Faiaoga o Aiga ma Faiaoga Asiasi: O Se Galuega o le Auaunaga
E te fou i faiaoga o aiga po o faiaoga asiasi? Manatunatu i fautuaga nei e iva.
Ou te iloa ua uma le masina, ma e ou te faanoanoa sa lei maua so ma avanoa e talanoaina le Savali a Faiaoga Asiasi,” sa fai atu ai le faiaoga asiasi a Sister Julie B. Beck. Peitai e ui lava sa na ia faia lea tala, sa na ia tuua le fale o le peresitene aoao o le Aualofa ma se ato tagamea e auli e faauma ma toe faafoi ia Sister Beck. “E te manatu e taulia lenei mea?” na ia fesili ai ia Sister Beck ma le le mautonu.
Ina ua toe faamatala e Sister Beck lea tulaga, sa maligi ona loimata a o ia fesili mai,”E faapefea ona lagona e lenei uo pele ma se faiaoga asiasi tuuto e lei asia ma aoaoina ma tausia au? E le o se taimi muamua lea ua ia afea ma tali atu i se manaoga i lena masina. E faapefea ona ia le iloa lana galuega auauna atu faifai pea mo au ma faamanuiaina ai lou aiga? O lana tausiga ma lona popole mo au o ni faataitaiga silisili o faiaoga asiasi. Ioe, e mafai ona ia lipotia sa asia ma aoaoina au!”
A o faamatala e Sister Beck lona aafiaga, o aoaoga ma asiasiga musuia i aiga e sili atu nai lo se asiasiga masani ma e le muta. O faiaoga o aiga ma faiaoga asiasi e faatatau atili i le tausiga o tagata nai lo le na o na faataunuu o asiasiga, ma a faataunuuina sao, ua latou suitulaga i le tausiga ae le o le faitauina. O nei tofiga e saunia ai mo le tausiga o tagata ma feauaunaai le tasi i le isi e pei ona auauna atu le Faaola. Atonu e fesoasoani nisi nei o metotia ia te oe:
-
Ia iloa le ua tofia i ai oe e asia ma po o ai lau soa. O le taitai perisitua po o le Aualofa i lau uarota po o le paranesi e tatau ona avatu ia te oe le igoa ma faamatalaga o faafesootaiga o aiga po o tagata taitoatasi ua tofia oe e asia. Ia e faamasani i lau soa ma tagata o le a lua asia ma amata fausia se fegalegaleaiga.
-
Asiasi atu. Feiloai i le fale o le tagata pe a tatau ai. Afai e le talafeagai lena atonu e tatau ona fuafua e feiloai latalata i le mea e faigaluega ai le tagata, savalivali faatasi, po o le faatasitasi a o lei amata po o le maea foi o sauniga o le Aso Sa. Aoao atu ma uunaia e le tasi le isi—atonu e amata i le au Peresitene Sili po o le Savali a Faiaoga Asiasi. Faasoa atu lau molimau. Faasoa atu mea o loo tutupu i lou olaga. Faatupu le alofa i le agaga faauo ma le fetausiai. Faalogo ma le faamaoni. Faatumau le talitonuga o faamoemoeina ai oe e isi. Faaauau ai pea le avea o oe ma se uo, a o taitai atu i le talitonuga sili i le gasologa o le taimi.
-
Tatalo faatasi mo latou o loo e aoaoina. Atonu e talafeagai le fesili atu i le faaiuga o le lua asiasiga, “E mafai ona tatou tatalo faatasi?” O le ulu o le aiga e tatau ona tofia se tasi e faia le tatalo. I aso ma vaiaso i le va o asiasiga, faaauau ona tatalo mo e o loo lua faiaoga ma asia o aiga. Ole atu i le Tama Faalelagi mo se fesoasoani ia iloa pe faapefea ona tausia ma alofa ia i latou.
-
Auauna atu. Matau ma tulimatai atu i manaoga. Mo se faataitaiga, afai e i ai se suega i le aoga a se uso o loo lua asia, atonu e mafai ona lua saunia se taumafataga o le afiafi mo ia i le aluga o le vaiaso ina ia lava sona taimi e suesue ai. Afai o se alii o loo lua faiaoga asiasi ai o loo tau saili se galuega, faamasani atu o ia i tagata o e ono mafai ona fesoasoani.
-
Fai ni fesili aoga. E mafai i fesili ona taitai atu i avanoa e maua ai faamafanafanaga, fefaasoaai ai i mataupu faavae talafeagai o le talalelei, ma saunia ai auaunaga anoa. Atonu e te fesili atu: “O a ni ou popolega po o ni le mautonu?” “O a ni ou fesili o i ai e uiga i le talalelei?” Pe mafai foi ona lua fesili sao atu: “E mafai ona ma fesoasoani i se galuega i lou aiga?” O e manaomia se auala agai i le faleoloa po o se talanoaga ma le fomai? O fesili e masani ona maua ai taunuuga lelei nai lo le na o le fai atu, “Faafesootai atu maua pe a i ai se mea e te manaomia.”
-
Saili musumusuga. E mafai e le Agaga ona fesoasoani ia te oe i le iloa pe faapefea ona fesoasoani ia i latou ua tofia oe e te asia. Atonu e uunaia oe i le autu e talanoaina po o fesoasoaniga e ofo atu. A o amata ona oulua iloa atili i latou, atonu o le a musuia oulua e faamalosiau atu ia i latou o oulua asia ina ia maua isi sauniga ma feagaiga o le talalelei po o le faateleina o le auai i faamanuiaga uma e ofo mai e le talalelei.
-
Lipoti atu faamatalaga sao. Lipoti atu tulaga o le soifua manuia faaletino ma le faaleagaga o i latou o oulua asia, soo se auaunaga na oulua avatua, ma soo se manaoga. Ia lipoti sao atu popolega e le faalauaiteleina i le peresitene o le Aualofa po o le peresitene o le korama.
-
Galulue faatasi ma lau soa. Faatasi ai ma lau soa, vaevae tofiga pe a tatau ai i le faia o fesootaiga ma le tuuina atu o le tausiga. Atonu e te lua manaomia le feauai e asiasi, tuuina atu le auaunaga, ma lipoti atu le tulaga o le soifua manuia o i latou o loo oulua aoaoina.
-
Manatua. Ia tulimataia mea taua na tutupu i olaga o i latou o oulua aoaoina, e pei o aso fanau ma e oo lava i mea e tutupu mai lea aso i lea aso e ono taua ia i latou.
Ata na tusia e Robert Casey, Craig Dimond, John Luke, ma Jerry Garns
Ata na tusia e Craig Dimond, Matthew Reier, Danny Soleta, Welden C. Andersen, ma Jerry Garns; ata pue o Sister Allred na saunia e Busath Photography