E faapefea ona fesoasoani le talalelei ia ou fiafia?

Ua faasoa mai e Elder David A. Bednar o le Korama a Aposetolo e Toasefululua nisi o manatu e uiga i lenei mataupu.

O le autu ma le mafuaaga o le fiafia moni o upu moni o le talalelei ma le usiusitai i tulafono e faavavau.

Ua mamanuina le fuafuaga o le ala sili o le fiafia a le Tama Faalelagi ina ia taialaina ai Lana fanau, ina ia fesoasoani ia i latou ia fiafia, ma toe aumaia ma le saogalemu i latou ia te Ia.

I lenei olaga tatou te lagona ai le agaalofa, alofa, agalelei, fiafia, faanoanoa, le fiafia, tiga, ma e oo lava i le faatapulaaina faaletino i auala lea e saunia ai i tatou e toe mau faatasi ma lo tatou Tama Faalelagi. E i ai lesona e tatau ona tatou aoao ai ma aafiaga e tatau ona tatou mauaina i luga o le fogaeleele.

Ua e iloa le mea sao ma le mea sese, ma ua ia te oe le tiutetauave e aoao ai mo oe lava ia “e faapea foi i le su’esu’e ma le faatuatua” (MFF 88:118) o mea e tatau ma e le tatau ona faia.

O le usiusitai i mataupu faavae o le talalelei e valaaulia ai le mafutaga faifai pea a le Agaga Paia. O le Agaga Paia e fesoasoani ina ia tatou iloa, ia malamalama, ma ia ola ai i aoaoga a Iesu Keriso.

Mo lou fiafia ma le saogalemu, ou te valaaulia oe ina ia suesue ma ola ai ma le maelega atili i le talalelei a le Faaola. E le na o lo tatou ola ai i le talalelei, ae e tatau ona tatou fiafia e ola ai i le talalelei. Pe a tatou faia o lea, o le a tatou maua faamanuiaga e le mafaitaulia, malosiaga sili atu, ma le fiafia moni.

Mai se saunoaga na tuuina atu i le faigalotu a le Iunivesite o Polika Iaga–Idaho i le aso 23 o Aok., 2002.

Ata na tusia e Brian Beach