mea, a o Ia faatatauina i tagata O Le Ekalesia a Iesu Keriso o le Au Paia o Aso e Gata Ai i lenei tisipenisione o le atoaga o taimi:
“O le mea lea, ou te tuuina atu ai ia te outou [o tagata o le Ekalesia] le poloaiga, e faapea: Ia e alofa atu i le Alii lou Atua ma lou loto atoa, ma lou manatu, mafaufau, ma lou malosi atoa; a o le igoa o Iesu Keriso ia e auauna atu ai ia te ia” (MFF 59:5). …
O le poloaiga muamua lava la o poloaiga uma o le, ia alofa i le Atua ma lou loto atoa ma, ia auauna atu ia te Ia i le suafa o Iesu Keriso, ma ua Ia poloaiina i tatou ina ia tatou faamasani i nei upu moni ua faaalia mai ia i tatou i le tisipenisione o le atoaga o taimi.
E to’a fia la i tatou ua faia? Ou te faapea atu ia te outou, ma tagata uma o le Ekalesia, aua nei pau mai lou malamalama i le fuaiupu e tasi [MFF 88:86, o le autu lena o le Mutuale i le tausaga lena], o se autu sili ona manaia, ae ia suesue i tusitusiga paia, ina ia le faaseseina oe e aoaoga ma faiga ma aoaoga faavae sese ia ua taatele i le lalolagi i aso nei. Afai o le a e faia lenei mea, afai o le a i ai i o outou loto le taitaiga a le Agaga o le Alii, lea ua aia uma i ai tagata o le Ekalesia, i le mafutaga a le Agaga Paia, o le a le taitai seseina oe e aoaoga a tagata, aua o le a ta’u atu e le Agaga o le Alii ia te oe e sese ia aoaoga, ma o le a e maua le agaga o le iloatino e te malamalama ai. …
O lenei, afai e te malamalama i le talalelei a Iesu Keriso, o le a faasaoloto ai oe. Afai e le i ai le Agaga o le Alii i lau taaloga sofipolo, i lau volipolo, lau pasiketipolo, lau tuuga tamoe, lau siva, ma isi au mea faafiafia, o le a leai ni o latou taua ia te oe. Ia fai mea uma i le agaga o le tatalo ma le faatuatua. Ou te manatu o le tulaga lena—atonu e le manaomia ona ou tau fai atu ai—ae faia ia faapena. Ia fai mea uma ma le manatu tasi i le mamalu o le Atua, ma ia tatou aoao atu ina ia fausia ai ma faamalosi ai i tatou lava ma Le Ekalesia a Iesu Keriso o le Au Paia o Aso e Gata Ai.
Ata na saunia e Frank Helmrich