Aisea e Taua ai Tusitaulima?

A o faalauiloa mai e taitai o le Ekalesia ia tusitaulima fou e lua ma fesoasoani e faamalamalama mai le auala e faaaoga ai aiaiga o loo i ai i ni fonotaga se lua faaleaoaoga mo taitai i le lalolagi atoa, ua latou taliina ai foi ma le fesili: aisea e taua ai tusitaulima?

Faatasi ai ma le tele o auala e mafai ona avea ai tusitaulima a le Ekalesia o se faamanuiaga i itu nei: (1) faatumauina o le sa’o aiai o faiga faatulagaina i le taimi o le televave o le tuputupu ae [o le Ekalesia], (2) tuuitiitia o le avega a le Au Peresitene Sili, ma le (3) lagolagosua i faaaliga i taitaiga i le lotoifale.

Sa’o Aiai ma le Tuputupu ae

E fesoasoani tusitaulima e faatumauina ai le sa’o aiai o aiaiga, faiga, ma polokalama a se ekalesia o loo feagai ma le televave o le tuputupu ae i le lalolagi atoa.

“Ua faatoateleina lo tatou faitau aofai talu mai ona faatulagaina le Ekalesia i le 1830. Ma o le a faaauau ona tuputupu ae i le faitau afe o iunite i le lalolagi atoa,” na saunoa ai Peresitene Thomas S. Monson, i le taimi o le fonotaga faaleaoaoga a taitai i le lalolagi atoa ia Novema 2010. “O le a fai si faigata ona faatumauina le sa’o aiai o aiaiga, faiga, ma polokalama a le Ekalesia e aunoa ma nei tusitaulima.”

O Le Avega a le Au Peresitene Sili

O tusitaulima e fesoasoani e tuuitiitia ai le avega a le Au Peresitene Sili, o le tele o le taimi e alu i le taliina o fesili e faatatau i faiga faatulagaina ma le faasa’oina o mea sese i faiga faatulagaina.

“A o matou fono faatasi o se Au Peresitene Sili i a matou fonotaga i aso o vaiaso taitasi, e ao lava, o se tulaga e tatau ai, ona taulimaina ma faasa’o ni mea sese,” na saunoa ai Peresitene Monson. “O le tele lava o nei mea sese e mafai ona alofia pe ana faapea … na masani ona faaaoga e taitai ia tusitaulima ma mulimuli i aiaiga ma faiga o loo faatulaga atu ai.”

Na saunoa Peresitene Monson, e i ai taimi e fai ai e taitai e i ai ni o latou faamoemoega lelei, o e e le masani i aiaiga ma faiga a le Ekalesia ni faaiuga e ono oo atu ai i ni faafitauli tuga i polokalama a le Ekalesia.

Na saunoa Peresitene Monson, “E tusa pe ua leva ona avea oe ma se tagata o le Ekalesia, po o oe o se tagata fou, ia siaki i le tusitaulima pe afai e te le o mautinoa se aiaiga po o se faiga faatulagaina. O loo i ai le saogalemu i tusitaulima.”

Lagolagosua i Faaaliga

O tusitaulima e fesoasoani e lagolagosua i faaaliga a o saili e taitai i le lotoifale le taitaiga a le Agaga i le faataunuuina o fuafuaga a le Ekalesia.

Na saunoa Elder Quentin L. Cook o le Korama a Aposetolo e Toasefululua i le fonotaga ia Novema 2010, “A silafia e taitai o le Ekalesia o latou tiute ma mulimuli i faiga ua faatulagaina, latou te valaaulia le Agaga Paia e musuia i latou ma tagata o loo latou tautuaina.”

Sa faamalamalama mai e Brother David M. McConkie, o le fesoasoani muamua i le au peresitene aoao o le Aoga Sa, le taua o tusitaulima i le konafesi aoao o Oketopa 2010.

A o faia ana aoaoga faamasani i le avea ai o se peresitene fou o le siteki e se Fitugafulu Eria, sa fesiligia ai e Brother McConkie ni fesili, i lona matamuli, sa i ai uma lava tali i tusitaulima.

“Ou te lei toe taumafai lava e fai atu se isi fesili. Sa ou faapea, e sili ai lo’u faitau i le tusitaulima,” o le tala lea a Brother McConkie. “E le o le auala lea e faatautaia ai le lagi, le toe ta’u mai e le Alii ia i tatou taitoatasi o mea ua uma ona Ia faaalia mai ia i tatou o se vaega atoa” (“Aoaoina Mai ma le Aoao Atu o le Talalelei,” Liahona ma le Ensign, Nov. 2010, 13).

Ina ia maua le vitio, anotusi, ma le leo o fonotaga faaleaoaoga mo taitai i le lalolagi atoa o Novema 2010 ma Fepuari 2011 i gagana e 40, asiasi i le Serving in the Church vaega o le LDS.org.

O taitai o e ua masani ma mulimuli i tusitaulima, ua valaaulia le taitaiga a le Agaga Paia e musuia i latou.

ata na pueina e welden C. andersen